Yan hrui pĕ kphê 2025–2026 ti Dak Lak dôk mâo ti djăp anôk hlăk yan adiê dleh dưi ksiêm dlăng, mâo adiê hjan sui lehanăn klei êa lip ngă. Čiăng rơ̆ng hnơ̆ng tŭ jăk, boh tŭ yuôm mơ̆ng anôk bruă yuôm bhăn anei ti alŭ wăl, Knơ̆ng bruă sang čư̆ êa čar Dak Lak ba mdah leh Asăp mtrŭn kơ bruă pla mjing, hrui pĕ, mkra mjing lehanăn hrui blei kphê yan thŭn 2025 – 2026, kñăm rơ̆ng boh tŭ bruă duh mkra, hnơ̆ng tŭ jăk lehanăn mđĭ kyar anôk bruă kphê hluê si hdră hơĭt kjăp.

Knơ̆ng bruă sang čư̆ êa čar Dak Lak mñă klă leh klei čiăng êdi mơ̆ng bruă hrui pĕ kphê djŏ wưng, djŏ hnơ̆ng ksă, rơ̆ng hnơ̆ng tŭ jăk, amâo dưi pĕ mtah ôh. Dŭm alŭ wăl mâo gĭt gai brei mđĭ hdră mtô mblang, mtrŭt mjhar ƀĭng ngă lŏ hma amâo hrui pĕ kphê mtah, ksiêm dlăng kjăp bruă hrui pĕ kphê, amâo blei kphê mda, kphê mtah, amâo thâo klă phŭn agha, amâo rơ̆ng hnơ̆ng tŭ jăk. Knơ̆ng bruă sang čư̆ êa čar Dak Lak ăt mtă kơ êpul kahan ksiêm mđĭ hdră rơ̆ng kjăp klei êđăp ênang hlăm yan hrui êmiêt, pral gang mkhư̆, bi kdơ̆ng hŏng klei tlĕ kphê, mđĭ amâo dah mtrŭn ênoh kphê./.