VOV4.Êđê - Bi mlih mrô, ba yua kdrăp mrâo hlăm bruă pla mjing ngă lŏ hma hlăk lehanăn dôk đru mguôp yuôm bhăn bi mlih hdră pla mjing, hrui blei mnơ̆ng mơ̆ng lu ƀĭng ngă lŏ hma, anôk bruă duh mkra ti Dak Lak. Dŭm boh tŭ mơ̆ng bruă mlih mrô ba wĭt dôk đru kơ anôk bruă lŏ hma Dak Lak truh giăm hĭn hŏng hdră bi mrâo mrang kluôm.

Thŭn 2019, Nguyễn Văn Hiếu ti să Hoà Thuận, ƀuôn prŏng Ƀuôn Ama Thuôt mâo mkŏ leh klei ngă bruă hŏng sa anôk bruă duh mkra hlăm čar, pla mâo 1 sao boh trŏng msăm Nova. Ana trŏng msăm anei pla hlăm sang mŭng, hŏng hdră čŏng krih hjăn, ba yua kdrăp čih pioh hdră êlan dlăng kriê hlăm elektronik kăp ktuê ksiêm jih jang hnơ̆ng đĭ jing ana trŏng msăm. Leh dua thŭn lông ba yua hdră ngă bruă anei, hŏng lu klei tŭ dưn mâo ba wĭt, hŏng boh mnga jăk, Nguyễn Văn Hiếu lač, hdră mă bruă mrâo msĕ snei jing jăk êdi: “ba yua kdrăp mă bruă mrâo mrang đru bi hrŏ mơh ênoh bi liê. Hrŏ mơh ênoh mnuih ngă bruă, ba wĭt klei tŭ dưn prŏng êdi hŏng mnuih pla mjing. Boh nik hơĭt kơ anôk kăp hrui blei”.

Amâo mâo djŏ knŏng ba yua kdrăp mă bruă mrâo mrang hlăm klei pla mjing, lu mnuih pla mjing ti Daklak jhŏng mkŏ klei hâo hưn, hưn mdah boh mnga pô mâo hŏng mnuih blei yua hŏng jih jang hdră êlan mrô. Msĕ si Nguyễn Đình Vạn, să Čư̆ Nĕ, kdriêk Krông Ƀŭk. Mơ̆ng bruă mkra mjing kphê asăr mâo hnơ̆ng jăk ti krông Ƀŭk mâo tŭ yap leh jing djăp ênoh čuăn OCOP 3 mtŭ gưl čar, ñu čŏng mkŏ leh hlăm jih jang anôk mnia mblei hlue êlan elektronik pioh čhĭ mnia boh mnga pô mâô amâo lŏ guôn dŭm êpul dôk krah wah msĕ si êlâo ôh. Klei bi mlih anei đru leh ñu dưi mkriêm ênoh bi liê, pŏk phai anôk pla mjing kñăm mâo klei čhĭ mnia jăk găl lehanăn prăl hĭn: “Jih jang phung mblei mnia dưi ba yua sơăi đĭng blŭ thâo mĭn mŭt hlăm QR cord čiăng tui duah phŭn agha, arăng dưi thâo kơ mnơ̆ng anei mơ̆ng kbiă hriê, si pla mjing, mâo hră mơar êđăp ênang mơ̆... ti anôk pla mjing... Khădah mnuih blei yua amâo mâo djŏ jĕ giăm ôh, ăt dưi thâo ksiêm dlăng mơh. Msĕ snăn kơh klei đăo knang mơ̆ng phung blei mnia hŏng mnơ̆ng pô pla mjing dưi mđĭ hĭn”.

