Jang kiơ̆ Trong jang 214 găh sut hnam pơgia, hnam hiah hiok, Anih vei lăng kon pơlei dêh char Đắk Lắk pơjao kơ Kŏng an dêh char pơgơ̆r, jang hơdai hăm Anih vei lăng găh Ming man, Anih vei lăng Jên hu, dôm tơring păng dôm anih jang ƀơm truh pơgơ̆r man 4.285 tŏ hnam vă pơjao asong ăn dôm ŭnh hnam dơnuh hin, ŭnh hnam vă jê̆ dơnuh hin lơ̆m dêh char lơ̆m sơnăm 2025. Lơ̆m kơsô̆ âu đei hloh 1.650 ŭnh hnam kon kông kơ tă anih.

Akŏm jên pơm hnam ‘noh 342,8 ti hlak jên. Kơsô̆ jên tơgŭm man ‘nao 1 pôm hnam ‘noh 80 triệu hlak jên. Dôm tơring, anih jang tơ̆ Đắk Lắk hơnơ̆ng hơdrin tơroi tơbăt, krao hơvơn tơpôl vang tơgop, tơgŭm dơ̆ng jên, tơmam, năr jang vă man dôm tŏ hnam ‘lơ̆ng ƀiơ̆ păng vei sơđơ̆ng ƀlep khei ‘năr pơkăp jang, tơgŭm dôm ŭnh hnam mơmat tat jăh sơđơ̆ng tơdrong hơrih sa.