Đunh kơ ou 60 sơnăm, năr 15/4/1965, Hơnih tơm Chĕp pơgơ̆r Kŏng ang kon pơlei iung tơblăh (dang ei ‘noh Hơnih tơm chĕp pơgơ̆r Ƀô̆ đô̆i vei lăng sơlam teh đak) hlôi ăn mĭnh ƀar ‘nu kang ƀô̆ nuih mơng gơh hơgei đơ̆ng rim dêh char găh Tu mơ̆t bơ̆ jang tơgŭm djru ăn Gia Lai. Truh khei 7 sơnăm ‘noh mơ̆n, Khul vei lăng sơđơ̆ng Gia Lai đei pơjing tôm pơ đĭ 3 kâp, tơlĕch iung jang jơnei rim tơdrong jang pơlôch chư̆ kơnê̆, vei lăng kon pơlei, iŏk đei pơm tơm kơdih. Lơ̆m prăt 10 sơnăm, hơdrol năr rơngei tơring Pơbăh, khul ou hlôi vang iung tơblăh kơhrĕng ‘măng tơblăh vang tih iĕ, pơlôch păng pơm rơka kơ hrĕng linh ayăt, tơgop atŭm hăm ƀô̆ đô̆i kon pơlei lơ̆m teh đak pơjing đei teh đak rơngei keh kong.

Đơ̆ng rŏng sơnăm 1975, khul Ƀô̆ đô̆i vei lăng sơlam teh đak dêh char Gia Lai hơnơ̆ng nuih mơng pran kơtang vei lăng năng tông pơm tơngla sơlam teh đak, mă kăl ‘noh dôm tơdrong tơgop lơ̆m ‘măng iung tơblăh tang găn khul lĭnh Khmer Ƀrê. Hrei ou, khul Ƀô̆ đô̆i vei lăng sơlam teh đak dêh char tŏk bŏk vei lăng hloh 80km trong sơlam teh đak hơdrar hăm dêh char Rattanakiri (Campuchia), lơ̆m tơring đei 7 tơring găh 3 apŭng sơlam teh đak. Lơ̆m khei ‘năr mơmat tat, kang ƀô̆, ƀô̆ đô̆i khul Ƀô̆ đô̆i vei lăng sơlam teh đak dêh char Gia Lai oei iung jang keh đang tơdrong jang “hơgrop”: mĭnh păh vei lăng sơđơ̆ng sơlam teh đak, mĭnh păh kơrŭn đĭ ai atŏk tơ iung mŭk drăm-tơpôl tơ̆ tơring.

‘Moi kiơ̆ lơ tơdrong jang ‘mêm mơnat nhen “ba oh năm tơ̆ hnam trương”, “Pơbŭng hnam tơnŏ ăn bơngai dơnuh tơ̆ tơring sơlam teh đak”, “Rơmo yŏng ăn bơngai dơnuh”… khul Ƀô̆ đô̆i vei lăng sơlam teh đak hlôi tơgop hơmet pơ ‘lơ̆ng tơdrong hơrih sa jang sa kơ kon pơlei, tơ iung pơjing tơdrong jang đĭ đăng kon pơlei vang vei lăng sơlam teh đak pran kơjăp iăp kơtang, hơmet pơ ‘lơ̆ng jơhngơ̆m đon lui yom dih băl ƀar păh ƀô̆ đô̆i hăm kon pơlei tơring sơlam teh đak.

