Dôm năr ou, tơ̆ hơnih ming man hnam ‘nao thôn Phú Phong, tơring Hoà Thịnh, tơdrong jang jĭ tŏk bŏk mơduk mơdăk đơ̆ng hrôih truh gơmăng. Rim ƀô̆ đô̆i hơnhŭl hơnhăr pơ uh pơ ang vang chă man, chă hrau chuơ̆h ximăng vang ming man hnam tơgŭm ăn kon pơlei. Hạ sĩ Thái Tiến Tài, Tiểu đoàn 35, Lữ đoàn Đặc công 198 tơbăt, mĭnh năr chă lăng dôm pơbŭng hnam roi vă keh đang, ‘nhŏng oh lơ̆m hơnih bu bu jei chơt hơ iă ‘nă hal:“Ba jĭ tôch hơ iă kơ yuơ đei vang iung jang tơgŭm ăn kon pơlei lơ̆m tơring ‘mi kial hơbŭt hơbông pơrăm tơ̆ ou.Mưh năm truh tơ̆ ou, lăng ƀôh tơdrong hơrih sa kơ kon pơlei tôch tơnap tap, dôm pơbŭng hnam hơlih pơchăh pơchek lơ lou. Truh đơ̆ng rŏng lăng ƀôh dôm tơdrong jang iŏk đei jơnei lơ lou, ba chơt hơ iă ‘nă hal tơpă mơ̆n.”

Hăm kon pơlei thôn Phú Phong, tơring Hoà Thịnh, tơdrong ƀôh kang bang kơl đơ̆ng ƀô̆ đô̆i dôm năr ou ki jĭ hơnih gơnang kơjăp tôch tih tên. Yă Nguyễn Thị Tám (80 sơnăm), chhưu jơ hngơ̆m kơ yuơ ‘nao mĭnh ƀar năr ou ki nông nôt ƀơ̆t hơnih hnam hơlih pơchăh pơchek, dang ei hlôi hơmet ăn vă mơ̆t oei lơ̆m hnam ‘nao:“Lơ̆m mă ‘nao đei ‘mi kial đak hơbông lip lĕch lăng mơmat tơpă mơ̆n, pă ngêh ba đei dơ̆ng pơbŭng hnam lơ lou. Păng dang ei đei hnam lơ lou jĭ pă gơh vă pơma yă kiơ bơih, hnam kơjăp ‘lơ̆ng đơ̆ng ƀô̆ đô̆i ming man keh đang tĕnh koăng. Dang ei bu bu năm tơ̆ ou jei hôn ‘lơ̆ng ngăl.”

Iung jang hloi pơrô̆ jang tơ̆ hơnih ming man hloi, Thiếu tá Nguyễn Văn Vượng, Tiểu đoàn 35, Lữ đoàn Đặc công 198 tơroi tơbăt, tơring mă hơnih iung jang đei ‘mi hơnơ̆ng kơtĕch kơ khei hloi. Lơ̆m mă noh trong koeng iĕ, tơnap mă chơ pơdŭ bơ̆n tơmam ming man. Pơđĭ lơ̆m pơlei iĕ tŏk bŏk kơdơ chŭn, trong nơnăm mơmat tat, ƀô̆ đô̆i măh jur hlŭt, tung rim ƀi xi măng, tablô vă ming man. Mă lei hăm jơhngơ̆m kơrŭn đĭ ai,  mă đơ̆ng kơ ‘năr dăh mă gơmăng, hơdrin yak hloh tơnap tap, kang bô̆, ƀô̆ đô̆i hlôi tơgĕch lơ jơ ‘năr hơlăng vă iung jang tĕnh koăng.“Lơ̆m jơ ‘năr tơgŭm ăn kon pơlei tơ̆ ou ‘noh nhôn kơrŭn đĭ ai, ưh kơ mơ̆ng bri tơ̆ gơmăng dăh mă tŏ ‘mi kial, tơ̆ ou ‘năr tŏ tôch hlơ hlĕng. Mă lei hăm hơdrin đĭ ai, kang ƀô̆, ƀô̆ đô̆i nhôn tơgoăt pôm nơ̆r ƀơ̆r đon, ‘mêm kơ eng dih băl, pơtho khan dih băl lơ̆m jơ ‘năr jang păng jang keh đang lơ̆m khei ‘năr hrôih hloh.”   

