Kiơ̆ kơ ‘noh, 24.000 đoàn viên, kŏng nhân jang hơrih sa mơmat tat, iŏk yua tŏ sĕt, đei sar bar đơ̆ng bơ̆jang, jĭ jăn, jĭ dêh ưh kơ gơh hơmet, ƀơm ưh kơ ‘lơ̆ng yua đơ̆ng ‘mi kial hơbŭt, đak lơ̆p, hiong tơdrong jang, tơ jur jơ jang, bơngai jang găh teh đak tơgŭm... đei tơgŭm 1 triệu hlak jên 1 ‘nu.

Grŭp vei lăng bơgai jang pơlei tơm Đà Nẵng oei pơgơ̆r năm ngôi, apĭnh jet gia, asong tơmam ăn bơngai jang ưh kơ brŏk tơ̆ pơlei sơng Têt, bơngai jang hơdrô̆ hơdrăn tơ̆ dôm Khŭl kŏng nhân vei lăng kơdih hơnih hnam oei thuê. Têt sơnăm ‘nâu, Grŭp vei lăng bơngai jang pơlei tơm Đà Nẵng tơgŭm 3.000 vĕ gre păng pơgơ̆r hao gre ưh kơ hoach jên ba khŭl đoàn viên, bơngai jang brŏk tơ̆ pơlei sa Têt. Tơ̆ “Kơchơ Tết Công đoàn - pơyan Puih mak 2026”, Grŭp vei lăng Bơngai jang pơlei tơm gô pơjao 65.000 kơphiê̆u răt tơmam, akŏm kơjă hloh 6,5 ti hlak jên asong ăn đoàn viên, bơngai jang.