‘Năr 21-1, Anih Radio nơ̆r pơma Việt Nam tơ̆ tơring Tây Nguyên jang hơdoi hăm Anih chĕp kơ̆l pơgơ̆r khul linh dêh char Đắk Lắk păng Công ty đak Xăng đak dâu Nam Tây Nguyên pơgơ̆r hơpăh hnam ăn bôl boăl ‘nŏh jĭ linh Xa Văn Thắng, bơ̆ jang tơ̆ Anih linh apŭng Krông Bông, dêh char Đắk Lắk. ‘Nhŏng Xa Văn Thắng đei tơdrong arih xa tôch pơmat tat, oei hnam thuê, rong mĕ ƀă kră păng 2 ‘nu kon oei ‘lơ̆p.

Hnam ‘nao man xă vă jê̆ 100 mét vuông, akŏm đĭ đăng jên man 260 triu. Lơ̆m noh, VOV Tây Nguyên păng Công ty đak Xăng đak dâu Nam Tây Nguyên tơgŭm 80 triu, oei đei dơ̆ng ‘nŏh ‘nhŏng Thắng chă mơng jên bôl boăl păng tŏk iŏk tơ̆ Anih mong jên tơgŭm tơpôl. Hnam ‘nao đei man đang pơjao adrol kơ Tết Nguyên đán ‘nŏh jĭ tơmam hơpăh tôch gĭt kăl, hơnhăk ba tơdrong chơt hơiă ăn unh hnam, tơgŭm ăn ‘nhŏng Thắng đei anih oei xa ‘lơ̆ng, hơđơ̆ng jơhngâm bơ̆ jang. Đei băt, ‘nâu jĭ hnam mă 5 VOV Tây Nguyên kŭm hăm dôm anih tơgŭm man hnam ăn bơngai pơmat tat tơ̆ dêh char Đắk Lắk lơ̆m sơnăm âu ki.

Lơ̆m jơ ‘năr chơt hơ iă sơng Têt nguyên đán Ất Tỵ 2025, ŭnh hnam mŏ Ka Nhing (hơdrungK’Ho) oei lơ̆m koeng kơphô̆ Di Linh Thượng 2, thị trấn Di Linh, dêh char Lâm Đồng, măh chhưu jơhngơ̆m mưh sơng iŏk “Pơbŭng hnam ‘mêm mơnat”.

Pơbŭng hnam đei ming man hăm kon jên 160 triu hlak jên. Lơ̆m ou Khul drŏ kăn apŭng Di Linh tơgŭm ăn 50 triu hlak jên đơ̆ng Hơnih mong jên drŏ kăn dơnuh, pă dôm yơ ‘noh kon jên ŭnh hnam chă tŏk iok. Yă Ka Hương -Kơ iĕng Kơdră Khul drŏ kăn apŭng Di Linh tơbăt, atŭm hăm pôk ăn “Pơbŭng hnam ‘mêm mơnat”, jơ ‘năr ou oei đei lơ tơdrong jang vei lăng năng tông Têt ăn pơmai oh ŭnh hnam tơnap tap.“Khul drŏ kăn apŭng Di Linh krao hơvơn đĭ đăng dôm bơngai đei jơhngơ̆m đon ‘lơ̆ng, păng rim bpơngai lơ̆m khul drŏ kăn vang chă tơgŭm djru ... ‘Ngoăih kơ ‘noh nhôn jei iung jang hơdoi hăm minh ƀar hơnih jang lơ̆m tơring nhen Kŏng ty Ŭnh hơyuh vă pơgơ̆r năm ngôi, pôk tơmam drăm ăn rim pơmai oh dơnuh tơnap tap, bơngai hơdro po vă đe sư đei jơhngơ̆m đon chơt hơ iă sơng Têt. Lơ̆m sơnăm, mưh pơgơ̆r tơdrong jang “Mĕ hơđơ̆ng”, nhôn hlôi krao hơvơn dôm bơngai đei jơhngơ̆m đon ‘lơ̆ng, rim hơnih jang vă năm ngôi păng pôk ăn tơmam drăm ăn 45 ‘nu hơ ioh mơti mơtek. Rim khei, hmă hmă đei khul năm ngôi, vei lăng năng tông jơhngơ̆m jăn. Hơtuch sơnăm ‘noh năm ngôi, pôk tơmam drăm vă đe oh đei dơ̆ng jơhngơ̆m đon chơt hơ iă sơng Têt”.