Hla ar tơchơ̆t tơroi: vei sơđơ̆ng kơjăp ŭnh hơyuh teh đak, pơtruh măh mai ŭnh điên ‘noh jĭ 1 lơ̆m dôm tơdrong tơm vei sơđơ̆ng tŏk pran đơ̆ng mŭk drăm păng tơchơ̆t tơdrong jang kơmăy kơmŏk ‘nao tơ̆ hơnăp kơnh. Kiơ̆ kơ ‘noh, tơdrong hơgăt mŭk drăm tŏk lơ̆m teh đak sơnăm 2025 hơdrin iŏk đei hloh kơsô̆ 8% păng mŭk drăm tŏk jăl jang 2026 – 2030 hơdrin tơ̆ kơsô̆ 2 kơsô̆, athei ŭnh hơyuh tŏk hloh 1,5 ‘măng, tơchĕng hơdrol jô̆ păh lăp rim sơnăm đơ̆ng 12% truh hloh 16%.

Vă kơchăng dôm trong jang đơ̆ng hrôih, đơ̆ng hơtăih, vei sơđơ̆ng tôch ai ưh kơ lê̆ ưh kơ măh ŭnh điên, Thủ tướng teh đak athei dôm tơring, anih jang akŏm bơ̆jang kiơ̆ hơnăp jang pơtruh măh mai ŭnh điên pơyua ăn hơtŏk tơiung mŭk drăm tơpôl jăl jang 2025 - 2030, vei sơđơ̆ng ŭnh hơyuh teh đak lơ̆m chăl ‘nao, lăng ‘nâu jĭ hơnăp jang tơm gĭt kăl. Akŏm dăr hơlen, tơdrong jang tơm gĭt kăl ‘nao găh hơtŏk tơiung mŭk drăm tơpôl; chih tơmơ̆t dơ̆ng dôm tơdrong jang ŭnh điên ‘nao, ŭnh điên rơgoh, kơjăp.