Chĕp pơgơ̆r hop akom, Kơ iĕng Kơdră chĕp pơgơ̆r Kuô̆k hô̆i Nguyễn Thị Thanh pơma hơdăh, Khul kơdră chĕp pơgơ̆r Kuô̆k hô̆i pơma tơbăt jơhngơ̆m đon hôn bơnê kơtang păng pơtruh nơ̆r hmach chơt hơ iă hloh truh hăm rim ƀok thây kô sơnăm ‘lŏ kră, rim kơdră tang măt Kuô̆k hô̆i hlôi păng tŏk bŏk bơ̆ jang lơ̆m tơdrong jang pơtho pơhrăm, atŭm hăm vă jê̆ 1 triu 600.000 ‘nu ƀok thây kô, kang ƀô̆ vei lăng pơtho pơhrăm lơ̆m teh đak .Adoi athei kơdră tang măt Kuô̆k hô̆i lăng kơjăp pơma dơnuh găh rim tơdrong tơlĕch ăn lơ̆m Khôi luơ̆t Ƀok thây kô pơtho.

Pơma truh tơdrong tơchơt kơ khôi luơ̆t găh krao tơmơ̆t jang ăn ƀok thây kô pơtho kơdră tang măt Trần Văn Thức, khul Thanh Hóa, tơdrong tơmơ̆t jang ƀok thây kô lơ̆m rim hnam trương teh đak tŏk bŏk bơ̆ jang kiơ̆ tơdrong tơchơ̆t atŭm lơ̆m krao tơmơ̆t kang ƀô̆ bơ̆ jang, ‘nou jĭ tơdrong ưh kơ lăp pơm ăn truh rơkăh ƀok thây kô tơ̆ mĭnh ƀar tơring, hơnih jang, ưh kơ gơ̆h pơtho mĭnh ƀar tơdrong hok pơhrăm vă tơlĕch jang kiơ̆ trong pơtho pơhrăm sơnăm 2018.“Ĭnh tôch lăp đon păng drơ̆ng kiơ̆ kơtang lơ̆m tơdrong tơmơ̆t jang kơ ƀok thây kô pơtho. Kiơ̆ kơ ‘noh, Hơnih tơm vei lăng Pơtho pơhrăm, Hơnih tơm vei lăng Tơdrong jang-Bơngai rơka păng Tơpôl jĭ hơnih tơm chĕp pơgơ̆r tơ iung pơjing trong jang, trong pơprŏ atŏk tơ iung găh ƀiên chê̆ khul ƀok thây kô pơtho, pơtruh ăn hơnih jang kơpal tơchơ̆t, klăh asong ƀiên chê̆ ƀok thây kô pơtho tơ̆ rim hnam trương teh đak đei hơnih bơ̆ jang kơpal pơjao, rim hơnih bơ̆ jang vei lăng pơtho pơhrăm dăh mă hnam trương pơtho pơhrăm pơm tơm lơ̆m xek hơlen tơmơ̆t jang. ‘Nou jing tơdrong tơchơ̆t tôch gĭt kăl rŏ năng gơ̆h vă hơmet pơ ‘lơ̆ng hloi dôm tơdrong tơnap tap, mă kăl roi năr roi ưh kơ ‘lơ̆ng găh tơdrong, rơkăh, ưh kơ măh ƀok thây kô pơtho đơ̆ng lơ sơnăm kơ ou tơ̆ lơ tơring tơrang.”