Truh dang ei, tơdrong jang “ ‘Măng iung jang Quang Trung” ming man hnam ăn kon pơlei tơring ‘mi kial đak hơbông Dak Lăk tŏk bŏk yak mơ̆t lơ̆m jăl hơtuch. Hăm Lữ đoàn Đặc công 198, hlôi đei 5 pơbŭng nam keh đang. Dôm hnam uơ oei gô đei pơjao lơ̆m mĭnh ƀar năr kơnh, hơdrol jơ ‘năr tơchơ̆t năr 15/1/2026 mă Thủ tướng Teh đak pơjao ăn. Atŭm hăm ‘noh, vă tơgŭm ăn kon pơlei sơđơ̆ng hơrih sa, hơnih jang hlôi hơmet ăn nhen lĕ vă tôm tong rim tơmam drăm yoa kăl nhen ti vi, kơƀang tang dŏ, giơng, hơnhan gŏ, khăn, tơam drăm sa kăl vă pôk ăn rim ŭnh hnam mưh hnam keh đang. Thượng tá Phạm Sỹ Cương, Kơ iĕng Kơdră chĕp pơgơ̆r bơ̆ jang Đảng Lữ đoàn Đặc công 198 tơroi tơbăt:“Nhôn hơdrin đơ̆ng blŭng hloi ‘noh gô jang keh đang hrôih jơ ‘năr pơkă, đĭ đăng pơbŭng hnam mă nhôn ming man ‘noh truh năr 9/1 gô keh đang, pơjao ăn Kon pơlei. Đơ̆ng noh, tơgŭm ăn kon pơlei đei sa Têt Bính ngọ tơpă chơt hơ iă ‘nă hal.”

Têt Nguyên đán 2026 tŏk bŏk vă truh, thôn Phú Phong, tơring Hòa Thịnh, dêh char Dak Lăk tŏk bŏk pơjing đei tơplih ‘nao. Tơ̆ hơnih teh đei ‘măng hơgôn hơgan bơ̆n ‘long, tablô pơchăh đơ̆ng rŏng ‘mi kial hơbŭt hơbông đak lip kơtang hloh lơ̆m hơtuch khei 11/2025, dôm pơbŭng hnam ‘nao kơjăp ‘lơ̆ng hlôi păng tŏk bŏk vă keh đang. Tơ̆ ou đei gru gra ‘lơ̆ng rŏ đơ̆ng khul ƀô̆ đô̆i đặc công 198, tŏk bŏk kơrŭn đĭ ai prăt jơ ‘năr vă Kon pơlei hrôih đei tơdrong hơrih sa sơđơ̆ng.

Dôm pơbŭng hnam ‘nao ưh khan lăp ming man hăm tơmo, tablô, ximăng, mă oei ming man hăm đak pơ uh pơ ang hăm jơhngơ̆m đon ‘mêm kơ eng dih băl đơ̆ng ƀô̆ đô̆i hăm kon pơlei. Tơdrong Lữ đoàn Đặc công 198 (Binh chủng Đặc công- Hơnih tơm Ƀô̆ đô̆i vei lăng sơlam teh đak” kơrŭn đĭ ai keh đang hrôih “ ‘Măng iung jang Quang Trung” mĭnh măng dơ̆ng sơkơ̆t hơdăh jơhngơ̆m đon ‘lơ̆ng kơ Ƀô̆ đô̆i Ƀok Hô - ling lang ƀôh kang bang kơ̆l mưh dang yơ kon pơlei vă, kơrŭn đĭ ai yak hloh tơdrong tơnap tap hrat hrĭn kơ yuơ tơdrong hơrih sa sơđơ̆ng dơ̆ng kơ jăp kơ kon pơlei.