Tơdrong tơchơ̆t 29 đơ̆ng Anih tơm pơtho pơhrăm vă vei lăng ‘lơ̆ng tơdrong pơtho thim, hŏk thim
Thứ tư, 14:57, 19/02/2025 VOV/Dơ̆ng tơblơ̆ VOV/Dơ̆ng tơblơ̆
VOV4.Bahnar - Pơtho thim, hŏk thim jĭ tơdrong ‘mĕh vă tôch tơgăl đơ̆ng 1 kơsô̆ hŏk tro păng thây kô. Mă lei, hơdai hăm tơdrong ‘mĕh vă đơ̆ng kơdih, kŭm hơnơ̆ng đei tơdrong pơgŏ hŏk tro năm hok thim hăm lơ trong pha ra băl. Đơ̆ng ‘năr 14/2/2024, Tơdrong tơchơ̆t 29 đơ̆ng Anih tơm vei lăng pơtho pơhrăm chih hơdăh tơdrong pơtho thim, hŏk thim hlôi đei tơmât yoa. Pơting hăm tơdrong hơgăt oei yoa hrei ‘nâu, tơdrong tơchơ̆t ‘nao âu đei lơ tơdrong plơ̆ng, pơm ăn lơ bơngai tơrek vang tơgop lơ nơ̆r pha ra băl brei drou. Anih tơm vei lăng pơtho pơhrăm pơma hơdăh, đon tơchĕng đơ̆ng anih tơm ưh đei kâm pơtho thim, hok thim, mă lei athei đei dôm tơdrong hơgăt mă lăp vă vei lăng ‘lơ̆ng ƀiơ̆ tơdrong pơtho thim, hŏk thim lơ̆m păng ‘ngoăih kơ hnam trưng:

Đei kon oei hŏk jăl mônh, mă lei mŏ Nguyễn Thu Hương tơ̆ quận Hai Bà Trưng, plt Hà Nội ưh ăn kon năm hŏk thim tơ̆ ‘ngoăih kơ hnam trưng, yoa kon đĭ hŏk oei kơtă tơ̆ hnam trưng bơih. Yoa thoi noh, mưh Anih tơm vei lăng pơtho pơhrăm tơlĕch tơdrong tươchơ̆t 29 chih hơdăh tơdrong pơtho thim, hŏk thim, mŏ ƀôh tôch hơiă păng tôch tơgŭm: “Inh tôch lăp hăm tơdrong hơgăt găh tơdrong hŏk jăl mônh ưh gơ̆h pơtho thim dôm môn hŏk tơm. Yoa lơ̆m khei ‘năr hŏk jăl 1, inh tơchĕng tơdrong hŏk tơ̆ hnam trưng đei pơtho ăn đe kon tôm bơih, đe kon mon kŭm hŏk prăt năr tơ̆ hnam trưng bơih, tơdăh hŏk thim dơ̆ng tơ̆ kơmăng ‘nŏh tôch lap. Tơdăh hŏk thim dơ̆ng nŏh mă trŏ đe kon mon chă hŏk ngôi dôm môn čhơ̆, hơri hơxoang mă lăp hăm sơnăm đe sư đĕch.”

Tơ̆ Đắc Lắc, đơ̆ng rŏng kơ Tơdrong tơchơ̆t 29/2024/TT-BGDĐT đơ̆ng Anih tơm vei lăng pơtho pơhrăm tơlĕch đei yoa đơ̆ng ‘năr 14-2, lơ hnam trưng tơ̆ dêh char Đắk Lắk hlôi gơ̆t lê̆ tơdrong pơtho thim, hơmet ming trong pơtho pơhrăm mă lăp hăm tơdrong hơgăt ‘nao. Dôm hnam trưng tơ̆ Đắk Lắk kŭm roi tơbăt tơdrong hơgăt ‘nao ăn rim thây kô, hŏk tro păng mĕ ƀă hŏk tro, atŭm hăm ‘nŏh gơ̆t pơđĭ tơdrong pơtho thim vă hơlen năng, hơmet ming trong pơtho pơhrăm mă lăp. Ƀok Võ Ngọc Nam, Hiê̆u trơng Hnam trưng Trung học Cơ sở Phan Chu Trinh (plt Buôn Ma Thuột, dêh char Đắk Lắk) ăn tơbăt, hnam trưng hlôi roi tơbăt tơdrong tơchơ̆t truh đĭ đăng thây kô, mĕ ƀă hŏk tro păng đe ŏh hŏk tro. Atum hăm ‘nŏh, athei đĭ đăng thây kô kĭ pơkăp pơm kiơ̆ mă ‘lơ̆ng tơdrong hơgăt pơtho thim, hŏk thim. Găh noh dơ̆ng, hnam trưng kŭm hơlen năng, hơmet ming trong pơtho vă pơm lăp hăm tơdrong tơchơ̆t. 