Tui si Nguyễn Hoài Dương, Khua knơ̆ng bruă lŏ hma čar Daklak, yua kdrăp mrô hlăk dôk jing bruă dưn yua yuôm bhăn kơ klei duh mkra pla mjing, Daklak bi liê leh êbeh 77 êklai prăk mkŏ mjing klei mă bruă mrô. Knơ̆ng bruă mâo leh hdră kơ klei bi mlih mrô hlăm bruă lŏ hma wưng thŭn 2021 – 2025, tă êlan truh kơ thŭn 2030. Hŏng klei ba yua kdrăp mrô duh mkra pla mjing phŭn tal êlâo mâo leh klei tŭ dưn jăk, hŏng klei kjăp hlăm bruă lŏ hma ti alŭ wăl: “Ngă klei bi mlih hdră mă bruă mrô jing leh kdrăp mă bruă ba klei bi mlih hĭn êdi kơ ênoh tŭ dưn, hnơ̆ng jăk lehanăn klei tŭ dưn hlăm bruă lŏ hma pla mjing. Boh sĭt brei ƀuh hlăm wưng êgao lu phung duh mkra lehanăn êpul hgŭm bruă mâo leh klei thâo săng kơ klei tŭ dưn ba yua hdră êlan bi mlih mrô, dưn yua hlăm kdrăp mrâo mrang hŏng lŏ hma pla mjing, lehanăn phŭn tal êlâo dơ̆ng ba wĭt leh klei tŭ dưn”.

Hdră mtrŭn mơ̆ng klei bi kƀĭn prŏng Đảng čar Daklak tal 17 mâo bi mklă leh: Bruă lŏ hma pla mjing jing yuôm bhăn hlăm klei duh mkra ti čar, truh 30% ênoh mâo ba wĭt ngăn prăk, lehanăn kơ klei mghaih msir bruă knuă mă, lehanăn hnơ̆ng hrui wĭt mâo hlăm brô kơ 65% ênoh mnuih. Kyuanăn, wưng kơ anăp, bruă lŏ hma pla mjing ti Daklak ktuh êyuh čiăng hlue ngă bruă bi mlih mrô kñăm bi leh jih jang mta kñăm mơ̆ng hdră mtrŭn. Nguyễn Đình Trung, Khua bruă Đảng čar Daklak lač: “Klei bi mlih mrô hlăm bruă lŏ hma pla mjing jing sa mta bruă prŏng, lehanăn srăng hmăi prŏng mơh djŏ tuôm hŏng klei hdĭp lehanăn klei duh mkra ti alŭ wăl. Kyuanăn, čar bi mklă leh hlăm dŭm bruă tal êlâo kơ klei bi mlih mrô snăn bruă lŏ hma jing bruă mđing hĭn. Čar mâo leh mơh hdră mtrŭn kơ klei bi mlih mrô, lehanăn mâo leh klei kuôl kă hŏng Êpul grŭp FPT ngă klei anei. Hlăm anăn bruă lŏ hma jing sa mta bruă kñăm hĭn tal êlâo”.

Klei bi mlih mrô hlăk jing hdră êlan yuôm bhăn kơ lu mta klei hlăm duh mkra ala ƀuôn, hlăm anăn amâo mâo kƀah ôh bruă lŏ hma. Hŏng čar truăn kơ bruă lŏ hma pla mjing msĕ si Daklak, snăn bruă bi mlih mrô knư̆ hĭn mơh brei jing yuôm bhăn kñăm mđĭ bi lar klei ñu kma pral mđĭ kyar hŏng tač êngao.

Hrue 19/8 leh êgao, Phŭn bruă lŏ hma mkŏ mjing leh klei mtrŭt mjhar bi mlih mrô hlăm lŏ hma pla mjing. Lehanăn mprăp jih jang hdra êlan kdrăp mrô, kiă kriê mrô krĭng pla mjing. Phŭn tal êlâo, Phŭn bruă lŏ hma hrŏng ruah klei bi hmô hŏng ana boh guga. Bruă bi leh, ba yua jih jang ênoh mkăp kơ klei kiă kriê, krĭng pla mjing, leh kơ anăn srăng truh kơ bruă kiă kriê mnơ̆ng ƀơ̆ng kơ mnơ̆ng rông, anôk rông mnơ̆ng hlăk dôk mâo klei mđing êdi, gĭr hŏng jih ai tiê hlăm bruă bi mlih mrô anei. Mơ̆ng anăn, kñăm bi mlih klei mĭn, hdră kiă kriê mrâo, mjing boh kdrŭt mđĭ kyar bruă lŏ hma hŏng klei kjăp hlue hdră êlan “bruă lŏ hma hŏng wăl hdĭp mda doh, krĭng ƀuôn sang ênuk mrâo, phung ngă lŏ hma kreh dhar” hlăm wưng kơ anăp./.

Hương Lý/ VOVTâyNguyên/Pô mblang: Y -Khem Niê