Anei dưi dlăng jing gru kruăk yuôm bhăn hlăm klei gĭr ba kphê jăk Robusta Việt Nam truh lu hĭn hŏng Dhŭng Korea ăt msĕ mơh hlăm tar rŏng lăn. Hluê si mta phŭn bi klă, dua êpul bruă bi tŭ ư bi mguôp hluê dŭm klei mtrŭt mđĭ klei mnia mblei, đru mđĭ ênoh kphê jăk. Hŏng klei bi mguôp anei, Êpul bruă kphê Ƀuôn Ama Thuô̆t hmăng hmưi kphê dưi mâo klei găl mâo anôk ba čhĭ, dŭm sang mnăm kphê specialty  leh anăn phung blei yua Dhŭng Korea. Trịnh Đức Minh, Khua êpul bruă kphê Ƀuôn Ama Thuô̆t lač, knăm bi klă bi êdah klei tŭ yap mơ̆ng êpul êya kphê hŏng Robusta Việt Nam.

“Ară anei klă sĭt drei dưi iêo jăk dŭm êpul bruă kphê tar rŏng lăn ăt msĕ mơh dŭm knơ̆ng bruă kphê uêñ mĭn kơ kphê Robusta Việt Nam. Klei anei mâo boh tŭ dưn sui, kyua kphê jăk arăng pioh kơ Arabica lu hĭn, leh anăn ka mâo ôh klei dlăng mtăp mđơr hŏng Robusta, leh anăn dŭm klei gĭr hlăm wưng êgao bi êdah klă boh tŭ dưn klă sĭt, iêo jak êpul êya kphê jăk tar rŏng lăn.”

Ăt hlăm hdră, kphê jăk MISS EDE  ăt bi klă hră bi hdơr hŏng Coffee Myungga - anăn knăl kphê jăk mơ̆ng Dhŭng Korea, mâo leh 35 thŭn đĭ kyar. Bi mguôp kñăm kơ bruă mđĭ kyar kluôm dhuôm kphê Robusta jăk Việt Nam, mơ̆ng klei hrŏng ruah, mđĭ kyar mnơ̆ng dhơ̆ng djŏ guôp hŏng phung blei yua Dhŭng Korea čhi mnia ti dŭm sang mnăm kphê specialty, anôk čhĭ hliê leh anăn dŭm anôk čhĭ mnia online.