Kiơ̆ hla ar tơroi, tơdrong tang găn pơm yoch, pơm glăi luơ̆t hơnơ̆ng đei bơ̆ jang tôch pơneh; akŏm jơhngâm tang găn der deh roi ‘lơ̆ng. Dôm tơdrong hơgăt đơ̆ng Quốc hội pơjao đei jang ‘lơ̆ng, 1,2 tơdrong hơgăt jang đei lơ hlŏh dơ̆ng. Kiơ̆ hla ar chih tơroi đơ̆ng Khul kơdră teh đak găh tơdrong pơm kiơ̆ nơ̆r sek phak, sơnăm 2024 tơdrong pơm kiơ̆ đang păng jên iŏk đei lơ hlŏh đơ̆ng sơ̆ truh dang ei. Tơdrong kon pơlei năm tơ̆ anih sơng kon pơlei kơ dôm anih jang ăn Quốc hội, Khul tang măt Quốc hội jur ƀiơ̆ kơsô̆ hla ar tơkêng, hla ar chih nơ̆r apinh, roi tơbăt đơ̆ng kon pơlei gơih ăn dôm anih jang kơ Quốc hội, tŏk hlŏh 1.000 hlak pơting hăm sơnăm 2023.

 Dôm bơngai tang măt akhan, tơdrong sơng kon pơlei, sek tơlang tơdrong tơkêng đơ̆ng Quốc hội păng bơngai tang măt quốc hội ‘nŏh jĭ tơdrong jang tơm, tơƀôh hơdăh hơnăp jang hăm kon pơlei, hăm bơngai tăh hla kăl đei tơdrong vang jang hơdoi đơ̆ng Trung ương truh tơ̆ tơring. Vă hơtŏk tơdrong đei yoa, athei chih pơjing kơmăy phần mềm vei lăng tơdrong tơkêng, tơhlâu, chô̆ tơmât hơdai hăm kơmăy dôm anih jang vă dăr lăng đĭ đăng tơdrong sek tơlang iŏk đơ̆ng iŏk đei nơ̆r truh sek tơlang đang.