Tơ̆ xăh Ia Pnôn, apŭng Đức Cơ, Anih tơm pơgơ̆r Ƀô̆ đô̆i vei lăng tơring sơlam dêh char Gia Lai hlôi pơgơ̆r tơdrong jang “Pơyan puih mak lĭnh Tơring sơlam - Tơnŏ jơhngơ̆m kon pơleiđ” pơyan puih mak Ất Tỵ 2025. Ia Pnôn jĭ xăh sơlam, hăm lơ kon pơlei ‘noh bơngai kon kông, tơdrong hơrih sa oei tơƀơ̆p lơ mơmat tat; kơsô̆ ŭnh hnam dơnuh hin kơ xăh oei 16,49%.

Hăm tơdrong kăl ưh kơ lê̆ bu đei hŭt lê̆ tơ̆ rŏng păng vei sơđơ̆ng rim ŭnh hnam kon pơlei đei Tết ngăl, tơdrong jang hlôi tơlĕch jang lơ tơdrong jang hơdăh ‘lơ̆ng nhen: “‘Măng kơchơ Têt ưh kơ hoach jên”, lơ tơdrong jang nŭng ƀĕng chư̆ng păng pơgơ̆r hơri hơsoang. ‘Măng âu, Anih tơm pơgơ̆r Ƀô̆ đô̆i vei lăng tơring sơlam dêh char Gia Lai hlôi pơjao asong 100 tơpu tơmam ăn kơ dôm ŭnh hnam teh đak tơgŭm păng ŭnh hnam đei tơdrong hơrih sa mơmat tat. 20 ‘nu hŏk tro ‘noh “kon rong kơ ƀô̆ đô̆i vei lăng tơring sơlam” kŭm đei iŏk tơmam Tết.

Trung ương Khul ƀok thây pơgang oei mơlôh Việt Nam ‘nao jang hơdoi hăm Anih vei lăng jang pơgang dêh char Đắk Lắk pơgơ̆r "Pơyan Puih mak tơgŭm băl - Tết ‘mêm kơ eng" tơ̆ xăh Chư Kpô, apŭng Krông Búk. Tơdrong jang hơpăh 20 tơpu tơmam ăn hŏk tro păng dôm unh hnam đei tơdrong arih xa pơmat tat, tơgŭm 10 kơ suơ̆t jên vă răih hơmet jĭ plei nuih ăn hơioh păng 50 kơsuơ̆t jên răih phaco ăn kon pơlei jĭ măt tơ̆ apŭng Krông Búk. Khăm, ƀơk đĕch pơgang ăn 500 ‘nu kon pơlei tơ̆ xăh Cư Kpô.

Ƀlep ƀât ‘măng mă âu, anih pơgơ̆r oei năm ngôi, hơpăh tơmam ăn 5 unh hnam đei kŏng hăm kăch mang tơ̆ xăh Cư Kpô, apŭng Krông Búk. Akŏm đĭ đăng jên tơgŭm ‘măng mă âu truh 1,3 ti. Tơdrong jang ‘nâu tôch gĭt kăl vă tơgŭm, hơmet têt Tết Nguyên đán chơt hơiă, hơnhăk ba jơhngâm pran, tơdrong čhôk ‘nă ăn đe oh hơioh, kon pơlei tơ̆ dôm tơring pơmat tat kơ dêh char Đắk Lắk.