Aguah ưm leh gưl angĭn êbŭ, boh sang điêt mrâo mâo ung mô̆ amai Nguyễn Thị Xuân ti alŭ Hòa Mỹ, să Xuân Cảnh mkra mâo ênoh 35 êklăk prăk mkiêt mkriêm jih sa thŭn ară anei kpŏk jih čuôr. Amâo lŏ hmao ênguôt, ung mô̆ amai lŏ huai mdoh, gang djiêu gah găn čiăng mâo anôk gang angĭn gang mđiă. Klei mơak truh hlăk amai mâo klei hưn dưi đru 10 êklăk prăk mơ̆ng alŭ wăl čiăng lŏ mdơ̆ng čuôr sang.

 “Ară anei êlâo hĭn kâo srăng lŏ mkra lehanăn pơ̆k čuôr sang tal êlâo hĭn. Mkra kjăp čuôr sang mâo anôk dôk êlâo, bi bruă mkăn tĭng mă êdei, mâo prăk srăng mkra, bi ka mâo lui snei êjai”.

Amâo djŏ knŏng pưk sang mnuih ƀuôn sang, anôk bruă nah gŭ ăt jhat rai kjham. 81 gơ̆ng pui ebuh, giăm 400.000 čô amâo pui kmlă yua. Anôk bruă pui kmlă ba nao leh giăm 900 čô, êbeh 50 kdrăp mnơ̆ng, kah mbha hdră mă bruă jih hruê mlam. Tlâo hruê mlam, lŏ mâo pui yua ti kluôm krĭng nah Ngŏ. Trần Văn Thuận – Khua Anôk bruă Pui kmlă Dak Lak, brei thâo:

 “ Hmei mâo hdră kčah hlăm 3 hruê srăng lŏ dưi mkăp kơ jih 100% ênoh mnuih ti krĭng nah Ngŏ mâo pui kmlă yua”.

Ti dŭm sang hră, êbeh 70 boh adŭ hriăm, 26 boh sang hră kpŏk čuôr, mčah ală kĭng. Nguyễn Hồng Huệ, Khua sang hră gưl hđeh điêt Xuân Quang 1, sa hlăm dŭm boh sang hră luič liê kjham mơ̆ng să Phú Mỡ brei thâo, amâo guôn klei gĭt gai, phung nai, phung amĭ ama hđeh mbĭt hŏng êpul lĭng kahan – kahan ksiêm alŭ wăl pral nao msir mghaih boh klei.

 “Iêu ba êpul lĭng kahan, kahan ksiêm nao đru kơ sang hră, hŏng djăp hdră čiăng bi mdoh sang hră, mjing klei găl kơ phung hđeh hnưm dưi lŏ nao sang hră”.

Mlam adiê hjan angĭn êbŭ ngă lu klei luič liê, truh aguah, dŭm êpul ba anăp ti dŭm alŭ wăl mơ̆ng Dak Lak truh leh ti anôk, alŭ wăl luič liê kjham. Êpul kahan ksiêm truih mdjiê klei pui ƀơ̆ng lehanăn đru dŏng mnuih mâo klei truh ba nao kdrăp mnơ̆ng, êdah êdâo mbĕ mnuih ƀuôn sang lehanăn đru lŏ mdơ̆ng wĭt pưk sang. Thượng tá Phạm Ngọc Vinh, Kơiăng khua Adŭ kahan ksiêm truih mdjiê klei pui ƀơ̆ng lehanăn đru dŏng mnuih mâo klei truh, mơ̆ng Phŭn bruă Kahan ksiêm čar Dak Lak brei thâo:

 “Leh angĭn êbŭ găn, êpul kahan ksiêm truih mdjiê klei pui ƀơ̆ng lehanăn đru dŏng mnuih mâo klei truh mơ̆ng čar bi hgŭm hŏng dŭm êpul djŏ tuôm ba nao leh dŭm êtuh čô knuă druh mbĭt hŏng kdrăp mnơ̆ng nao đru kơ mnuih ƀuôn sang. Tal êlâo hĭn jing đru huai mdoh êlan klông, sang hră, đru kơ mnuih ƀuôn sang amâo anôk jưh knang, dŭm boh sang đru rông ba mnuih hlăm ala ƀuôn, mkra sang dlưh, kpŏk čuôr, lŏ mdơ̆ng pưk sang čiăng kơ mnuih ƀuôn sang msir mghaih klei truh leh klei angĭn êbŭ ngă”.

