Ƀlep ƀât ‘măng mă âu, Khul bơngai răm đơ̆ng pơgang dioxin Việt Nam pơjao jên jang xa ăn 5 unh hnam bơngai răm đơ̆ng pơgang dioxin păng 30 tơpu tơmam Tết tơgŭm ăn dôm bơngai răm. Akŏm đĭ đăng tơmam đei kơjă 86 triu hlak jên. Năm ngôi, pơma nuh păng pơjao tơmam têt ăn 1,2 unh hnam tơ̆ thĭ trơ̆n Pơng Đrang, apŭng Krông Búk, dêh char Đắk Lắk, Trung tướng Nguyễn Hữu Chính, Kơdră vei lăng Khul bơngai răm đơ̆ng pơgang dioxin Việt Nam, pơlung jơhngâm ăn dôm bơngai răm păng unh hnam đe sư hơnơ̆ng adrin jang tŏk lơ̆m tơdrong arih.

Dang ei dêh char Đắk Lắk đei 1.418 ‘nu bơngai răm đơ̆ng pơgang dioxin oei xa jên tơgŭm rim khei. Vă rim bơngai răm đơ̆ng pơgang dioxin tơtă tơƀâp pơmat tat lơ̆m tơdrong arih xa ngăl. Ƀlep ƀât ‘măng mă âu, Khul bơngai răm đơ̆ng pơgang dioxin dêh char Đắk Lắk krao hơvơn, mong akŏm hơpăh tơmam têt ăn đĭ đăng 1.418 ‘nu bơngai răm, 1 tơpu đei kơjă 200.000 hlak, vang tơgŭm ăn unh hnam đe sư đei dơ̆ng tơdrong ‘lơ̆ng vă sơng xa têt.