Chĕp pơgơ̆r hop akom, Kơ iĕng Kơdră chĕp pơgơ̆r Kuô̆k hô̆i Nguyễn Thị Thanh pơma hơdăh, Khul kơdră chĕp pơgơ̆r Kuô̆k hô̆i pơma tơbăt jơhngơ̆m đon hôn bơnê kơtang păng pơtruh nơ̆r hmach chơt hơ iă hloh truh hăm rim ƀok thây kô sơnăm ‘lŏ kră, rim kơdră tang măt Kuô̆k hô̆i hlôi păng tŏk bŏk bơ̆ jang lơ̆m tơdrong jang pơtho pơhrăm, atŭm hăm vă jê̆ 1 triu 600.000 ‘nu ƀok thây kô, kang ƀô̆ vei lăng pơtho pơhrăm lơ̆m teh đak . Rim kơdră tang măt drơ̆ng mĭnh nơ̆r kơtang hăm tơdrong kăl đei pơjing Khôi luơ̆t Ƀok thây kô pơtho vă pơm pơkeh khôi luơ̆t găh ƀok thây kô pơtho, adoi đei trong jang tơgŭm djru vă tơ iung pơjing păng atŏk tơ iung khul ƀok thây kô; hơmet pơ ‘lơ̆ng dôm tơdrong tim mă lăp lơ̆m bơ̆ jang teh đak vei lăng ƀok thây kô hrei ou. Kiơ̆ đơ̆ng kơdră tang măt Trần Văn Thức, khul Thanh Hóa, tơdrong tơmơ̆t jang ƀok thây kô lơ̆m rim hnam trương teh đak tŏk bŏk bơ̆ jang kiơ̆ tơdrong tơchơ̆t atŭm lơ̆m krao tơmơ̆t kang ƀô̆ bơ̆ jang, ‘nou jĭ tơdrong ưh kơ lăp pơm ăn truh rơkăh ƀok thây kô tơ̆ mĭnh ƀar tơring, hơnih jang, ưh kơ gơ̆h pơtho mĭnh ƀar tơdrong hok pơhrăm vă tơlĕch jang kiơ̆ trong pơtho pơhrăm sơnăm 2018.