Pơlăh đing, ‘nhot pro har, iĕr phang, ‘nhĕm prung hlôi joăt joe hăm kon pơlei Êđê oei tơ̆ tơring Cư Huê, apŭng Ea Kar adoi nhen lơ pơlei pơla anai lơ̆m dêh char Dak Lăk… Lăp đơ̆ng mă dôm ‘nhĕm ‘nhot ou đei bơngai đảng viên H’Bút Bi Mlô, oei tơ̆ buôn M’oa, tơring Cư Huê chă pai sa ou hlôi đei jing ‘nhĕm ‘nhot gĭt kăl, hơnhăk ăn đei iŏk yua truh kơ ti hlak jên lơ̆m mĭnh sơnăm.

Mŏ H’Bút Bi tơroi, ba jei đei bơ̆ jang teh đak lơ̆m 10 sơnăm kơna tôch kơ hlôh vao găh tơdrong ‘meh vă răt sa kơ rim kang ƀô̆ rim hơnih bơ̆ jang, hơnih mơdro sa lơ̆m apŭng. Hlôi đei 2 pơbŭng hnam pơtăm sơ̆ ki kơ ŭnh hnam atŭm hăm cham hnam ‘lơ̆ng liĕm, mŏ hlôi pơjing hơnih et sa hăm ‘nhĕm ‘nhot joăt joe kơ bơngai Êđê păng chă tĕch mơdro dôm tơmam drăm pơsư̆ joatw joe kơ bơngai Êđê. Yak hloh tơdrong tơnap tap lơ̆m 2 sơnăm jĭ hơbuh Covid-19 pơrăm, hnam et sa kơ H’Bút Bi hlôi jing hơnih đe ư hơnhang, hơvơn đei 200-300 ‘nu tơmoi năm et sa lơ̆m mĭnh năr. H’Bút Bi tơbăt:“ Hăm hơnăp jang jĭ 1 ‘nu đảng viên, ba tŏk bŏk hop akoưm lơ̆m chi ƀô̆ pơlei, ba tôch kơ hưch hanh hơmanh bơnê kơ rơdrong oei sa joăt joekơ bơngai Êđê bơ̆n, ba chă tĕch chehphe, đơ̆ng noh chă tĕch ‘nhĕm ‘nhot et sa ăn tơmoi păng tơroi tơbăt dôm tơdrong oei sa joăt joe kơ bơngai Êđê bơ̆n. Mưh teh đak tơlĕch tơdrong jang plang ăn teh pơm trong, ŭnh hnam bơ̆n jei plang hloi 1m 1poăt jih ‘moi kiơ̆ trong hơtăih 40 met vă pơjing đei trong să ăn kon pơlei chă yơ yak hiôk hian ƀiơ̆”.

Tơdăh đảng biên H’Bút Bi jang kiơ̆ ‘lơ̆ng jơhngơ̆m mơlôh hơbĕch hơbal pơn iung jang vă atŏk tơ iung mŭk drăm, ‘noh ƀok Y Quá Mlô jĭ bơngai kăl hloh kơ sơnăm roi kră, jơhngơ̆m đon roi kơtang. Sơnăm ou 68 sơnăm, jĭ đảng viên đunh sơnăm lơ̆m chi ƀô̆ buôn Tơng Kroa, prăt lơ̆m sơnăm mơlôh jĭ bơngai kang ƀô̆ bơ̆ jang lơ̆m tơring Cư Huê. Truh pơdơ̆h bơ̆ jang, ƀok Y Quá mă akŏm choh jang sa. 8 sơnăm brŏk vih hăm mir pơgar, ƀok hlôi pơjing đei mir pơgar să hăm 2.000 dơnơm chehphe, 400 dơnơm tiu, hloh 1 sao ‘ngiĕt rong rơmo păng pơbe. Hrei ou lơ̆m mĭnh sơnăm đơ̆ng choh jang sa, rong kon tơrong ƀok iŏk đei mĭnh ƀar hrĕng triu hlak jên. Đei mŭk drăm, ƀok ling lang lăng ba tơgŭm djru kon pơlei tơnap tap lơ̆m pơlei găh kon jên, kih thuơ̆t vei lăng năng tông ‘long pơtăm; tơgop tơgŭm lơ̆m tơdrong jang tơ iung pơjing tơring tơrang ‘nao. ‘Ngoăih kơ ‘noh ƀok oei plang ăn kơ hrĕng met vuông teh pơm trong nơnăm. Ƀok Y Quá Mlô tơroi, mă đơ̆ng jang dôm tơdrong yă kiơ, ƀok hơnơ̆ng chăm bơ̆n ‘noh bơngai đảng viên. “Ĭnh jĭ mĭnh ‘nu đảng viên đĭ pơdơ̆h jang teh đak, ba jei hơdrin đĭ ai chă jang, ŭnh hnam bơ̆n jang chehphe, tiu, rong 10 tŏ rơmo păng 20 tŏ pơbe. Lơ̆m tơdrong hơvơn pơm pơnơ̆t đak, ŭnh hnam bơ̆n plang ăn 2ha 5 sao teh vă pơm pơnơ̆t đak Ea Bư. Vang iung jang kiơ̆ tơdrong jang tơ iung pơjing tơring tơrang ‘nao, ŭnh hnam bơ̆n plang ăn 500m2 teh vă pơm trong”.

