Iung pơma tơlĕch jang kiơ̆ jơhngơ̆m đon tơplih ‘nao trong jang tơ iung pơjing khôi luơ̆t tơklep hăm jang kiơ̆ khôi luơ̆t, Kơdră chĕp pơgơ̆r Kuô̆k hô̆i Trần Thanh Mẫn hôn bơnê kơtang rim hơnih bơ̆ jang kơ Khul kơdră Teh đak, kơ Kuôk hô̆i păng rim hơnih bơ̆ jang ƀơm truh hlôi tĕnh koăng hơmet ăn, tơgŭm khul kơdră Teh đak iung jang hơdoi hăm Hơnih bơ̆ jang Khul kơdră Kuô̆k hô̆i tơtom pơgơ̆r Hop akom tơlĕch jang kiơ̆ rim khôi luơ̆t, tơdrong tơchơ̆t đei Kuô̆k hô̆i pơdrơ̆ng kiơ̆ tơ̆ ‘măng Hop akom mă 8 Kuô̆k hôi jăl XV, vă hrôih tơlĕch jang kiơ̆ rim khôi luơ̆t, tơdrong tơchơ̆t đei Kuô̆k hô̆i pơdrơ̆ng. Kơdră chĕp pơgơ̆r Kuô̆k hô̆i Trần Thanh Mẫn pơma hơdăh:"Hơnih bơ̆ jang Khul kơdră Kuô̆k hô̆i hôn bơnê kơtang Thủ tướng Teh đak hlôi tĕnh koăng đei Tơdrong tơchơ̆t pơjing hơnăn păng pơjao ăn hơnih bơ̆ jang chih tơlĕch tơdrong tơchơ̆t hơdăh hăm đĭ đăng khôi luơ̆t, tơdrong tơchơ̆t đei Kuô̆k hô̆i pơdrơ̆ng kiơ̆ tơ̆ ‘Măng hop akŏm mă 8. Kơ yuơ đei lơ tơdrong, hla bơar tơchơ̆t ơdăh kăl pơjing tôch kơ lơ, hơdrô̆ hăm 18 khôi luơ̆t, Khul kơdră teh đak, rim Hơnih tơm kăl pơjing đei 127 hla bơar tơchơ̆t, mĭnh ƀar khôi luơ̆t, tơdrong tơchơ̆t đei tơlĕch jang kiơ̆ hloi đơ̆ng blŭng sơnăm 2025, athei rim Hơnih tơm, hơnih bơ̆ jang đei pơjao chih tơlĕch kăl hơlen kiơ̆ ƀlep Tơdrong tơchơ̆t đơ̆ng Thủ tướng Teh đak, akŏm pơrô̆ vă tơ iung pơjing, tơlĕch jang kiơ̆ trŏ ƀlep, ‘lơ̆ng liĕm”.

‘Măng hop akom mă 8, Kuô̆k hô̆i jăl XV hlôi pơdrơ̆ng kiơ̆ tôch kơ lơ khôi luơ̆t, tơdrong tơchơ̆t đei 18 khôi luơ̆t, 4 tơdrong tơchơ̆t khôi luơ̆t păng 17 tơdrong tơchơ̆t chĕp pơgơ̆r jang mŭk drăm, tơpôl hăm drơ̆ng mĭnh nơ̆r kơtang đơ̆ng rim kơdră tang măt Kuô̆k hô̆i. Lơ̆m ou, khôi luơ̆t, tơdrong tơchơ̆t đei ƀơm truh rim tơdrong kăl kơ hơrih sa tơpôl nhen: Tơmơ̆t jên jang; kon jên hu, kon jên jang teh đak, thuê̆, tơdrong hơrih sa tơpôl; vei lăng sơđơ̆ng Teh đak, sơđơ̆ng tơring. Kiơ̆ đơ̆ng Thủ tướng Phạm Minh Chính, dôm tơdrong iŏk đei jơnei ‘noh hlôi tơbăt hơdăh kơrŭn đĭ ai, hơdrin kơtang, iung jang kơtang đơ̆ng Kuô̆k hô̆i, Khul kơdră Teh đak, rim hơnih bơ̆ jang, khul jang đei ƀơm truh lơ̆m bơ̆ jang tơ iung pơjing keh đang tơdrong tơchơ̆t, tơdrong vang jang đơ̆ng kon pơlei, bơngai tăh hla, hơnih mơdro sa; hơnơ̆ng sơkơ̆t hơdăh tơdrong vang jang hơdoi roi năr roi jơnei, kơjăp ƀar păh Kuô̆k hô̆i, Khul kơdră Teh đak."Yan ou ƀôh hơdăh khei năr ou ki rim trong tơlĕch jang teh đak roi năr roi trŏ lăp hăm tơdrong hơrih sa păng tơlĕch jang kiơ̆ jơnei ling lang jĭ mĭnh tơdrong long tih tên. Lăp đơ̆ng rŏng ‘măng hop akŏm pơtôch nhôn hlôi pơjing hloi trong pơprŏ jang păng ou ki hlôi đei trong pơrô̆ vă hơmet ăn ‘măng hop akom truh ou kơnh. Truh ou kơnh, lơ tơdrong jang kăl vă pơtruh ăn Kuô̆k hô̆i nhôn hlôi hơmet đang bơih, pơtih gia nhen: Khôi luơ̆t hơnih jang Khul kơdră Teh đak, Khôi luơ̆t khul kơdră chĕp pơgơ̆r tơring, Khôi luơ̆t pơjing tơlĕch jang kiơ̆ rim hla bơar tơchơ̆t khôi luơ̆t, ‘nou jĭ dôm khôi luơ̆t tôch gĭt kăl vă bơ̆n tơlĕch jang kiơ̆ hloi lơ̆m khei năr truh ou kơnh."

