Tơ̆ tơring Ea Tiêu, apŭng Cư Kuin, Hơnih tơm Kŏng ang iung jang hơdoi hăm Kŏng ang dêh char păng Đoàn hơdruh tơdăm pơgơ̆r tơdrong jang “Vih hăm pơlei pơla”. Jơ ‘năr ou, kơdră chĕp pơgơ̆r Hơnih tơm Kŏng ang pôk ăn 300 tơnô̆ tơmam drăm Têt ăn rim ŭnh hnam đei iŏk yua ăn teh đak, kră pơlei, thôn trơng, bơngai tơnap tap; hơdruh tơdăm Kŏng ang kon pơlei. Đoàn hơdruh tơdăm dêh char Dak Lăk pôk ăn mĭnh hơnih kmăi tinh, 100 tơnô̆ jên hŏk nơ̆r Anh ăn rim hŏk tro jăl kơđeh, tơlĕch tơdrong jang tơ̆k hơdăh ang rang ‘lơ̆ng pơlei pơla, trong hla kơ Teh đak; Kơdră chĕp pơgơ̆r Kanh sat Kơ đô̆ng et hơtŏk păng pôk ăn 2 pơbung hnam ‘mêm mơnat.

Tơdrong jang “Vih hăm pơlei pơla: kơ Hơnih tơm Kŏng ang vă pơtho tơbăt tơdrong joăt joe ‘mêm kơ eng teh đak, lang să jơhngơm đon ‘lơ̆ng “nhă đak chăm kơ tu” jơhngơ̆m đon ƀlŏk hơdơ̆r hăm dôm bơngai đei iok yua ăn kĕch mang, pơm hơtŏk jơhngơ̆m đon tơgoăt tơgoăl kơjăp iăp kơtang lơ̆m kon pơlei pơla rim hơdrung Việt Nam.

Tơ̆ xăh sơlam Ia Lốp, apŭng Ea Súp, dêh char Dak Lak hlôi pơgơ̆r Tơdrong jang “Pơyan puih mak lĭnh tơring sơlam tơnŏ jơhngơ̆m kon pơlei”, hơnhăk truh ăn kon pơlei dôm hơdrĕch kon kông tơring ‘nâu 1 pơyan pơuih mak tơnŏ hiôk păng ƀĕnh tơdrong hơmĕng. Tơ̆ tơdrong jang, vă jê̆ 400 tơpu tơmam hlôi đei pơjao truh dôm ŭnh hnam teh đak tơgŭm păng ŭnh hnam dơnuh hin, kŭm hăm 1 pôm hnam "Tơgoăt tơgoăl" đei kơjă 100 triệu hlak jên.

Mă loi ‘noh, dôm hŏk ƀŏng kŭm đei pơjao ăn kơ hŏk tro dơnuh hin hŏk hơgei, tơgŭm ăn đe oh yak mơ̆t lơ̆m khei ‘năr tơ̆ hơnăp kơnh. Tơdrong jang "Pơyan puih mak lĭnh tơring sơlam tơnŏ jơhngơ̆m kon pơlei”  ưh khan lăp jing tơmam hơpăh đĕch mă oei jing tơ ley tơgoăt hơdai tơdrong ‘mêm lĭnh kon pơlei, vei kơjăp tơdrong pơvei đơ̆ng khŭl lĭnh tprring sơlam păng kon pơlei dôm hơdrĕch hơdrŭng, pơm tơdrong kơjăp ăn 1 tơring sơlam rơngei, phĭ tơnŏ.