Ƀlep lơ̆m jơ ‘năr ou, Khul kơdră chĕp pơgơ̆r khul Ƀô̆ đô̆i vei lăng sơlam teh đak dêh char Gia Lai sơng iŏk đei Mê đai Vei lăng năng tông teh đak dơ̆ng mă Ƀar đơ̆ng Kơdră chĕp pơgơ̆r Teh đak pôk ăn kơ yuơ hlôi tơgop tih tên lơ̆m vei lăng năng tông tơdrong pơm tơm kơdih, sơđơ̆ng tơring sơlam Teh đak. Kơdră chĕp pơgơ̆r dêh char jei pôk ăn Hla bơar hôn bơnê ăn 6 khul păng 9 ‘nu bơngai jang ‘lơ̆ng tơgop tih tên lơ̆m vei lăng sơlam teh đak. Thượng tá Ngôn Ngọc Cương, Kơdră chĕp pơgơ̆r Kơđông Ia Puch, apŭng Chư̆ Prông-mĭnh lơ̆m dôm bơngai sơng iŏk đei Hla bơar hôn bơnê pơma:“Kơdih ba tôch chơt hơ iă đei Hơnih vei lăng kon pơlei dêh char pôk ăn hla bơar hôn bơnê ƀlep lơ̆m jơ ‘năr tơbăt 60 sơnăm. Khei năr kơnh ba gô atŭm hăm khul, kơdră chĕp pơgơ̆r Đảng Hơnih chĕp pơgơ̆r kơđông akŏm chĕp pơgơ̆r, pơrô̆ hơnih jang iung jang keh đang ‘lơ̆ng tơdrong jang vei lăng năng tông sơlam teh đak. Hơdrin đĭ ai akŏm chĕp pơgơ̆r, pơrô̆ athei kang ƀô̆, ƀô̆ đô̆i tŏk kơtang rim tơdrong jang năm pơtrui vei lăng sơlam teh đak. Pơrô̆ pơtho tơbatw ăn kon pơlei jang kiơ̆ ‘lơ̆ng trong bơ̆ jang đơ̆ng Đảng, Khôi luơ̆t Teh đak”.

Iung pơma tơ̆ pơm lêh, Thiếu tướng Nguyễn Đức Mạnh, Kơ iĕng Kơdră chĕp pơgơ̆r Ƀô̆ đô̆i vei lăng sơlam teh đak hôn bơnê păng hmach chơt hơ iă dôm tơdrong jơnei mă rim jơhnơr kang ƀô̆, ƀô̆ đô̆i kơ Khul ƀô̆ đô̆i vei lăng sơlam teh đak dêh char Gia Lai hlôi iŏk đei lơ̆m 60 sơnăm tơ iung pơjing, iung tơblăh păng atŏk tơ iung. Ƀok sơkơ̆t hơdăh, ‘moi kiơ̆ chăl sơnăm, Khul ƀô̆ đô̆i vei lăng sơlam teh đak dêh char ling lang hơmet pơ ‘lơ̆ng trong chĕp pơgơ̆r, tơ iung pơjing kơđông pran kơjăp iăp kơtang, pơm hơtŏk pran kơtang kơ khul kang ƀô̆ vă trŏ lăp hăm tơdrong jang hle.

Tơ̆ jơ pơm lêh, ƀok Hồ Văn Niên, Kơdră jang lơ̆m Trung ương Đảng, Bí thư Đảng dêh char Gia Lai iung pơma hôn bơnê kơtang hơnăp jang kơ Khul ƀô̆ đô̆i vei lăng sơlam teh đak lơ̆m ‘măng iung tơblăh păng tơ iung pơjing, vei lăng sơlam teh đak tơring Tây Nguyên. Sơkơ̆t hơdăh Khul ƀô̆ đô̆i vei lăng sơlam teh đak dêh char Gia Lai hlôi iung jang kiơ̆ ‘lơ̆ng hơnăp jang kăl lơ̆m vei lăng năng tông tơdrong pơm tơm kơdih, vei lăng sơđơ̆ng tơring sơlam kơ teh đak, vei kơjăp sơđơ̆ng dơ̆ng kơjăp kơ tơring sơlam, tơgop lơ̆m atŏk tơ iung mŭk drăm-tơpôl kơ rim tơring atăih yăih.

Bí thư Đảng dêh char Gia Lai athei lơ̆m khei năr kơnh, Đang uy, Khul kơdră chĕp pơgơ̆r Khul ƀô̆ đô̆i vei lăng sơlam teh đak dêh char hơnơ̆ng iung jang hơdoi kơjăp hăm rim hơnih bơ̆ jang, tơring kơ dêh char păng khul lĭnh vei lăng sơlam teh đak Campuchia tơlĕch jang rim trong jang tơ iung pơjing trong sơlam teh đak rơngei hiôk hian, tơgoăt tơgoăl, jang hơdoi, atŏk tơ iung kơjăp ‘lơ̆ng; atŏk kơtang bơ̆ jang pơrô̆ pơrôp, pơtho tơbăt, pơm hơtŏk jơhngơ̆m đon hlôh vao kơ kang ƀô̆, đang viên păng kon pơlei găh vei lăng tơdrong pơm tơm sơlam teh đak păng hơnih dơ̆ng, hơnăp jang kơ Khul ƀô̆ đô̆i vei lăng sơlam teh đak lơ̆m chăl hle.