Trung tướng Nguyễn Anh Tuấn, kơdră jang lơ̆m Khul kơdră chĕp pơgơ̆r Đảng Ƀô̆ đô̆i vei lăng sơlam teh đak hlôi pơrô̆ athei rim kơđông tơ iung pơjing trong vă jang, bơ̆ jang ‘lơ̆ng hơmet ăn, ăn rơbou khul jang năm bơ̆ jang jur năm jang hơdoi hăm khul kơdră đảng, kơdră chĕp pơgơ̆r tơring pơgơ̆r ăn ƀô̆ đô̆i păng Kon pơlei sơng Têt, chơt hơ iă Puih mak păng vei lăng sơđơ̆ng dơ̆ng dơ̆ng kơjăp rim pơlei pơla tơring sơlam Teh đak.

Ou ki, tơ̆ tơring Pa Tần, apŭng Sin Hồ, dêh char Lai Châu hlôi pơgơ̆r “Puih mak Ƀô̆ đô̆i vei lăng sơlam teh đak chhur jơhngơ̆m đon kon pơlei”, hăm lơ tơdrong pơgơ̆r ‘lơ̆ng hơ iă. Vang năm păng iung pơma tơ̆ pơgơ̆r, Kơdră chĕp pơgơ̆r Teh đak Lương Cường pơma tơbăt jơhngơ̆m đon chơt hơ iă kơ yuơ kang ƀô̆, ƀô̆ đô̆i Khul Ƀô̆ đô̆i vei lăng sơlam teh đak hlôi păng tŏk bŏk iung jang hơdoi kơjăp hăm khul kơdră đảng, kơdră chĕp pơgơ̆r tơring, rim hơnih jang vei lăng năng tông Têt ăn kon pơlei oei tơ̆ tơring sơlam teh đak. Kơdră chĕp pơgơ̆r teh đak akhan, ‘nou jĭ tơdrong jang tôch ‘lơ̆ng hơ iă tơbăt hơdăh hơnăp jang, tơdrong joăt joe tơgŭm djru, ‘mêm mơnat dih băl hơdrĕch hơdrung păng jơhngơ̆m đon ‘lơ̆ng liĕm kơ Khul Ƀô̆ đô̆i Kon pơlei Việt Nam nuih mơng pran kơtang, tơgop pơm hơdăh ang rang ‘lơ̆ng hlŏh dơ̆ng um rup “Ƀô̆ đô̆i Ƀok Hô” chăl hle.“Tơdrong pơgơ̆r ou đei pơgơ̆r lơ tơdrong hơdăh, ‘lơ̆ng hơ iă, tơklep kơjăp hăm kon pơlei rim hơdrung; kơ yuơ lơ loh hlôi hơvơn đei vang iung jang, vang kơrŭn jơhngơ̆m, vang tơgop đơ̆ng rim hơnih bơ̆ jang, khul jang, rim bơngai đơ̆ng Trung ương truh tơ̆ tơring păng rim hơnih mơdro sa. Hăm dôm rơmo yŏng, kơdŭng tơmam drăm, kơdŭng phe, ƀĕng chưng, pôk ăn kon jên hŏk pơhrăm ăn rim đe hŏk tro dơnuh hơdrin hŏk pơhrăm, “ba oh năm tơ̆ hnam trương” păng tơgŭm ăn 400 pơbŭng hnam ... mă Tơdrong jang pôk ăn, ‘noh ưh khan lăp tơmam drăm hmă, mă oei jing tơdrong hơlêm găh jơhngơ̆m đon, gô tơgŭm rim ŭnh hnam dơnuh tơ̆ tơring sơlam teh đak atŭm hăm ƀô̆ đô̆i-kon pơlei lơ̆m teh đak sơng Têt joăt joe kơ hơdrĕch hơdrung phĭ tơto dơnŏ ‘lơ̆ng, chơt hơ iă ‘nă hal păng hơnŭk hơnoa hloh dơ̆ng”.

