Hlăm gưl hjan êa lêč knhal jih mlan 11 mrâo êgao, krĭng pla djam mơ̆ng čar Lâm Đồng hmăi kjham. Mbĭt hŏng dŭm êbâo ha djam, boh kroh dôk hlăm wưng hrui pĕ jhat rai jing hdră ñuăl, sang ală kĭng, lăn êa đung ngă kơ bruă lŏ wĭt pla djam jing dleh dlan hĭn. Rai kplŭk jing boh blŭ djŏ hĭn čiăng lač kơ dŭm anôk pla djam mtam, boh kroh ktuê krông Da Nhim găn dŭm să D'Ran, Ka Đô, Đơn Dương, Quảng Lập čar Lâm Đồng.

Mbĭt hŏng lu ênhă djam mtam, klei hmăi kjham hĭn hŏng phung pla djam mtam ti alŭ wăl anei jing kdrăp sang ñuăl, sang ală kĭng hŏng ênoh bi liê kơ 1.000m2 truh kơ dŭm êtuh êklăk prăk.

Ti anăp dŭm klei hmăi hŏng phung pla djam, dhar bruă lŏ hma leh anăn Bruă sang čư̆ êa dŭm să krĭng pla djam mơ̆ng čar Lâm Đồng ăt hluê ngă bruă mtrŭt mđĭ bruă lŏ hma, ngăn prăk čiăng đru kơ mnuih ƀuôn sang krŭ wĭt bruă mkra mjing.