Hơnih vei lăng kon pơlei dêh char Gia Lai chih tơlĕch Hla bơar tơchơ̆t vă tơlĕch jang kiơ̆ nơ̆r pơrô̆ jang đơ̆ng Khul kơdră teh đak găh xut xa hnam pơgia, hnam hnăt hnot, sơđơ̆ng ăn kon pơlei hơrih sa. Dêh char tơlĕch jang xut xa hloh 3.000 pơbŭng hnam pơgia, hnam hnăt hnot kơ rim bơngai đei iŏk yua ăn kech mang, ŭnh hnam dơnuh păng vă jê̆ dơnuh.  Trong tơlĕch jang, iung jang keh đang hơdrol khei 9 sơnăm 2025. Kiơ̆ đơ̆ng Hơnih vei lăng Tơdrong jang-Bơngai rơka păng Tơpôl Gia Lai, đơ̆ng sơnăm 2021 truh dang ei, dêh char hlôi tơgŭm ming man ‘nao păng ming hơmet ăn 4.365 pơbung hnam hăm akŏp kon jên hloh 234 ti hlak jên. Mă lei, hloh đơ̆ng dăr lăng ‘nao hloh đei ƀôh dêh char oei đei hloh 3.000 ŭnh hnam dơnuh, vă jê̆ dơnuh păng bơngai đei iŏk yua ăn kĕch mang kăl đei tơgŭm ăn ming man ‘nao păng ming hơmet hnam oei. Vă atŏk kơtang tơlĕch jang kiơ̆, Hơnih vei lăng kon pơlei dêh char hlôi pơjao ăn Hơnih vei lăng Tơdrong jang-Bơngai rơka păng Tơpôl dêh char pơm tơm iung jang hơdoi hăm rim hơnih bơ̆ jang đei ƀơm truh pơjing trong vă jang hơdăh, sơđơ̆ng ƀlep bơngai păng veh ver hơgrop ƀar păh rim tơdrong jang. Păng Hơnih vei lăng ming man dêh char pơjing hơdăh 3 kơ loăi hnam trŏ lăp hăm tơdrong joăt joe kơ tơring, trŏ lăp hăm tơdrong ‘lơ̆ng kơjăp păng sơđơ̆ng kon jên tơmơ̆t jang trŏ lăp vă kon pơlei ƀônh rơ̆ih pơm kiơ̆.