Kô Nguyễn Thị Thu Hiền, kô pơtho tơ̆ Hnam trưng Trung học Cơ sở Phan Chu Trinh tơroi, Tơdrong tơchơ̆t 29 jĭ trong jang tôch trŏ. Găh tơdrong nai, lơ mĕ ƀă hŏk tro oei ‘mĕh kon hŏk iŏk dơ̆ng lơ tơdrong hlôh vao, mă loi ‘nŏh hăm hŏk tro lăm 9, lăm 12 oei vă thi lơ̆m dôm ‘măng thi tôch gĭt kăl. Yoa thoi noh, athei đei nơ̆r pơtho tơƀôh mă hơdăh vă mĕ ƀă hŏk tro huei kơ pơngơ̆t, ưh băt vă ăn kon năm hŏk thim tơ̆ yơ.

Kiơ̆ ƀok Võ Đức Tân, ƀă hŏk tro hŏk lăm 11 tơ̆ apŭng Cư Kuin, dêh char Đắk Lắk, Tơdrong tơchơ̆t 29 tơgŭm ăn hŏk tro đei dơ̆ng lơ jơ ngôi pơchơt, tơjur ƀiơ̆ tơdrong kơhret đơ̆ng rŏng kơ hŏk pơhrăm. Mă lei, hăm hŏk tro ƀât hơtuch jăl, tơdrong ôn ƀai thi tôch gĭt kăl. Đei kon oei hŏk lăm 11, ƀok hơpơi ‘mĕh, anih vei lăng jăh tơlĕch nơ̆r pơtho mă hơdăh vă hŏk tro gơ̆h ôn ƀai tôm mă ưh đei pơm glăi yă kiơ.

Kiơ̆ Tơdrong tơchơ̆t 29 đơ̆ng Anih tơm vei lăng pơtho pơhrăm, ưh đei pơih lăm pơtho thim ăn hŏk tro jăl mônh, ưh jô̆ pơtho găh hơri hơxoang, čhơ̆ rup, tơplŏng kơdâu, pơtho tơƀôh găh trong arih xa. Thây kô ưh gơh pơtho thim ‘ngoăih kơ hnam trưng vă thu jên hăm hŏk tro mă thây kô ‘nŏh oei pơtho tơ̆ hnam trưng. Tơdrong hơgăt ‘nâu vă găn ƀiơ̆ thây kô chông hŏk tro kơdih pơtho hŏk thim tơ̆ ‘ngoăih, pơgŏ mĕ ƀă hŏk tro ăn kon năm hŏk thim, atŭm hăm ‘nŏh hơtŏk hơnăp jang vei lăng đơ̆ng thây, kô hiê̆u trơng hăm đe thây kô yoa sư vei lăng mưh chă pơtho thim tơ̆ ‘ngoăih.

