Giĕng ou ki, Khul tang măt Kuô̆k hô̆i dêh char Dak Lăk hlôi đei jơ tơƀơ̆p pơma dơnuh hăm bơngai tăh hla tơ̆ rim apŭng Krông Pach, Cư Mgar, Ea Súp păng Buôn Đôn. Tơ̆ hơnăp ‘Măng hop akŏm mă 9, Kuô̆k hô̆i jăl XV păng tơdrong iung jang tĕnh koăng tơdrong hơmet ming hơnih jang, khul jang teh đak, mĭnh lơ̆m dôm tơdrong hơpơi kơtang mă bơngai tăh hla tơbăt jơhngơ̆m đon ‘noh rơih ƀlep kang ƀô̆ tŏk bơ̆ jang tơdrong jang hle. 

Tơ̆ rim hơnih tơƀơ̆p, lơ bơngai tăh hla tơbăt jơhngơ̆m lăp đon hăm trong bơ̆ jang hơmet ming kơtoei hơnih jang khul bơ̆ jang, mă lei jei athei tơdrong pơprŏ kang ƀô̆ kăl chă rơih ƀlep tơdrong gơ̆h jang, đei jơhngơ̆m đon ‘lơ̆ng păng đĭ jơhngơ̆m đon bơ̆ jang ăn kon pơlei. Ƀok Nguyễn Duy Thành, bơngai tăh hla oei tơ̆ thôn 14, tơring Ea Kly, apŭng Krông Pach tơbăt jơhngơ̆m đon: “Pơm kơtoei ‘lơ̆ng khul bơ̆ jang đơ̆ng Trung ương truh tơring kon pơlei nhôn tôch lăp đon. Kơna ‘măng mă ou nhôn hơpơi ‘meh vă Kuô̆k hô̆i, ‘meh vă Đảng bơ̆n kăl iung jang mă kơtang vă tơmơ̆t dôm bơngai hơgei, đei jơhngơ̆m đon ‘lơ̆ng, bơ̆ jang tơnăp hloh dơ̆ng lăng tông nông gia kon pơlei ‘lơ̆ng hơ iă. Tơdăh hơlen ưh kơtang lei ‘măng pơm sơđơ̆ng ou kơnh gô đei dôm bơngai ưh tơnăp, ưh hơgei đei tŏk bơ̆ jang, mă dôm bơngai gơ̆h hơgei đei jơhngơ̆m đon tơpuh ăn năm bơ̆ jang tơ̆ tơring.”.

Đei ƀơm truh tơdrong hơrih sa tơpôl, bơngai tăh hla tơroi tơbăt oei đei dôm ŭnh hnam dơnuh, ŭnh hnam tơnap tap hơrih sa lơ̆m hnam pơgia, hnam hnăt hnot mă lei tim mă iŏk đei trong tơgŭm djru đơ̆ng Teh đak. Bơngai tăh hla Thân Ngọc Duyến, thôn Phước Hòa 1, tơring Ea Quang, apŭng Krông Pach tơbăt:“Tơ̆ tơring nhôn đei bơngai ƀô̆ đô̆i so dang ei jĭ jăn păn mĭnh hơnih, 2 'nu kon hơ ‘lơ̆p ‘noh vơnh, ưh kơ đei hnam oei. Nhôn jĭ bơngai ƀô̆ đô̆i so apĭnh Hơnih vei lăng kon pơlei ‘noh hơnih vei lăng kon pơlei akhan apŭng pơjao ăn tơring Ea Quang 9 pơbŭng hnam, pă đei ăn dơ̆ng bơih. Dang ei, ƀô̆ đô̆i so tơring nhôn chă hơvơn ming man jơ̆ng hnam đang bơih. Lơ loh kiơ̆ kơ khul kơdră tang măt Kuô̆k hô̆i hnam ou hăm gơ̆h vă tơ iung pơjing ming man ưh?"

Dôm nơ̆r tơgop, apĭnh đơ̆ng bơngai tăh hla hlôi đei Khul kơdră tang măt Kuô̆k hô̆i păng kơdră chĕp pơgơ̆r rim hơnih bơ̆ jang dêh char păng kơdră chĕp pơgơ̆r Hơnih vei lăng kon pơlei rim apŭng tơl hơdăh. Hăm dôm nơ̆r tơgop,nơ̆r apĭnh hloh tơdrong kĕ xek tơlang, Khul kơdră tang măt Kuô̆k hô̆i dêh char Dak Lăk pơma pơkăp gô tơroi tơbăt ăn kơdră kơpal lăng hơlen, adoi hơnơ̆ng lăng tông tơdrong xek tơlang vă sơđơ̆ng đei iŏk yua ‘lơ̆ng hơ iă ăn kon pơlei.

