Jô̆ truh đĭ jăl I/2025, lơ̆m dêh char Dak Nông đei 70671 ŭnh hnam tŏk bok tŏk iŏk jên đơ̆ng Hơnih mong jên Tơgŭm djru tơpôl, hăm kon jên tŏk iŏk vă jê̆ 4.800 ti hlak jên. Lơ̆m ou, hloh 24.000 ŭnh hnam kon kông hăm kon jên ăn tŏk iŏk hloh 1.655 ti hlak jên. Đĭ đăng ŭnh hnam iŏk yua kon jên ou jơnei hơ iă. Ŭnh hnam ƀok K’Biêng oei lơ̆m pơlei Phai Kol Pruđăng, tơring Dak Nia, pơlei tơm Gia Nghiã đei 2ha teh. Ŭnh hnam tŏk iŏk 90 triu hlak jên đơ̆ng Hơnih mong jên tơgŭm djru tơpôl vă vei lăng năng tông chehphe păng tiu iŏk đei jơnei hơ iă. “Sơnăm ou phĕ ot chehphe đei dang 2 tân 5 tă truh 3 tân găr păng pơ đĭ tiu dơ̆ng. Chă tĕch jei đei 200-250 triu hlak jên lơ̆m mĭnh sơnăm. Đĭ đăng jei gơnơm đơ̆ng kon jên tŏk iŏk đơ̆ng Hơnih mong jên tơgŭm djru tơpôl lơ̆m dôm sơnăm ou ki. ‘Nao ou ba oei tok iok dơ̆ng 12 triu hlak jên vă koel đak koai, răt kơthŭng mong đak, gơnơm kơ ‘noh mă đei đak sŏ nhă rơgoh, sơđơ̆ng ăn jơhngơ̆m jăn kơ ŭnh hnam nhôn.”

Truh dang ei, akŏm jên đơ̆ng Anih mong jên tơgŭm tơpôl dêh char Gia Lai đei  7.631 ti hlak jên, tŏk 153 ti hlak jên pơting hăm blŭng sơnăm, lơ̆m noh jên jang tơring đei 598 ti hlak jên. Khŭl kang ƀô̆ asong tŏk iŏk jên hlôi jang hơdai kơjăp hăm kang ƀô̆ dôm khŭl jang chĭnh trĭ - tơpôl, hăm tơdrong jang Grŭp ‘mơ ‘met păng tŏk iŏk jên tơ̆ pơlei pơla tơring kon pơlei oei. Gơnang đơ̆ng ‘noh, vă đĭ đăng dôm ŭnh hnam tŏk iŏk jên tă kơ iŏk yua ƀlep tơdrong ngăl.

Kră pơlei Ksor Biếc oei tơ̆ plei Rơng, xăh Pờ Tó, apŭng Ia Pa roi tơbăt.

“Hơdrol ki ĭnh tŏk iŏk jên đơ̆ng anih mong jên vă răt rơmo, ĭnh tŏk iŏk 30 triệu, đơ̆ng ‘noh răt 3 tŏ rơmo. Đơ̆ng rŏng 5 sơnăm ‘noh ĭnh tĕch rơmo vă iŏk jên kla dơ̆ng ăn kơ anih mong jên, păng ĭnh đĭ kla đang bơih. Dang ei ‘noh akŏm hơtŏk tơiung mŭk drăm ŭnh hnam đĕch”.