Kiơ̆ yă Khúc Thị Huệ, Hiê̆u trơng Hnam trưng THPT Ngọc Hồi, apŭng Thanh Trì, Hà Nội, dôm tơdrong hơgăt lơ̆m tơdrong Tơchơ̆t 29 gô tơgop sek tơlang đei 1,2 tơdrong pơm tơtŏ đon tơpôl, mĕ ƀă hŏk tro ƀơm truh hŏk thim, pơtho thim tơ̆ hnam trưng păng ‘ngoăih kơ hnam trưng hrei ‘nâu. Hnam trưng kŭm pơm kiơ̆ ‘lơ̆ng dôm tơdrong hơgăt lơ̆m tơdrong tơchơ̆t kŭm nhen nơ̆rpơtho đơ̆ng Anih vei lăng pơtho pơhrăm Hà Nội: “Hnam trưng gơ̆t lê̆ ‘mơ̆i tơdrong ôn ƀai ăn hŏk tro đơ̆ng ‘năr 14/2. Sơnăm ‘nâu oei vă hơnơ̆ng ôn ƀai ăn đe oh hŏk ưh gơh lăm 12 athei pơtho ming dơ̆ng ưh iŏk jên vă hơmet ăn ‘măng thi tốt nghiệp. Hŏk tro lăm 12 tơ̆ hnam trưng mă lơ ‘nŏh hnam trưng kŭm tơlĕch trong ôn ƀai ăn đe oh, hơdai hăm dôm jơ hŏk hmă, đe thây kô kŭm chih tơlĕch lơ ƀai pơm pơlong năng, vă đe oh hŏk pơhrăm. Tơdăh ôn ƀai đơ̆ng rŏng kơ khei 5 ‘nŏh dang ei hnam trưng tam mă tơlĕch trong jang, yoa tơdăh ăn đĭ đăng grŭp lăm 12 hloi ‘nŏh ƀơm truh tơ̆ jên ôn ƀai ăn hŏk tro kŭm tôch lơ.”

Mă tơpă găh hŏk thim, pơtho thim ‘nŏh jĭ tơdrong ‘mĕh tôch tơgăl đơ̆ng thây kô, hŏk tro păng unh hnam hŏk tro. Phŏ Kơdră tơm vei lăng pơtho pơhrăm Phạm Ngọc Thưởng kŭm pơma hơdăh, đon tơchĕng đơ̆ng Anih tơm ‘nŏh ưh đei kâm pơtho thim, hŏk thim, mă lei tôch kăl tơlĕch dơ̆ng dôm tơdrong hơgăt vă vei lăng ‘lơ̆ng tơdrong ‘nâu: “Tơdăh thây kô pơm kiơ̆ tôm păng pơtho trŏ jơ đơ̆ng kơdih păng hơlen năng lăp hăm đe kon mon ‘nŏh ưh kăl hŏk thim dơ̆ng, yoa đĭ lăp hăm tơdrong pơtho pơhrăm đơ̆ng hla ar bơih lĕ. Mă lei tơdrong ‘nâu kŭm ưh đei tôm đĭ đăng hloi ôh. Yoa nhen đei pơma tơ̆ kơpal hei, ‘nâu jĭ tơdrong ‘mĕh vă tôch tơgăl ‘năi, đe lơ hŏk tro hŏk thim vă hơtŏk đon rơgei ăn kơdih, kŭm đei ŏh hŏk thim vă roi hlôh vao ƀiơ̆. Đon tơchĕng đơ̆ng kơdră chĕp kơ̆l Anih tơm pơtho pơhrăm ‘nŏh jĭ khŏm vei lăng tơdrong ‘nâu mă trŏ hăm tơdrong hơgăt, pơm ăn tơdrong pơtho thim, hŏk thim păng tơdrong jang đơ̆ng thây kô roi trŏ ƀlep, sơđơ̆ng ‘lơ̆ng, pơm ăn um ai anih pơtho pơhrăm, kơ đe thây kô roi ‘lơ̆ng hơiă, roi đei đe lui yom.”

Tơdrong tơchơ̆t 29 đơ̆ng Anih tơm vei lăng pơtho pơhrăm tơlĕch ƀât sơnăm hŏk tŏk bŏk đei pơtho hŏk pơhrăm kơna kŭm ƀơm truh trong vă pơtho pơhrăm đơ̆ng blŭng sơnăm đơ̆ng dôm hnam trưng păng kơdih kâu đe oh hŏk tro, mă loi hăm đe oh hŏk tro hơtuch jăl. Mă lei, lơ nơ̆r pơma akhan, tơdăh dôm hnam trưng, thây kô, khul kơdră tơring bơ̆ jang ‘lơ̆ng dôm tơdrong hơgăt đei tơlĕch lơ̆m Tơdrong tơchơ̆t 29 vă hơnhăk tơdrong pơtho thim, hŏk thim năm trŏ trong, găn ƀiơ̆ tơdrong pơm glăi pơgŏ hŏk tro năm hŏk thim pơm tơtŏ đon tơpôl./.

VOV/Dơ̆ng tơblơ̆

Viết bình luận

TIN CÙNG CHUYÊN MỤC

Video