Lơ̆m ‘măng iung năm truh hăm rim Kơđông ƀô̆ đô̆i vei lăng sơlam teh đak tơjê̆ hăm teh đak boăl Lào păng Campuchia dôm năr ou ƀônh mơ̆t hơdoi lơ̆m jơ ‘năr chơt hơ iă ‘nă hal sơng têt. Tơ̆ 13 tơring sơlam teh đak găh 4 apŭng: Đăk Glei, Ngọc Hồi, Sa Thầy păng Ia H’Drai kơ dêh char Kon Tum, jơ ‘năr Têt vă jê̆ truh bơih.

Jơ ‘năr Têt Nguyên đán Ất Tỵ sơnăm ou Khul kơdră chĕp pơgơ̆r Ƀô̆ đô̆i vei lăng sơlam teh đak dêh char Kon Tum hlôi rơ̆ih tơring Ia Đal, apŭng Ia H’Drai pơgơ̆r kiơ̆ pơgơ̆r tih lơ̆m dêh char găh Tơdrong pơgơ̆r “Puih mak Ƀô̆ đô̆i vei lăng sơlam teh đak Chhur jơhngơm đon kon pơlei” tơklep hăm “Năr lêh Ƀĕng chưng jơk”. ‘Moi kiơ̆ tơdrong pơgơ̆r ou, hloh 6.000 ‘nu kon pơlei kơ 11 pơlei lơ̆m tơring đei chơt hơ iă pơgơ̆r Têt joăt joe, hưch hanh vang chă ‘nŭng ƀĕng chư̆ng; pơgơ̆r joh hơri, đă ƀŏng lŏng tơplŏng kơdou; đei pôk ăn 250 tơnô̆ tơmam drăm, 400 đôi ƀĕng chư̆ng. Đại tá Lê Minh Chính, Kơdră chĕp pơgơ̆r Đảng Khul Ƀô̆ đô̆i vei lăng sơlam teh đak dêh char Kon Tum tơbăt jơ ‘năr ou, ‘moi kiơ̆ trong sơlam teh đak jei đei pơgơ̆r tơdrong pơgơ̆r ou vă vei lăng năng tông Têt ăn kon pơlei:“Sơnăm ou nhôn rơih iŏk tơring Ia Đal, apŭng Ia H’Drai ‘noh tơring pơgơ̆r blŭng a vă hơlen ăn rim ‘măng pơgơ̆r đơ̆ng rŏng. Rim tơring uơ oei rim Kơđông Ƀô̆ đô̆i vei lăng sơlam teh đak iung jang hơdoi hăm kon pơlei păng Kơdră chĕp pơgơ̆r tơring vă pơgơ̆r ăn kon pơlei hăm kon jên hu đơ̆ng rim kang ƀô̆, ƀô̆ đô̆i chă tơra păng chă krao hơvơn đơ̆ng rim hơnih mơdro sa, bơngai đei jơhngơ̆m đon ‘lơ̆ng, đơ̆ng rim hơnih jang vă kon pơlei đei sơng Têt chơt hơ iă ‘nă hal, phĭ tơtŏ dơnŏ ‘lơ̆ng hloh”.

Lơ̆m jơva chĭng chêng djơ djrĭng djơ djrăng, hla kơ ƀrê Teh đak păr mơ liơk atŭm hăm nơ̆r hiơ hiĕk glơ glăk gơ glônh đơ̆ng kon pơlei rim hơdrung hơrih sa ‘moi kiơ̆ sơlam teh đak dêh char Kon Tum pơjing đei jơ ‘năr puih mak ‘lơ̆ng rŏ hơbŏ nhen hloh dơ̆ng.