Hluê si klei ksiêm yap tal êlâo, klei luič luič liê kluôm čar êbeh 2 êbâo êklai prăk. Čar mkăp leh 80 êklai prăk đru kơ dŭm gŏ sang mâo mnuih djiê, dlưh sang, kpŏk čuôr; mbĭt anăn ba nao êpul lĭng kahan, kahan ksiêm nao grăp alŭ lŏ pơ̆ng tôl, mdơ̆ng sang, rơ̆ng mâo djăp êa doh yua, hdră mdrao mgŭn, gang mkhư̆ klei ruă tưp. Khua knơ̆ng bruă sang čư̆ êa čar Dak Lak Tạ Anh Tuấn mñă:

 “Anei jing sa klei lông dlăng hŏng bruă knŭk kna alŭ wăl 2 gưl hlăm hdră gang mkhư̆ klei yan adiê ngă. Hmei ƀuh bruă knŭk kna 2 gưl hlăm mmông anei mâo leh klei ngă bruă pral hĭn, klă sĭt, tŭ dưn hĭn. Ară anei dôk mđing msir mghaih klei kơ êlan klông, pui kmlă, mdrao mgŭn, amâo lui bluh đĭ klei ruă tưp, mbĭt anăn mâo hdră đru kơ sang dlưh, kpŏk čuôr čiăng kơ mnuih ƀuôn sang hnưm bi hơĭt klei hdĭp.

Hlăm hdră ksiêm dlăng, Kơiăng khua knŭk kna Mai Văn Chính čih yap klei pral, mjêč mơ̆ng Dak Lak, boh nik hlăm bruă mbĕ mnuih ƀuôn sang mơ̆ng dŭm krĭng huĭ hyưt, êpul lĭng kahan, kahan ksiêm nao leh ti anôk mâo klei truh kjham leh gưl angĭn êbŭ.

 “Bi ala Knŭk kna, Khua knŭk kna bi mni kơ čar Dak Lak pral mâo hdră gang mkhư̆ angĭn êbŭ mrô 13. Kâo ƀuh êpul bruă pui kmlă, lĭng kahan, kahan ksiêm nao đru msir mghaih klei kyâo êbuh, mdơ̆ng pư̆k sang, huai mdoh sang hră, jih jang ngă jăk sơaĭ. Mtă kơ jih jang ksiêm dlăng, ksiêm tĭng djăp ênŭm klei luič liê čiăng mâo hdră đru kčĕ, đru kơ prăk kăk kñăm msir mghaih”.

Angĭn êbŭ mrô 13 mâo pral, ai bi rai ktang êdi, jing klei lông dlăng mâo đăo tĭng leh mơ̆ng hnưm hŏng anôk bruă kđi čar lehanăn mnuih ƀuôn sang Dak Lak. Mơ̆ng klei lông dlăng anăn, klei thâo kiă kriê mơ̆ng anôk bruă knŭk kna alŭ wăl 2 gưl dưi bi mklă, anăn jing klei đăo knăl djŏ boh klei; pral, klă sĭt lehanăn giăm mnuih ƀuôn sang. Anei jing sa gru kruăk čiăng kơ čar mđĭ lar, lŏ dơ̆ng hgao jih klei dleh dlan, lông dlăng ti ktuê êlan mkŏ mkra anôk bruă kđi čar klă mmngač, tŭ dưn./.