Thủ tướng Phạm Minh Chính tơbăt, tơdrong iung jang lơ̆m khei năr ou kơnh ‘noh tôch kơ lơ, Khul Kơdră Teh đak, Thủ tướng Teh đak, rim hơnih bơ̆ jang đei tơdrong jang pơjing 130 hla bơar hăm 569 tơdrong pơjao jang sơkơ̆t tôch hơdăh. Tơdrong tơlĕch jang kiơ̆ rim khôi luơ̆t, tơdrong tơchơ̆t đei Kuô̆k hô̆i pơdrơ̆ng kiơ̆ tơ̆ ‘Măng hop akŏm mă 8 Kuô̆k hô̆i jăl XV kăl iung jang mă brĕ, kơrŭn đĭ ai đơ̆ng rim hơnih tơm, hơnih bơ̆ jang, tơring tơrang.

Găh pơm hơtŏk bơ̆ jang hơdoi lơ̆m tơlĕch jang kiơ̆ khôi luơ̆t, Thủ tướng athei: Rim hơnih bơ̆ jang kơ Kuô̆k hô̆i, kơdră tang măt Kuô̆k hô̆i hơnơ̆ng iung jang hơdoi kơjăp hăm Khul kơdră Teh đak, Hơnih tơm, Hơnih bơ̆ jang đơ̆ng blŭng jăl jang lơ̆m bơ̆ jang tơ iung pơjing khôi luơ̆t, sơđơ̆ng ăn tơdrong trŏ lăp kơ rim tơdrong tơchơ̆t lơ̆m rim trong vă pơjing khôi luơ̆t, Tơdrong tơchơ̆t, pơjing rơvơn ăn tơlĕch jang kiơ̆ lăp đơ̆ng rŏng đei pơdrơ̆ng kiơ̆. Thủ tướng Phạm Minh Chính pơma hơdăh:“Đảng hlôi pơrô̆, Khul kơdră Teh đak hlôi drơ̆ng mĭnh nơ̆r, Kuô̆k hô̆i lăp đon, kon pơlei tơgŭm djru, Teh đak gô chang, bơ̆n dăh vang iung jang hrôih hơnhăk rim khôi luơ̆t, tơdrong tơchơ̆t tơmơ̆t jang kiơ̆ lơ̆m hơrih sa hloi, trŏ lăp hăm tơdrong hơpơi ‘meh vă đơ̆ng bơngai tăh hla păng Kon pơlei, tơgop tơ iung pơjing mĭnh teh đak pháp quyền xã hội chủ nghĩa pran kơjăp iăp kơtang, ba teh đak yak mơ̆t lơ̆m Chăl hle-Chăl atŏk tơ iung pơdrŏng pran kơtang, gơ̆h hơgei păng hơnŭk hơnoa kơ hơdrĕch hơdrung bơ̆n”.