Sơnăm 2024, tơdrong hơrih sa kơ kon pơlei oei tơ̆ tơring sơlam teh đak kơ dêh char Kon Tum hlôi tơplih hơ iă gơnơm đơ̆ng kơjă chehphe, ksu, ƀum ƀlang ... tŏk măt. Rim trong jang sa kơ yuơ khul ƀô̆ đô̆i vei lăng sơlam teh đak dêh char Kon Tum tơlĕch ăn păng vang iung jang, nhen: Pơjao đang viên Kơđông ƀô̆ đô̆i vei lăng sơlam teh đak iŏk jang vei lăng năng tông ŭnh hnam kon pơlei; Tơgŭm ăn rơmo yŏng ăn bơngai dơnuh tơ̆ rim tơring sơlam teh đak; Rong nhŭng hmă; yak hơdoi hăm khul drŏ kăn tơring sơlam teh đak… kiơ̆ yok dôm trong jang jơnei tơgŭm ăn kơ hrĕng ŭnh hnam kon kông dơnuh jang sa iŏk yua kơjăp, pơm hơtŏk dơ̆ng tơdrong chơt hơ iă năr Têt. Ƀok Bloong Hâm, Kơ iĕng kơdră chĕp pơgơ̆r Hơnih vei lăng kon pơlei tơring Đak Dŭk, apŭng Ngŏk Hôi tơbăt:“Đei Đảng, teh đak, rim hơnih bơ̆ jang, Ƀô̆ đô̆i vei lăng sơlam teh đak lăng tông nông gia tơgŭm djru rim trong tơlĕch jang đơ̆ng kơdră kơpal pơjao ăn tơdrong jang mŭk drăm-tơpôl lơ̆m tơring ‘noh nhôn jang đei keh đang păng mĭnh ƀar trong tơlĕch jang hlôi jang keh đang hloh trong pơjao ăn. Kon pơlei chơt hơ iă ‘nă hal hơmet ăn Têt joăt joe kơ hơdrĕch hơdrung”.

Jơ ‘năr tŏk bŏk vă yak truh jơ tơƀưh sơnăm so hăm sơnăm ‘nao. Tơ̆ tơring sơlam teh đak dêh char Kon Tum đei 76 khul, hloh 550 ŭnh hnam păng rim bơngai oei lơ̆m 13 tơring sơlam teh đak kĭ pơkăp vei lăng kơjăp trong sơlam teh đak, hơdrơ̆ng sơlam teh đak; Đei 93 khul hăm 600 ŭnh hnam kĭ pơkăp vei lăng năng tông kơdih pơlei pơla sơđơ̆ng dơ̆ng kơjăp. Kơtă hloi lơ̆m jơ ‘năr sơng Têt, chơt hơ iă puih mak, ƀô̆ đô̆i kon pơlei tơ̆ ou jei ưh kơ hiơt tơdrong jang hăm atŏk jơhngơ̆m đon kơchăng kơtang. Kang ƀô̆, ƀô̆ đô̆i hăm kon pơlei tôch môch trong sơlam teh đak oei vei kơjăp bơ̆ jang pơtrui vei lăng sơđơ̆ng dơ̆ng kơjăp tơring sơlam kơ teh đak. Đại tá Trần Ngọc Tùng, Kơ iĕng Kơdră chĕp pơgơ̆r, Kơdră Pơchoh trong Khul kơdră chĕp pơgơ̆r Ƀô̆ đô̆i vei lăng sơlam teh đak Kon Tum tơbăt: “Atŏk kơtang hơnăp jang kon pơlei pơla kơrŭn jơhngơ̆m iung jang hơdoi hăm ƀô̆ đô̆i vei lăng sơlam teh đak lơ̆m vei lăng năng tông groi teh, tơdrong pơm tơm sơđơ̆ng sơlam kơ Teh đak, Khul kơdră chĕp pơgơ̆r Ƀô̆ đô̆i vei lăng sơlam teh đak dêh char Kon Tum atŏk kơtang pơrô̆ pơrôp, pơm hơtŏk jơhngơm đon hlôh vao kơ kon pơlei lơ̆m tơdrong tơ iung pơjing đĭ đăng kon pơlei vang vei lăng sơđơ̆ng sơlam teh đak tơklep hăm trong jang vei lăng sơđơ̆ng pơlei pơla. Hơtŏk kơtang hơnăp jang, sơnong jang đơ̆ng tơpôl, rim kon pơlei lơ̆m vei lăng năng tông sơlam teh đak, vei kơjăp sơđơ̆ng chĭnh trĭ sơđơ̆ng tơring tơrang tơpôl”.

Hăm dôm tơdrong tơplih kơtang lơ̆m tơdrong hơrih sa mŭk drăm-tơpôl, jơhngơ̆m đon chơt hơ iă sơng Têt kơ Ƀô̆ đô̆i păng kon pơlei tơring sơlam teh đak dêh char Kon Tum sa roi chơt hơ iă ‘nă hal hloh dơ̆ng. Têt tơ̆ sơlam teh đak ưh khan jơ ‘năr vă ŭnh hnam chă pơgou pơđou dih băl, mă oei jing jơ ‘năr vă tơbăt dih băl, tơklep dih băl kơjăp tơgoăt tơgoăl ‘lơ̆ng hơ iă ƀô̆ đô̆i kon pơlei, lang să jơhngơm đon hiôk chơt tơ̆ tơring tơm kơ Teh đak.