Lơ̆m apŭng Ea Kar hrei ou đei 7.000 đảng viên, lơ̆m ou đei 1.250 đảng viên ‘noh bơngai kon kông, tơmơ̆t dang 18%. Kiơ̆ đơ̆ng Hơnih Đảng apŭng Ea Kar, găh lơ đảng viên lơ̆m đảng ƀô̆ hlôi jang kiơ̆ ‘lơ̆ng hơnăp jang pơm jŭk yŭk trong hơlou lơ̆m choh jang sa atŏk tơ iung mŭk drăm, vang jang kiơ̆ tôm tong rim tơdrong pơgơ̆r tơgop, tơgŭm djru, plang ăn teh tơ iung pơjing tơring tơrang ‘nao tơ̆ tơring. Rim đảng viên nhen Y Quá Mlô hăm H’Bút Bi Mlô jei jing dôm đảng viên kăl hloh, pơjing đei jơhngơ̆m pran lang să kơtang tơdrong jang atŏk tơ iung mŭk drăm, tơgop lơ̆m tơ iung pơjing tơring tơrang ‘nao tơ̆ pơlei pơla.

Ƀok Y Nhuân Byă, Bí thư Đảng apŭng Ea Kar tơbăt, bơ̆ jang atŏk tơ iung đảng viên lơ̆m tơring kon kông đei pơ đĭ lơ̆m đảng ƀô̆ lăng kơjăp. Khei năr ou kơnh gô roi năr roi đei ƀôh lơ hloh dơ̆ng dôm đảng viên gơ̆h hơgei jang ‘lơ̆ng, pơm jŭk yŭk trong hơlou vă kon pơlei pơla lui yom, kiơ̆ yok rok jơ̆ng atŏk tơ iung choh jang sa, mơdro sa, pơm hơtŏk tơdrong hơrih sa ‘lơ̆ng rŏ hơbŏ nhen. Ƀok Y Nhuân Byă pơma:“Găh atŏk tơ iung đảng viên lơ̆m kon pơlei kon kông ‘noh nhôn lăng ba tôch kơ jăp, ‘nou jing tơdrong pơjing đei dôm bơngai đảng viên ăn rim jơhnơr pơtăl ăn. Rim đảng viên oei tơ̆ tơring Cư Huê tơring kon pơlei kon kông ‘noh jĭ dôm bơngai ‘lơ̆ng vă kon pơlei păng đảng viên anai hŏk pơhrăm, kiơ̆ yok rok jơ̆ng. Lơ̆m rim ‘măng hop akŏm kơ Hơnih Đảng apŭng, nhôn jei hơnơ̆ng tơroi tơƀôh tơdrong jang ‘lơ̆ng ou vă pơjing đei jơhngơ̆m pran lang să lơ̆m rim đảng ƀô̆.”

Tơdrong lăng kơjăp atŏk tơ iung đảng viên lơ̆m tơring kon kông tơ̆ rim chi ƀô̆ đảng kơ apŭng Ea Kar khei năr ou ki hlôi păng tŏk bŏk tơgop atŏk kơtang bơ̆ jang ‘lơ̆ng hơnih đảng pran kơjăp iăp kơtang. Atŭm hăm ‘noh, tơdrong kiơ̆ yok rok jơ̆ng hơnăp jang pơm jŭk yŭk trong hơlou kơ đảng viên lơ̆m tơdrong jang pơting dih băl jang sa, mơdro sa gơ̆h hơgei, vang tơgop, tơgŭm djru, plang ăn teh pơm trong nơnăm jei hlôi tơgop kơ tang lơ̆m tơdrong jang tơ iung pơjing pơlei pơla roi năr roi pơdrŏng ‘lơ̆ng liĕm, gơ̆h hơgei, vei kơjăp, atŏk kơtang păng vei răk tơƀăk mong tơdrong oei sa joăt joe ‘lơ̆ng rŏ kơ hơdrech hơdrung, tơ iung pơjing kơjăp iăp kơtang tơgoăt tơgoăl rim hơdrech hơdrung.