Tơlĕch jang “Tơdrong jang Quang Trung”, Quân khu 5 hlôi hơvơn akŏm bơngai jang, tơgŭm man 610 tŏ hnam ‘nao păng pơm hơmet ming 314 tŏ hnam hư răm dêh lơ̆m tơring quân khu. Hơdrô̆ tơ̆ dêh char Đắk Lắk, 331 tŏ hnam hlôi đei tơlĕch jang man ‘nao, lơ̆m noh 96 tŏ hnam pơm đang hrôih păng pơjao lơ̆m ‘măng 1 âu.

Pơma tơ̆ jơ pơm lêh, Trung tướng Lê Ngọc Hải - Yŏng pơgơ̆r Quân khu 5 tơbăt, bơ̆jang kiơ̆ “Tơdrong jang Quang Trung”, ƀô̆ đô̆i hlôi vih hăm kon pơlei hrĕnh hloh, pơm dơ̆ng hnam hrôih hloh, vă kon pơlei sơđơ̆ng oei sa, sơđơ̆ng tơdrong hơrih sa, sơng Têt tôm măh, tơnŏ hiôk hloh. Dôm hnam ‘nao ưh khan lăp hơnih oei, mă oei jing hơnih gơnang jơhngơ̆m đon, tơiung dơ̆ng đon lui vă kon pơlei yak hloh mơmat tat, tơiung dơ̆ng tơdrong hơrih sa đơ̆ng rŏng ‘mi kial hơbŭt pơrăm.

Tơ̆ Khánh Hòa, 'măng pơjao hnam mă ou đei 6 unh hnam lơ̆m phương Đô Vinh, xah Phước Hậu păng xah Tây Khánh Sơn. Vă rim tŏ hnam gơh keh đang trŏ tơlĕch jang, vei sơđơ̆ng 'lơ̆ng, Hơnih tơm Khul linh Kuân khu 5 hlôi pơgơ̆r Hơnih tơm vei lăng Khul linh dêh char Khánh Hòa jang atŭm kơjăp hăm Tơring 4 Khul linh Duk, Khul linh Đăk kŏng tơ̆ đak 5 păng khul vei sơđơ̆ng tơpôl tơ̆ tơring, găn hloh tŏ 'mi kial ưh sơđơ̆ng, ming man hloi măng năr, jô̆ hloi hăm năr pơdơh.

Lơ̆m noh, Hơnih tơm vei lăng khul linh dêh char Khánh Hòa, Tơring 4 Khul linh Duk păng Khul linh Đăk kŏng tơ̆ đak 5, rim hơnih linh kơtă vang ming man 2 tŏ hnam. Pơma ah lêh pơjao hnam, Thiếu tướng Trần Thanh Hải, Phŏ Kơdră khul linh Kuân khu 5 sơkơ̆t hơdah “Tơdrong jang Quang Trung” jĭ tơdrong bơ̆ng pang kăp gĭt ăn đon bơnôh tơgŭm dih băl, đon bơnôh 'lơ̆ng kơ kon pơlei Việt Nam lơ̆m khei năr tơnap tap; tơƀôh hơdah trong pơm jang “Tơ̆ yơ Kon pơlei ƀơm tơnap tap, tơ̆ noh đei ƀô đô̆i”.