Đơ̆ng sơnăm 2022 truh dang ei, pơlei tơm Pleiku hlôi pơih đei 5 lăm sut ưh kơ gơh chư ăn kon pơlei kon kông hăm jê̆ 100 bơngai hŏk tơ̆ dôm xah Biển Hồ, Chư Á, Gào păng phương Chi Lăng. Hơdah nhen lăm hŏk sut ưh kơ gơh chư tơ̆ hnam trưng Jăl kơđeh Lê Lai xah Chư Á, đei hloh 30 'nu kon pơlei tơ̆ pơlei Bông Phun păng Mơ Nú .

Lăm hŏk hlôi hŏk đơ̆ng 'năr Mônh truh 'năr Pơđăm rim giĕng, dang ei vă jê̆ đang bơih. Kơchĕng rim bơngai hŏk gô đei iŏk chư̆ng chi ah blŭng sơnăm 2025. Pơmai H'Then, 30 sơnăm, tơ̆ pơlei Mơ Nú, xah Chư Á năm hŏk lăm âu ƀrơ̆k kơ jơhngơ̆m tơroi:

 "Hơdrol sơ̆ tam mă gơh kơ chư, lĕch tơ̆ 'nguaih pơlei noh pơngơ̆t kơ đon, kơdơ̆ mơlâu kơlih kơdih ưh gơh kơ chư noh tơnap tap dêh. Năm hŏk gơh chư, băt pơre băt chih pă đei kơdơ̆ mơlou bơih ƀơ̆t chă năm tơ̆ trong”

Ƀok Nguyễn Đình Thức, Kơdră Anih jang Pơtho Pơhrăm pơlei tơm Pleiku, dêh char Gia Lai ăn tơbăt, dôm lăm hŏk sut ưh gơh chư hlôi tơgŭm ăn bơngai hŏk băt pơre, băt chih chư, băt chă jô̆ hơlen păng tơrĕk hăm dôm tơdrong hlôh vao kăp gĭt gah cham char, tơpôl vă tơmơ̆t lơ̆m tơdrong hơrih jang xa:   

“Anih pơtho pơhrăm hlôi asong khul jang năm hơlen tơ̆ rim hnam trưng gah tơdrong hŏk pơhrăm dôm môn Toan, Nơ̆r Việt đei phep jô̆; mơ̆ng kơtă bơngai hŏk pơre, bơngai pơtho pơre ăn bơngai hŏk chih ƀai; đang kơ noh bơngai hŏk iung tơroi gah đon tơchĕng po đơ̆ng hơdrol păng đơ̆ng rŏng kơ năm hŏk noh thoi yơ. Đơ̆ng noh hơkŏm băt bơngai hŏk đei yă kiơ kiơ̆ tơchơ̆t tơlĕch, tơdrong hơpơi 'meh đe yĕt, noh chơt hơ-iă kơlih băt chă pơre, băt chih chư vă đơ̆ng noh hiôk hian hloh ăn tơdrong hơrih xa”

Hăm tơring sơlam teh nhen apŭng Đức Cơ, Gia Lai, jăl sơnăm 2022 -2025, apŭng pơih 20 lăm sut lê̆ ưh kơ gơh chư hăm hloh 600 bơngai hŏk. Tơ̆ lăm hŏk kơ tơring sơlam, rim bơngai pơtho hlôi găn hloh lơ tơdrong tơnap tap vă tơgŭm ăn bơngai hŏk. Ƀok Lê Phú Huy, Phŏ Kơdră Anih Pơtho Pơhrăm apŭng Đức Cơ ăn tơbăt dơ̆ng:

“Đơ̆ng lăm hŏk sut ưh kơ gơh chư adoi đei jơnei tơnăp, lơ tơdrong 'lơ̆ng kăp gĭt vă hơtŏk kơsô̆ bơngai gơh chư lơ̆m sơnăm đơ̆ng 15 truh 60 vă pơm trong hiôk ăn kon pơlei kon kông hơtŏk tơdrong hlôh vao. Anih jang hlôi pơgơ̆r bơngai pơtho tơplih trong chă pơtho mă trŏ hăm bơngai 'lŏ sơnăm. Chih akŏm hla bar hŏk, dôm tơmam yua pơtho pơhrăm mă trŏ hăm tơdrong pơm jang adoi nhen tơdrong hơtŏk mŭk drăm tơpôl kơ kon pơlei, tơguăt sơnong jang đơ̆ng kang ƀô̆ jang kơpal, bơngai pơtho lơ̆m tơdrong hơvơn bơngai hŏk năm hŏk tơ̆ lăm kơ rim thôn pơlei”