Tơgop nơ̆r găh dôm tơdrong tơchơ̆t vei lăng năng tông ƀok thây kô pơtho, bơngai tang măt Nguyễn Văn Cảnh, khul Bình Định pơma tơbăt dôm tơdrong oei đei ƀôh minh ƀar ‘nu mĕ ƀă hŏk tro teh dong ƀok thây kô, hŏk tro jreh koch ƀok thây kô pơm kơnê̆ truh tơdrong oei sa kơ bơngai ƀok thây kô pơtho, pơm kơnê̆ truh tơdrong joăt lui yom, ƀlŏk hơdơ̆r kơ bơngai vei năng tông. Kơdră tang măt athei:“Ĭnh athei Apăng 11 kăl tơmơ̆t dơ̆ng găh tơdrong mĕ ƀă hŏk tro ưh kơ gơ̆h chă pơm hăm rim ƀok thây kô mưh ƀok thây kô pơm hloh tơdrong, mĕ ƀă hŏk tro jei ưh kơ gơ̆h xek tơlang tơdrong tơblĕk dih băl kơtă hăm ƀok thây kô, mă lei kăl ‘moi kiơ̆ hnam trương khul bơngai tang măt ăn mĕ ƀă, hơnih bơ̆ jang teh đak. Apăng 9 Tơchơ̆t găh tơdrong hơnăp jang kơ ƀok thây kô, ĭnh athei hơmet ming jing tơdrong kăl jang păng hơnăp jang kơ ƀok thây kô. Hăm minh ƀar hơnăp jang kơ ƀok thây kô ‘noh kăl tơmơ̆t dơ̆ng găh tơdrong vang iung jang hơdoi hăm mĕ ƀă hŏk tro păng bơngai hŏk. Pơtih gia, mưh ƀôh hŏk tro hŏk ưh kơ gan gơ̆h ‘noh ƀok thây kô chă pơma dơnuh hloi hăm mĕ ƀă đe hŏk tro ‘noh hloi.”

Găh kon jên khei păng kon jên tơgŭm dơ̆ng hăm ƀok thây kô, bơngai tang măt Dương Khắc Mai, Khul Đak Nông pơma tơbăt jơhngơ̆m lăp đon lơ̆m tơdrong tơchơ̆t kon jên khei, vă hơmet pơ ‘lơ̆ng tơnap tap păng trong jang kăl kơ tơdrong bơ̆ jang pơtho pơhrăm. Bơngai tang măt athei tơdrong tơchơ̆t jên khei kăl hơtŏ hăm tơdrong pơtho gơ̆h hơgei kơ ƀok thây kô:“Lơ̆m khei năr ou ki, găh lơ khul ƀok thây kô pơtho chă pơtho hơgei, đei jơhngơ̆m đon tôch kơ ‘lơ̆ng. ‘Ngoăih kơ ‘noh oei đei mĭnh ƀar ‘nu ƀok thây kô truh hloi bơngai kang ƀô̆ vei lăng pơm glăi găh jơhngơ̆m đon bơ̆ jang pơm ăn đei tơdrong glăi măh xek tơlang hloi. Kơ yuơ kă kiơ ĭnh pơma truh tơdrong ‘nou, kơ yuơ năr ou tŏk bŏk bơ̆ jang khôi luơ̆t atŭm hăm jang kiơ̆ trong bơ̆ jang jên hu ‘noh lơ̆m tơdrong jang kiơ̆ khôi luơ̆t kăl đei rim tơdrong tơchơ̆t vă pơm hơtŏk ‘lơ̆ng gơ̆h hơgei kơ khul ƀok thây kô pơtho roi năr roi pơjing đei khul ƀok thây kô pơtho hơgei tơpă găh bơ̆ jang pơtho trŏ lăp tôm tong rim tơdrong tơchơ̆t găh jơhngơ̆m đon ‘lơ̆ng kơ Ƀok thây kô pơtho tơnăp hăm tơdrong bơ̆ jang.”

Iung pơma tơgoăt iŏk dôm nơ̆r tơgop lơ̆m jơ pơma dơnuh đơ̆ng rim bơngai tang măt Kuô̆k hô̆i, Kơdră chĕp pơgơ̆r Hơnih tơm vei lăng Hnam trương pơtho pơhrăm Nguyễn Kim Sơn pơma tơbăt jơhngơ̆m đon hôn bơnê hăm dôm nơ̆r tơgop đơ̆ng rim kơdră tang măt Kuô̆k hô̆i găh trong vă pơjing Khôi luơ̆t Ƀok thây kô pơtho. Ƀok Nguyễn Kim Sơn akhan, hăm tơdrong tơgŭm djru, lăp đon kơtang hlôi đei pơma dơnuh, ‘noh ƀôh hơdăh jơhngơ̆m đon lăp kơtang đơ̆ng rim kơdră tang măt; ‘noh ưh khan lăp tơdrong tơgŭm djru hăm trong vă pơjing Khôi luơ̆t Ƀok thây kô pơtho, mă oei pơm hơdăh hơnăp jang hăm hơnih jang pơtho pơhrăm păng hăm Teh đak.