Hnam đei man ‘nŏh jĭ hnam mă blŭng găh tơdrong jang 214 sut pơđĭ hnam hiăh hiok yoa Kơdră chĕp kơ̆l Đảng dêh char păng Anih vei lăng kon pơlei dêh char Đắk Lắk pơjao ăn Công an dêh char pơgơ̆r. Hnam man tơgŭm ăn unh hnam ƀok Y Thăn Ksơr, tơ̆ plei Kmiên, xăh Ea Drông.

Mŏ H’En Niê, kon drŏ kăn ƀok Y Thăn pơma: “Ƀă inh jĭ jăn păn hnong hơnơ̆ng lơ̆m 8 sơnăm ‘nâu, mĕ inh athei oei tơ̆ hnam vă vei lăng ƀă. Klo kăn măr nhi jang chŭn ngăl, chă jang jăi kơđe, đe krao jang kiơ jang ‘nei chă kon jên vă arih xa rim năr. Hnam so đĭ hiăh hiok bơih, dang ei đei tơgŭm man ‘nao, mă đơ̆ng iĕ ră mă lei tôch kăp gĭt, đei anih oei hiôk hơđơ̆ng mă đơ̆ng tŏ ‘mi kial pă hli kơna nhôn tôch hơiă.”

Tơdrong jang 214 mă dêh char Đắk Lắk pơjao ăn Công an dêh char bơ̆ jang, vă man 4.285 tŏ hnam hăm kơsô̆ jên hlŏh 342 ti hak jên; jên tơgŭm ăn 1 pôm hnam ‘nŏh 80 triu. 3 tơdrong jang nai dơ̆ng vă man 1.120 tŏ hnam lơ̆m sơnăm 2025.