Lơ̆m mă noh, tơ̆ dêh char Lâm Đồng, Kơ iĕng Kơdră chĕp pơgơ̆r Kuô̆k hô̆i Nguyễn Đức Hải atŭm hăm khul bơ̆ jang hlôi bơ̆ jang hăm dêh char păng Hơnih tơm Chă tơchĕng hơlen hạt nhân Đà Lạt găh tơlĕch jang kiơ̆ Tơdrong tơchơ̆t 57 đơ̆ng Hơnih tơm Chinh trĭ păng Tơdrong tơchơ̆t 193 kơ Kuô̆k hô̆i, vă pơjing hơyak pran lơ̆m atŏk tơ iung khoa hŏk kmăi kmŏk păng tơplih kơsô̆.

Kơ iĕng Kơdră chĕp pơgơ̆r Kuô̆k hô̆i pơma hơdăh, tơdrong jang pơlong năng trong jang kăl ‘noh kăl lăng kiơ̆ kơjăp lơ̆m tơdrong yan ou, sơđơ̆ng hrơ̆p mĭnh ‘măng, jơnei, veh ver iung jang pơgia. Lâm Đồng jei đei apĭnh hrôih tơ iung pơjing hơnih tơm tơplih ‘nao ‘nao, lơ khul jang, pơjing hơyak pran ăn atŏk tơ iung khoa hŏk kmăi kmŏk lơ̆m tơring. Kơ iĕng Kơdră chĕp pơgơ̆r Kuô̆k hô̆i Nguyễn Đức Hải tơbăt:“Tơjê̆ ou, Hơnih chĕp pơgơ̆r đei trong pơtho tơbăt ăn rim tơring ‘noh Kơdră tơm dơnơm kơ dêh char kăl iŏk chĕp pơgơ̆r, pơrô̆ jang hloi. Tơdrong jang kăl hơdăh, đei pơjao jang hơdăh. Bơ̆n pơm lơ liơ pơchoh trong jang ăn khul jang khoa hŏk, trong jang ‘lơ̆ng vă iung jang păng trong jang găh tơmơ̆t jên jang gô jing tơdrong kăl iung jang hơdrol hloh. Lơ loh Lâm Đồng kăl đei hơnih tơm tơplih ‘nao tơchăr kơdih găh tơdrong jang ‘nou dăh mă ưh? Hơnăp jang ‘noh bơ̆n gô chă tơchĕng hơlen, akŏm hơlen mă brĕ vă tơroi tơbăt ăn khul kơdră kơpal”.

Vă hơnơ̆ng tơlĕch jang jơnei rim tơdrong tơchơ̆t ou, Kơ iĕng Kơdră chĕp pơgơ̆r Kuô̆k hô̆i Nguyễn Đức Hải athei dêh char Lâm Đồng kăl lăng kơjăp trong pơrô̆ jang đơ̆ng Trung ương, sơđơ̆ng tôm tong, lăp mĭnh ƀơ̆r đon, hrơ̆p mĭnh ‘măng păng trŏ lăp hăm dôm tơdrong yan ou kơ tơring. Veh ver kơpi iŏk tơdrong tơchơ̆t pơm ăn truh ưh kơ trŏ lăp hăm tơring. Adoi kăl hơtŏk hơnăp jang, pơrô̆ tơlĕch jang kiơ̆, dăr lăng tơdrong bơ̆ jang, sơđơ̆ng tơlĕch jang kiơ̆, tơpăt ‘lơ̆ng, jơnei păng ‘lơ̆ng hơ iă. Ưh kơ lê̆ đei sa pơjĭp, pơm hiong răm, brăh brư ou to.

Jơ ‘năr ou, Kơ iĕng Kơdră chĕp pơgơ̆r Kuô̆k hô̆i Nguyễn Đức Hải hăm Khul bơ̆ jang hlôi năm ngôi, pôk tơmam drăm ăn ƀar ŭnh hnam đei iŏk yua ăn teh đak tơ̆ apŭng Đức Trọng, dêh char Lâm Đồng, athei khul kơdră tơring, rim hơnih jang hơnơ̆ng lăng tông nông gia hloh dơ̆ng tơdrong hơrih sa ăn dôm ŭnh hnam, dôm bơngai đei iŏk yua ăn teh đak lơ̆m dêh char.