Ƀlep lơ̆m jơ ‘năr ou, Kơdră chĕp pơgơ̆r Teh đak Lương Cường pôk ăn 200 tŏ hnam Pơbŭng hnam sơlam teh đak kơjă kơjên 10 ti hlak jên ăn kon pơlei tơring sơlam teh đak dêh char Lai Châu păng pôk ăn 11 tơnô̆ tơmam drăm ăn rim ŭnh hnam đei iok yua ăn teh đak. Kiơ̆ đơ̆ng Hơnih chĕp pơgơ̆r tơbăt, akŏp kơjă tơmam drăm pôk ăn mă ƀô̆ đô̆i kon pơlei lơ̆m teh đak pơtruh ăn rim tơring sơlam teh đak ‘moi kiơ̆ tơdrong pơgơ̆r “Puih mak Ƀô̆ đô̆i vei lăng sơlam teh đak chhur jơhngơ̆m đon kon pơlei” sơnăm 2025 ‘noh vă jê̆ 25 ti hlak jên.

Jei lơ̆m khei năr ou ki, tơ̆ tơring sơlam teh đak rim dêh char tơring Tây Nguyên hlôi pơgơ̆r Tơdrong pơgơ̆r “Puih mak Ƀô̆ đô̆i vei lăng sơlam teh đak chhur jơhngơ̆m đon kon pơlei”. Tơ̆ tơring sơlam teh đak Ia Lôp, apŭng Ea Sŭp, dêh char Dak Lăk, Tơdrong pơgơ̆r “Puih mak Ƀô̆ đô̆i vei lăng sơlam teh đak chhur jơhngơ̆m đon kon pơlei” hlôi pôk ăn 5 pơbŭng hnam ăn rim ŭnh hnam tơnap tap, pôk ăn vă jê̆ 400 tơnô̆ tơmam drăm ăn ŭnh hnam đei iŏk yua ăn teh đak, ŭnh hnam dơnuh, rim ŭnh hnam jang ‘lơ̆ng, pơgơ̆r khăm, ƀơk pơgang ăn hloh 300 ‘nu kon pơlei. Tơ̆ tơring sơlam teh đak Ia Pnôn, apŭng Đức Cơ, dêh char Gia Lai, Tơdrong pơgơ̆r “Puih mak Ƀô̆ đô̆i vei lăng sơlam teh đak chhur jơhngơ̆m đon kon pơlei” hlôi pôk ăn 100 tơnô̆ tơmam drăm ăn rim ŭnh hnam đei iŏk yua ăn teh đak; 20 tơnô̆ tơmam drăm ăn rim đe oh hŏk tro ŭnh hnam tơnap tap; khăm jĭ, ƀơk pơgang ăn hloh 200 ŭnh hnam. Tơ̆ tơring Thuận Hạnh, apŭng Dak Song, dêh char Dak Nông, Tơdrong pơgơ̆r ou hlôi pôk ăn 250 tơnô̆ tơmam drăm ăn ŭnh hnam dơnuh, ŭnh hnam tơnap tap păng ŭnh hnam đei iŏk yua ăn teh đak, rim đe hŏk tro mơmat tat hăm akŏp kon jên 150 triu hlak jên; pôk ăn 3 pơbŭng hnam tơgoăt tơgoăl pôk ăn ŭnh hnam hơrih sa tơnap tap.

Rŏ lăng vă sơkơ̆t hơdăh Tơdrong pơgơ̆r “Puih mak Ƀô̆ đô̆i vei lăng sơlam teh đak chhur jơhngơ̆m đon kon pơlei” đei pơgơ̆r jơ̆p tơring tơrang sơlam teh đak, achon dơsĭ, hlôi jing mĭnh lơ̆m dôm tơdrong jang vei lăng năng tông tơpôl jơnei hloh, tơpă hloh đơ̆ng Khul ƀô̆ đô̆i, tơgop vei lăng năng tông Têt ăn bơngai dơnuh, hơnhăk đei jơhngơ̆m đon chơt hơ iă ‘nă hal ăn kon pơlei tơring sơlam teh đak. Đơ̆ng noh, pơm hơtŏk loi dơ̆ng jơhngơ̆m pran tơgoăt tơgoăl pôm nơ̆r ƀơ̆r đon hơdrĕch hơdrung, sơkơ̆t hơdăh tơdrong kăp gĭt oei sa joăt joe ‘lơ̆ng rŏ kơ hơdrĕch hơdrung bơ̆n ‘noh ‘mêm mơnat, tơgoăt tơgoăl; jĭ jơhngơ̆m đon ‘lơ̆ng “Ƀô̆ đô̆i Ƀok Hô".