Kiơ̆ đơ̆ng rim Kơdră tang măt, đak ‘ngam đei sĭk ‘noh mĭnh lơ̆m dôm tơdrong tơm pơm ăn truh bek plên, ‘nou jing tơmam tơnap mă hơlen băt sik lơ dôm yơ. Bơngai tang măt Nguyễn Kim Thúy, khul Đà Nẵng; Bơngai tang măt Nguyễn Thị Lệ Thủy, khul Bến Tre hơlen: “Tơdrong iŏk yoa đak ‘ngam đei sĭk pơm kơnê̆ truh jơhngơ̆m jăn hăm tơdrong jĭ, hoan pham, jĭ đak ‘nôm kul ... kơ yuơ tơmơ̆t sĭk lơ̆m hơkou jăn lơ dêh hnang. Kơ yuơ lơ loh hơnih jang pơgang apŭng plĕnh teh păng rim khul jang vei lăng năng tông jơhngơ̆m pran hlôi pơkă ăn Khul kơdră chĕp pơgơ̆r teh đak kơ rim teh đak pơlăp kiơ̆ iŏk thuê̆ hăm đak ‘ngam đei sĭk, vă pơchoh trong hơ iă ăn tơdrong joăt răt yoa”.

Rim kơdră tang măt drơ̆ng nơ̆r găh atŏk thuê̆ tĕch hăm tơdrô hơlăk, ƀier vă dă ƀiơ̆ iok yua lơ ƀier hơlăk. Mă lei vă kon pơlei dă ƀiơ̆ răt huch hơlăk, ƀier ưh khan kiơ̆ pơlăp thuê̆ mă lei kăl atŏk phak kơtang, atŭm hăm pơrô̆ pơrôp, pơtho khan, phak jên. Rim kơdră tang măt lăp đon tok thuê̆ kiơ̆ trong tơlech ăn hăm hơlăk, mă lei hăm ƀier kăl hơlen mă hơdăh jơ ‘năr. Bơngai tang măt Hoàng Văn Cường, khul pơlei tơm Hà Nội athei: " Bơ̆n kăl lăng hơlen mă brĕ trong tŏk thuê̆ hăm ƀier.Kiơ̆ kơ ĭnh bơ̆n kăl tŏk lơ, mă lei tơdrong tŏk lơ hloh ‘noh hăm hơlăk kơtang, đơ̆ng rŏng ‘noh tŏ sĕt ƀiơ̆ hăm hơlăk sap ƀiơ̆ tim mă truh 20 đô̆ păng tŏ sĕt hloh dơ̆ng ‘noh hăm ƀier. Ăp lơ loh mă trŏ ƀlep hloh".

Găh tơdrong tơmơ̆t dơ̆ng tơchơt thuê̆ kăl hloh hăm hơ̆t kơret, kiơ̆ đơ̆ng rim kơdră tang măt, kăl tŏk măt thuê̆ hơ̆t kơret. Kơ yuơ chă et hơ̆t pơm ăn 28 tơdrong jĭ. Jô̆ hơlen Việt Nam đei hloh 84.500 ‘nu bơngai lôch kơ yuơ đơ̆ng et hơ̆t păng 18.800 ‘nu bơngai lôch kơ yuơ hơdrip ƀơm ‘nhui đe et hơ̆t. Mă lei athei dăr lăng hơlen mă brĕ, mă kăl đei ƀơm truh tơdrong tĕch mơdro păng hơnih mơdro sa, pơjing rơvơn ăn hơ̆t kơret răt klĕ đơ̆ng teh đak đe. Bơngai tang măt Trịnh Xuân An, khul Đồng Nai athei: "Inh lăng kơjăp ‘noh đei ƀơm truh hăm kon pơlei păng hơnih mơdro sa pơm tơlĕch hơ̆t kơret. Dang ei, rim hơnih mơdro sa vang tơgop lơ̆m kon jên jang teh đak dơ̆ng mă pơđăm, tơdrou, mă lei tơdăh tŏk thuê̆ tĕch răt lơ dêh hnang lei gô pơm ăn truh tơdrong tĕch ôn, pơm kơnê̆ truh tơdrong vei lăng sơđơ̆ng teh đak, sơđơ̆ng tơring. Tơdrong mă ou kăl hơlen mă brĕ trong iung jang lơ liơ mă trŏ lăp, vă kơ bơ̆n jei iŏk đei ăn hơnih mong jên bơ̆ jang teh đak adoi sơđơ̆ng ăn hơnih mơdro sa đei rơvơn bơ̆ jang, adoi hoei pơm kơnê̆ truh kon pơlei choh jang sa păng mă kăl ‘noh veh ver đei tơdrong tĕch răt ôn hơ̆t kơret đơ̆ng teh đak đe".

