VOV4.Êđê Ti čar Dak Lak, dŭm êtuh ha hbei tao truh leh wưng hrui êmiêt. Khă snăn, mnuih pla hbei tao dôk amâo h’ĭt pĭt amâo mđao kyua ênoh čhĭ trŭn lehanăn amâo mâo mnuih blei.

Gŏ sang ayŏng Nguyễn Ngọc Ánh ti alŭ Mê Linh 2, să Ƀuôn Triêt, kdriêk Lăk, čar Dak Lak thŭn anei pla êbeh 7,5 ha hbei tao. Ñu rŭng răng êdi kyua truh leh wưng rŭ hbei, ênoh hrŏ dôk mă 4 truh kơ 5 êbâo hlăm sa kg ƀiădah kăn mâo pô êmuh blei lei. Hluê si klei tĭng mkă mơ̆ng ñu, hŏng ênoh čhĭ msĕ ară anei gŏ sang luč liê êbeh 700 êklăk prăk. “Msĕ grăp thŭn ênoh ăt êlưih ƀiădah mâo mơh 7 – 8 êbâo hlăm sa kg, pô čhĭ ăt mâo mơh prăk mnga. Bi thŭn anei amâo mâo pô blei mtam. Mnuih ƀuôn sang thŭn anei jing kjham êdi yơh, kyuadah prăk ba wĭt amâo dưi tla jih ôh prăk mưn lăn, ka yap ôh prăk duh bi liê leh anăn mưn arăng mă bruă”.

Ăt msĕ sơnăn, ayŏng Trần Văn Thanh ti să Ƀuôn Triă, kdriêk Lak ăt pla mjing êbeh 5ha hbei tao hŏng ênoh prăk duh bi liê êbeh 500 êklăk prăk thŭn anei luč hĕ hơăi mang: “Hbei tao giăm 5 mlan leh ƀiădah amâo mâo pô blei, ară anei anei dleh êdi dưi ba čhĭ, ênoh êlưih mơh. Ară anei lu mnuih čiăng lui hĕ ƀiădah ăt hơĭt, truh kơ mmông tla prăk amâo mâo lŏ djăp. Duh bi liê lu hĭn 2, 3 blư̆. Thŭn anei, sa ha luč mơ̆ng 100 truh kơ 150 êklăk prăk.

Bi Trần Văn Nghĩa, ti să Quảng Điền, kdriêk Krông Ana thŭn anei mưn lăn arăng pla êbeh 5 ha hbei tao. Lu hruê kăm êgao ñu duah mnuih blei ƀiădah kăn mâo pô blei lei. “Grăp thŭn truh mmông pô rŭ hbei mâo yơh arăng čŏng hriê blei, ƀiădah thŭn anei amâo mâo ƀuh ôh. Hmei blŭ hrăm leh hŏng diñu ƀiădah diñu hngha kyua kăn thâo bĭt anôk ba čhĭ lei, dleh dlan êdi. Thŭn anei klei luč liê amâo mâo dưi dêč ôh, thŭn êdei năng ai hmei lŏ ksiêm dlăng ya mta srăng pla mjing, tơdah mjeh mkăn ăt msĕ sơnei dleh êdi dưi bi hơĭt klei hdĭp.

Đoàn Văn Trường ti ƀuôn prŏng Ƀuôn Ama Thuôt, sa čô mgăt êdeh kreh hiu blei hbei tao ti dŭm čar krĭng Lăn Dăp Kngư brei thâo: Mơ̆ng knhal jih mlan 4 truh kơ ară anei, klei mkăp lu hĭn hŏng klei čiăng, kyuanăn ênoh hbei tao trŭn nanao. Phung blei mơ̆ng China ăt blei mă ƀiă ƀiă ăt lŏ ngă kơ ênoh hrŏ kjham hĭn. “Ară anei amâo thâo bĭt mjing ôh, msĕ kâo leh anăn lu mnuih mkăn hrui blei kăn si ngă srăng ngă kơ hbei tao anei. Kyuadah hbei tao ară anei lu êdi. Mâo đa đa diñu iêo hmei nao blei ƀiădah hmei kăn lŏ mâo anôk ba čhĭ, kyuanăn kăn thâo klă lei si ngă srăng ngă čiăng ba čhĭ hbei tao mơ̆ng mnuih ƀuôn sang.

Hluê si klei tĭng mkă mơ̆ng anôk bruă pla mjing leh anăn răng mgang ala kyâo mtâo (hlăm knơ̆ng bruă lŏ hma leh anăn mđĭ kyar krĭng ƀuôn sang čar Dak Lak), kluôm čar mâo hlăm brô 2.500ha pla hbei tao. Hlăm anăn, knŏng ti kdriêk Lak truh leh êbeh 1.200ha hbei tao. Nguyễn Viết Quang, k’iăng khua adŭ bruă lŏ hma leh anăn mđĭ kyar krĭng ƀuôn sang kdriêk Lak brei thâo: Ară anei dôk mâo êbeh 500ha hbei tao mơ̆ng mnuih ƀuôn sang ka rŭ ôh klei amâo mâo pô blei. “Ară anei adŭ bruă lŏ hma dôk bi mguôp hŏng dŭm să Ƀuôn Triă, ƀuôn Triêt čiăng blŭ hrăm hŏng phung hrui blei leh anăn dŭm knơ̆ng bruă hrui blei čiăng đru kơ mnuih ƀuôn sang ba čhĭ boh mnga bruă lŏ hma. Dhar bruă lŏ hma ăt mâo leh hră ktrâo lač, gĭt gai dŭm să mtă kơ ƀĭng ngă lŏ hma srăng pla mjing ti dŭm ênhă lăn hlăm dŭm hdră, klei čuăl mkă mơ̆ng dhar bruă”.