Lơ̆m jơ ‘năr chơt hơ iă kơ dôm năr hơtuch sơnăm Giáp Thìn, Kơdră chĕp pơgơ̆r Kuô̆k hô̆i Trần Thanh Mẫn hlôi tơroi tơbăt hăm khul kơdră so chep pơgơ̆r Kuô̆k hô̆i, kơdră so jang lơ̆m Khul kơdră chĕp pơgơ̆r Kuô̆k hô̆i rim jăl găh dôm tơdrong jơnei mă teh đak bơ̆n pơma atŭm păng Kuô̆k hô̆i hlôi iŏk đei lơ̆m sơnăm ou ki. Kơdră chĕp pơgơ̆r Kuô̆k hô̆i Trần Thanh Mẫn sơkơ̆t hơdăh, Kuôk hô̆i jăl XV đei kiơ̆ yok dôm tơdrong jang jơnei hơdrol vă hơnơ̆ng jang keh đang ‘lơ̆ng hơnăp jang kơ Hơnih tang măt kăl hloh kơ Kon pơlei, hơnih bơ̆ jang tơm teh đak.“Lơ̆m minh hơyak atok tơ iung kơ Kuô̆k hô̆i, ưh khan tơdrong iŏk đei jơnei kơ dang ei, mă lei oei jing tơdrong tơgoăt iŏk dôm tơdrong ‘lơ̆ng rŏ đơ̆ng rim jơhnơr kơdră chĕp pơgơ̆r hơdrol, khul kang ƀô̆ bơngai jang kơ rim jăl jang hlôi tơ iung pơjing đei. Lu bơ̆n, mă đơ̆ng hlôi pơdơ̆h bơ̆ jang, mă lei hăm jơhngơ̆m đon phăl hơlăng, gơh hơgei, ling lang yak hơdoi, tơroi tơbăt păng tơgop nơ̆r vă Kuôk hô̆i roi năr roi pran kơtang hloh, chông ba, pơm hơtŏk jơhngơ̆m đon hưch hanh, vă pơjing đei jơhngơ̆m ‘lơ̆ng đơ̆ng jơhnơr hơdrol ăn jơhnơr đơ̆ng rŏng kiơ̆ yok rok jơ̆ng”.

Sơnăm 2025 jĭ sơnăm tôch gĭt kăl, đei lơ tơdrong pơgơ̆r tih kơ teh đak, jing sơnăm pơđĭ khul Đảng, kon pơlei, ƀô̆ đô̆i kŏng ang kơrŭn đĭ ai vă iung yak pran kơtang,jang kiơ̆ jơnei Tơdrong tơchơ̆t 13 kơ Đảng. Mă kăl Kuô̆k hô̆i oei đei 3 ‘măng hop akom hăm lơ tơdrong jang pơjing khôi luơ̆t anai. Tơdra hơdrol gô vă pơdrơ̆ng 34 khôi luơ̆t păng hơmet ming, tơmơ̆t dơ̆ng lơ khôi luơ̆t anai vă tơgŭm ăn tơdrong hơmet ming hơnih jang, khul jang.

Kiơ̆ kơ ‘noh, lăp đơ̆ng rŏng pơdơ̆h Têt Nguyên đán, Kuô̆k hô̆i gô pơgơ̆r hop akom hăt hot lơ̆m tŏk bŏk khei 2 vă jang keh đang tơdrong tơchơ̆t tơgŭm ăn tơlĕch jang kiơ̆ jơnei hơmet ming khul bơ̆ jang kơtoei-gơ̆h hơgei-pran kơtang, jơnei hơ iă đơ̆ng Trung ương truh tơ̆ tơring.

Kơ yuơ lơ loh, kăl tơplih ‘nao kơtang hloh dơ̆ng ăn tơdrong bơ̆ jang Kuô̆k hô̆i, mă kăl ‘noh sơnăm 2025, vă hơmet ăn Hop akŏm tih Đảng rim hơnih yak truh Hop akŏm tih kơ Đảng lơ̆m teh đak adoi nhen pôk rơ̆ih Kuô̆k hô̆i jăl XVI păng Jơnŭm vei lăng kon pơlei rim hơnih jăl jang 2026-2031, Kơdră chĕp pơgơ̆r Kuô̆k hô̆i Trần Thanh Mẫn ‘meh vă rim Kơdră so chĕp pơgơ̆r Kuô̆k hôi, Kơ iĕng Kơdră chĕp pơgơ̆r Kuôk hô̆i, rim Kơdră jang lơ̆m Khul kơdră chĕp pơgơ̆r, kang ƀô̆ bơngai jang lơ̆m Jơnŭm vei lăng kon kông, rim Hơnih jang kơ Kuôk hô̆i hơnơ̆ng tơgŭm djru pran kơtang hloh dơ̆ng lơ̆m khei năr kơnh.

Kơdră chĕp pơgơ̆r Kuôk hô̆i sơkơt hơdăh, Kuô̆k hô̆i ling lang mơ̆ng nơ̆r tơgop păng ling lang tơplih ‘nao ăn bơ̆ jang pơjing khôi luơ̆t; dăr lăng hơlen, tơchơ̆t dôm tơdrong kăl kơ teh đak roi năr roi ‘lơ̆ng hơ iă hloh dơ̆ng.

Iung pơma tơ̆ jơ tơƀơ̆p muh măt, Kơ iĕng kơdră so Kuô̆k hô̆i Uông Chu Lưu pơma tơbăt jơhngơ̆m đon chơt hơ iă, hưch hanh hơmanh bơnê tơ̆ hơnăp tơdrong atok tơ iung tôm tong kơ teh đak lơ̆m sơnăm 2024; pơma hơdăh, lơ̆m iŏk đei jơnei atŭm kơ teh đak đei hơnăp jang păng tơdrong tơgop gĭt kăl đơ̆ng Kuô̆k hô̆i. Mă đơ̆ng bơ̆ jang lơ tơdrong, đei lơ tơdrong jang hăt hot, ‘nao, tơnap tap mă lei Kuô̆k hô̆i hlôi tơgoăt mĭnh ƀơ̆r đon, tơplih ‘nao, akŏm jơhngơ̆m đon păng jơ ‘năr, jang kiơ̆ ‘lơ̆ng rim tơdrong jang kơdih lơ̆m tơdrong jang pơjing khôi luơ̆t, dăr lăng hơlen păng tơchơ̆t rim tơdrong kăl kơ teh đak.

Sơnăm 2025 teh đak mơ̆t lơ̆m chăl hle, chăl atŏk tơ iung pran kơtang kơ hơdrĕch hơdrung hăm lơ tơdrong hơvơn păng long mơ̆t lĕch dih băl, hăm hơnăp jang ‘noh Hơnih bơ̆ jang pơjing khôi luơ̆t, hơnih jang tang măt kăl hloh kơ kon pơlei, hơnih bơ̆ jang chĕp pơgơ̆r tơm kơ Teh đak, Kơ iĕng kơdră so Kuô̆k hô̆i Uông Chu Lưu lui akhan Kuô̆k hô̆i gô jang keh đang tơdrong jang kơdih, tơgăl hăm jơhngơ̆m đon lui yom đơ̆ng bơngai tăh hla păng kon pơlei lơ̆m teh đak; adoi sơkơ̆t hơdăh, oei hơnơ̆ng lăng ba păng iung jang tơgop tŏ sĕt jơhnơ̆m đon lơ̆m tơdrong atŏk tơ iung atŭm kơ teh đak păng kơ Kuô̆k hô̆i.