Pơma dơnuh tơ Hop akŏm, bơngai tang măt Trương Trọng Nghĩa, khul Pơlei tơm Hồ Chí Minh hơlen: "Kơ yuơ kă kiơ ưh sơkơ̆t hơdăh truh sơnăm 2045, 100 sơnăm pơjing teh đak ‘noh Việt Nam gô jing mĭnh teh đak pă đei ‘nhui hơ̆t. Rim teh đak anai đe sư jei tŏk bŏk lăng truh ưh kơ et hơ̆t. Ĭnh lăp đon hăm kăl hơlen mă brĕ, mă lei kiơ̆ kơ ĭnh kăl iung jang mă kơtang găh tơdrong ou păng ‘nĕ chă pơ-‘nhang kơ yuơ hli đe tĕch răt ôn hơt kơret teh đak đe mă bơ̆n pơm ưh kơ hret hăm tơdrong ‘nou".

Tơblang hơdăh tơ̆ hop akom, Kơ iĕng Thủ tướng, Kơdră chĕp pơgơ̆r Hơnih tơm jang Jên hu Hồ Đức Phớc tơƀôh hơdăh tơdrong tơm tơchơ̆t thuê̆ gĭt kăl hăm hơ̆t kơret: "Hơt ‘noh pơm kơnê̆ tôch kơtang, păng bơ̆n măh tơhoach truh 1 ti dolar Mi ăn tơdrong ming hơmet jĭ jăn đei ƀơm truh tơdrong răm đơ̆ng et hơ̆t pơm ăn. Hơt kơret tơ Việt Nam hăm kơjă re hloh đơ̆ng 6.000 truh 20.000 đĕch, dang 7.000 hlak jên găh jên thuê̆ lơ̆m 1 tơpu hơ̆t kơret, lơ̆m mă tơ̆ Singapore ‘noh đei truh 200.000 hlak jên kon jên thuê̆ lơ̆m 1 tơpu hơ̆t. Kơ yuơ lơ loh, tơdrong chă thuê̆ hơ̆t kơret ‘noh kơ yuơ lơ loh văi".

Kơdră chĕp pơgơ̆r pơma hơdăh, Kơdră chĕp pơgơ̆r Hơnih tơm vei lăng jang Pơgang Đào Hồng Lan hlôi lăp đon hăm trong tơlĕch jang păng kăl pơjing trong pơprŏ Khôi luơ̆t Thuê̆ tĕch răt git kăl (hơmet ming), mă kăl pơchoh trong tŏk thuê̆ hăm tơmam drăm pơm kơnê̆ jơhngơ̆m jăn nhen hơ̆t kơret, hơlăk, ƀier păng tơmơ̆t dơ̆ng dôm đak nhă đei sĭk lơ̆m hơnăn kăl vă iŏk thuê̆. Kơdră chep pơgơ̆r hlôi tơƀôh hơdăh dôm tơdrong kăl vă tŏk măt thuê̆ hăm hơ̆t kơret. Kơ yuơ chă et hơ̆t pơm đei truh 28 tơdrong jĭ jăn. Kiơ̆ hơlen, Việt Nam đei hloh 100.000 ‘nu bơngai lôch kơ yuơ đơ̆ng hơ̆t kơret.