Mă kăl, tơdrong jang sut lê̆ ưh kơ gơh chư oei đei tơdrong vang jang đơ̆ng khul linh vei sơlam teh Gia Lai. Tơ̆ tơring kon pơlei Suối Khôn, xah Ia Mơ, apŭng Chư Prông, tơring đei 70 'nu bơngai ưh kơ gơh chư, Kơđông linh vei sơlam teh Ia Lốp hlôi pơih đei 2 lăm hŏk đơ̆ng hơnê̆ sơnăm 2023 truh dang ei. Đại úy Nguyễn Văn Luân, Kơdră Khul chă Hơvơn kon pơlei, lơ̆m Kơđông linh vei sơlam teh Ia Lốp ăn tơbăt.

“Ah mă pơih lăm pơhrăm đei lơ mĕ ƀă đei kon hơ-ioh adoi kiơ̆ mĕ ƀă năm hŏk. Vă sơđơ̆ng lăm hŏk păng đei jơnei tơnăp hloh noh nhôn asong dôm anih pơchơt vă đe oh vang akŏm pơsuh pơchơt, lơ̆m lăm mĕ ƀă đe hơ-ioh akŏm hŏk pơhrăm sơđơ̆ng hloh”.

Kiơ̆ Anih Pơtho Pơhrăm Gia Lai, jơ̆p dêh char đei pơhlom 60 rơbâu 'nu bơngai ưh kơ gơh chư lơ̆m sơnăm đơ̆ng 15-60, đei 5,6% kơsô̆ măt kon pơlei, mă tơm noh đe drăkăn kon kông. Pơtêng hăm jơ̆p teh đak, Gia Lai đei  kơsô̆ bơngai ưh kơ gơh chư lơ. Pơm kiơ̆ Tơchơ̆t jang kơ teh đak gah hơtŏk mŭk drăm – tơpôl tơring kon pơlei kon kông păng groi kông jăl sơnăm 2021 -2025, Gia Lai hlôi pơih đei 735 lăm sut lê̆ ưh kơ gơh chư ăn jê̆ 23,5 rơbâu bơngai. Ƀok Lê Duy Định, Kơdră Anih Pơtho Pơhrăm dêh char Gia Lai tơroi, dang ei jơ̆p dêh char đei 15/17 anih lơ̆m apŭng đei jơnei tơchơ̆t sut lê̆ ưh kơ gơh chư ah pơkăp 2, đei jơnei tơchơ̆t jang jăl 1 gah sut lê̆ ưh kơ gơh chư kiơ̆ Tơdrong jang “Pơjing tơpôl hŏk pơhrăm jăl sơnăm 2021-2030” kơ dêh char:

“Kiơ̆ tơdrong jang pơtho sut lê̆ ưh kơ gơh chư ăn kon pơlei kon kông đơ̆ng 15 sơnăm tŏk tơ̆ kơpal, mă tơpă tơdrong jang pơyua lơ ăn kon pơlei. Lơ̆m khei năr truh, Anih Pơtho Pơhrăm pơtoi pơgơ̆r rim anih pơtho pơhrăm tơ̆ tơring ah pơm kiơ̆ tơchơ̆t sut lê̆ ưh kơ gơh chư athei hơbĕch hloh vă pơm trong ƀônh hiôk tơgŭm ăn kon pơlei năm hŏk tôm păng tơnăp”

Hăm tơdrong hơdrin kơ-'nôh đơ̆ng dôm jăl pơgơ̆r tơ̆ tơring, bơngai pơtho, hăm tơdrong tơgŭm đơ̆ng khul linh vei sơlam teh, dêh char Gia Lai tŏk bŏk pơkăp khŏm mă jang đei jơnei tơdrong sut lê̆ ưh kơ gơh chư, tơgop hơtŏk pơ-'lơ̆ng tơdrong hơrih, hŏk pơhrăm kơ kon pơlei, hơtŏk mŭk drăm tơpôl, mă kăl noh lơ̆m tơring kon pơlei kon kông.