VOV4.Êđê - Khă gơ̆ dưi pŏk ngă, ƀiădah gru hmô rông hlô rang mnga mă ki leh anăn êđai hlô ti kdriêk Mang Yang, čar Gia Lai ba wĭt leh klei tŭ dưn tal êlâo jăk. Gru hmô anei lŏ đru kơ mnuih ƀuôn sang ti alŭ wăl, boh nik dŭm gŏ êsei mnuih djuê ƀiă bi mlih hdră mkra mjing čiăng mđĭ kyar bruă duh mkra, mđĭ mlih klei hdĭp mda.

Vũ Văn Dân, ti êpul anôk dôk mrô 4, wăl krah Kon Dỡng jing sa hlăm dŭm gŏ sang dưi mâo klei đru mơ̆ng kdriêk Mang Yang, čar Gia Lai hlăm bruă rông hlô rang mnga. Vũ Văn Dân brei thâo, kdriêk Mang Yang brei kơ gŏ sang ñu rông 2 drei hlô rang mnga knô lehanăn sa drei hlô rang mnga ana mơ̆ng mlan 6 thŭn leh êgao. Dưi mâo klei đru mơ̆ng phung knuă druh thơ̆ng kơ bruă rông hlô rang mnga lehanăn klei thâo êjai dôk răng kriê. Truh kơ ară anei hlô rang mnga mơ̆ng gŏ sang ñu rông dưi mâo klei đĭ kơ prŏng jăk, kčưm dơ̆ng mđai lehanăn dơ̆ng mâo mă ki mda.“Klei răng kriê hlô rang mnga jing ênưih, brei ƀơ̆ng rơ̆k msĕ êman, hla kneh, ana ki đruah ñu dưi ƀơ̆ng sơaĭ. Hlăm aguah luič hlăm ƀrô 30 mnĭt čiăng kriê dlăng kơ ñu. Tơdah truh kơ yan hjan srăng luič hlăm ƀrô 10 mnĭt khăt hla rơ̆k lehanăn brei ñu ƀơ̆ng jih hruê. Leh truh kơ mmông mâo ki mda lŏ brei ñu bơ̆ng thiăm mtei, ktơr, hbei ƀlang čiăng ñu đĭ hĭn kơ klei čăt ki mda. Kâo ăt čiăng lŏ pŏk phai prŏng hĭn čiăng mđĭ bruă duh mkra hlăm gŏ sang”

Khădah bruă anei jing mrâo, ƀiădah dŭm gŏ sang dưi mâo leh sơaĭ ki mda hlô rang mnga ba čhĭ lehanăn mâo leh êđai mơ̆ng hlô rang mnga anei. Gŏ sang ayŏng Nông Văn Đạo, dôk ti ƀuôn Đê Bơ Tưk, să Đăk Jơ Ta, kdriêk Mang Yang jing sa klei bi hmô. Tui hlue ayŏng Nông văn Đạo, êlâo dih hlăm gŏ sang tuôm rông bê, êmô ƀiădah mnơ̆ng rông kreh tuôm hŏng klei ruă, ênoh čhĭ amâo mâo hơĭt. Ayŏng Nông Văn Đạo lač klă bruă rông hlô rang mnga anei kčưm mâo boh tŭ dưn kơ bruă duh mkra, djŏ hŏng klei rông mnơ̆ng dhơ̆ng hlăm mnuih ƀuôn sang, boh nĭk anôk dôk mâo lu mnuih djuê ƀiă lehanăn srăng mkŏ mjing hdră duh ƀơ̆ng sui thŭn kơ mnuih ƀuôn sang čiăng mâo klei hơĭt hlăm klei hdĭp.“Gŏ sang mâo klei lač jăk kơ knŭk kna kyua duh mĭn leh kơ hmei, dưi ngă bruă rông hlô rang mnga anei truh kơ mnuih ƀuôn sang. Êlâo hĭn jing mâo boh tŭ dưn êdi kyua bruă anei. Gŏ sang kâo rông ka mâo sa thŭn ôh ƀiădah dưi uă leh 2 gưl ki mda lehanăn lŏ mâo mđai sa drei êđai hlô rang mnga. Kâo ƀuh bruă anei jing jăk êdi leh anăn kâo čiăng lŏ pŏk phai anôk rông jing prŏng hĭn. Rông lu jing êpul čiăng ngă klei bi hmô kơ mnuih ƀuôn sang dưi mâo klei hriăm lehanăn tui ngă sơnăn.”

Trần Nam Danh, khua hlăm adŭ bruă duh mkra lehanăn bruă nah gŭ kdriêk Mang Yang, čar Gia Lai brei thâo, bruă rông hlô rang mnga dưi mkŏ mjing kyua mâo klei đru mơ̆ng keh kyua klei kreh knhâo mơ̆ng kdriêk lehanăn ênoh prăk mơ̆ng mnuih ƀuôn sang. Hŏng 5 gŏ sang mâo klei đru kyua klei hdĭp dleh dlan, bruă rông hlô kčưm mâo boh tŭ dưn, đru mnuih ƀuôn sang mâo hdră duh bơ̆ng lehanăn mâo klei hdĭp hơĭt mơ̆ng bruă rông hlô rang mga anei. “Êjai ngă hdră êlan anei hmei ăt mâo klei bi mguôp hŏng dŭm êpul bi mguôp hlăm să, leh mâo uă ki mda hlô rang mga srăng mâo anôk ba čhĭ čiăng mnuih ƀuôn sang mâo klei hơĭt hlăm klei rông hlô rang mnga anei. Lehanăn hlăm dŭm hruê mmông leh êgao mnuih ƀuôn sang tui ngă hdră rông hlô anei ƀuh leh boh tŭ dưn, kyuanăn mâo klei hur har lehanăn mâo klei čiăng mơ̆ng pô lŏ mđĭ lar hdră rông hlô anei hlăm kdriêk.”

Hŏng dŭm boh tŭ dưn mơ̆ng bruă rông hlô rang mnga čiăng mă ki mda lehanăn mjut êđai hlô dưi đru leh kơ mnuih ƀuôn sang hlăm kdriêk Mang Yang dưl bi mlih hlăm bruă duh ƀơ̆ng, boh nik hlăm dŭm anôk mâo lu mnuih djuê biă. Kyuanăn dưi đru bi hmar bruă lăm lui klei ư̆ êpa, bi hrŏ klei ƀun ƀin hlăm dŭm kdriêk mâo mnuih ƀuôn sang dôk hlăm klei hdĭp dleh dlan msĕ si kdriêk Mang Yang, čar Gia Lai