VOV4.Êđê - Bruă Đảng čar Dak Lak mrâo bi mguôp hŏng anôk bruă ksiêm hriăm bruă kđi čar ƀuôn prŏng Hồ Chí Minh mkŏ mjing klei kƀĭn trông kreh knhâo hŏng akŏ “Čar Dak Lak kñăm mđĭ kyar bruă lŏ hma hluê hnơ̆ng tŭ jăk leh anăn kjăp”.

Ti anôk bi kƀĭn trông, phung mă bruă kreh knhâo, phung mă bruă kriê dlăng hưn mthâo leh Hră hưn mdah mâo lu mta klei msĕ si: Klei mĭn mơ̆ng Đảng, hdră mtrŭn, hdră bhiăn mơ̆ng knŭk kna kơ hdră mđĭ kyar bruă lŏ hma hluê hnơ̆ng tŭ jăk, h’ĭt kjăp; Hdră mtrŭn mơ̆ng čar Dak Lak kơ hdră mđĭ kyar bruă lŏ hma hluê hnơ̆ng tŭ jăk, h’ĭt kjăp; Ba yua kdrăp mrâo hlăm bruă mđĭ kyar bruă lŏ hma ti alŭ wăl čar Dak Lak, Klei găl lehanăn lông dlăng hlăm hdră mđĭ kyar bruă lŏ hma čar Dak Lak hluê hdră mđĭ kyar tŭ jăk, h’ĭt kjăp. Dŭm bruă lehanăn hdră msir, hdră mnêč mđĭ kyar bruă lŏ hma h’ĭt kjăp hluê bruă mtrŭt mđĭ hdră duh mkra pla mjing dŭm mta mnơ̆ng pla phŭn ti Dak Lak. Boh klei lehanăn hdră msir mđĭ kyar bruă tuh tia mkra mjing kyâo čar Dak Lak…

Hluê si nai prĭn Võ Văn Lợi, Khua adŭ bruă ksiêm hriăm hdră Duh mkra, Sang hră ksiêm hriăm bruă kđi čar krĭng 3, Dak Lak hŏng klei găl êbeh 650 êbâo ha lăn ngă lŏ hma, hlăm anăn mâo êbeh 300 êbâo ha lăn hrah bazan, mbĭt hŏng yan adiê jăk găl. Dak Lak ênưih mđĭ kyar bruă lŏ hma hluê hdră bi hgŭm pla mjing mguôp hŏng bruă hrui blei mnơ̆ng dhơ̆ng, mjing boh kdrŭt mđĭ kyar bruă duh mkra ngă lŏ hma.“Brei drei čih mkra dŭm boh tŭ yuôm hluê hŏng hdră bi hgŭm čiăng kơ drei ba yua jih klei găl mâo, klei găl mâo anăn yơh jing phŭn duh bi liê tal êlâo hĭn. Hluê hŏng hdră bi hgŭm, hluê hŏng dŭm boh tŭ yuôm čiăng kơ drei bi hrŏ klei truh amâo jăk, rơ̆ng klei tŭ dưn, klei bi knar. Knŏng drei bi hrŏ klei amâo jăk, bi hrŏ klei lông dlăng snăn brei drei mâo hdră bi hgŭm”.

Hluê si Anôk bruă Đảng čar Dak Lak, hdră mđĭ kyar bruă lŏ hma hluê hnơ̆ng tŭ jăk, h’ĭt kjăp jing sa hlăm 6 bruă klam phŭn čiăng mđĭ kyar bruă duh mkra mơ̆ng čar, dưi lač ti Hdră mtrŭn Klei bi kƀĭn bruă Đảng čar tal XVII, wưng thŭn 2020-2025.  Khă snăn, kƀah klei mđrăm mbĭt hlăm bruă mđĭ hnơ̆ng tŭ yuôm, ka jai iêu klei duh bi liê hlăm bruă lŏ hma ba yua kdrăp mrâo… hlăk jing klei gun kpăk ngă kơ anôk bruă lŏ hma ka đĭ kyar djŏ hŏng klei dôk čang hmăng.

Mơ̆ng boh sĭt ti alŭ wăl, Nguyễn Quang Hà, Khua anôk bruă sang čư̆ êa kdriêk Êa Hleo lač, klei gun kpăk hlăm bruă lŏ hma Dak Lak ară anei, kbiă hriê mơ̆ng boh klei hdră čuăl mkă. Kyua anăn, brei mđing dlăng hĭn kơ hdră čuăl mkă bruă lŏ hma êlâo kơ bi trông kơ dŭm hdră msir mkăn.“Sui hŏng anei klei yăl dliê djŏ boh mnga luič ênoh čhĭ lehanăn mnuih ƀuôn sang bi tiŏ êran hluê si klei dôk čiăng mơ̆ng wăl anôk mnia mblei, ƀuh mnơ̆ng pla maoa ênoh bi kluh pla mnơ̆ng anăn. Klei anei mâo nanao kyua drei amâo ngă jăk hdră čuăl mkă. Hdră msir kâo ba mdah anăn jing brei drei ngă jăk hdră čuăl mkă, mkra mlih hdră čuăl mkă kơ grăp krĭng, djŏ guôp hŏng grăp mnơ̆ng pla kñăm ba wĭt boh tŭ dưn tuič hnơ̆ng hlăm 1 ênhă lăn pla.

Ti anôk bi kƀĭn trông, mbĭt hŏng dŭm klei blŭ mđing truh kơ hdră lŏ hma h’ĭt kjăp, phung bi ala ba mdah leh dŭm hdră msir đru mđĭ kyar bruă lŏ hma ba yua kdrăp mrâo msĕ si ba yua hdră mnêč kreh knhâo, jak iêu hdră duh bi liê, ba yua dŭm boh tŭ dưn mơ̆ng hdră tuh tia bi mrâo mrang 4.0 hlăm bruă lŏ hma. Mơ̆ng anăn mjing klei sa ai, mđrăm mbĭt, mjing boh kdrŭt, jăk găl kơ Dak Lak mđĭ kyar hdră bruă lŏ hma tŭ jăk, h’ĭt kjăp, hluê ngă mta kñăm mđĭ kyar “Bruă lŏ hma mrâo mrang, mnuih ngă lŏ hma kreh dhar, đĭ kyar”

Phạm Minh Tấn, K’iăng khua bruă Đảng čar Dak Lak brei thâo: Hdră mtrŭn Klei bi kƀĭn bruă Đảng čar tal XVII, wưng thŭn 2020-2025 bi mklă hdră mđĭ kyar bruă lŏ hma hluê hdră tŭ jăk, h’ĭt kjăp. Anei jing sa hlăm 6 bruă klam phŭn čiăng mđĭ kyar bruă duh mkra mơ̆ng Dak Lak. Mơ̆ng anăn, hdră bruă duh mkra dưi bi mlih hluê hdră jăk, hnơ̆ng kah knar đĭ kyar grăp thŭn mâo 8,5%. Bruă lŏ hma dôk mđing mđĭ kyar hluê hdră mđĭ hnơ̆ng tŭ jăk, hnơ̆ng mâo boh mnga mguôp hŏng klei čiăng mŏng wăl anôk mnia mblei, phŭn tal êlâo mđĭ lar leh klei găl mâo mŏng čar. Čiăng mkŏ mkra sa hdră bruă lŏ hma hluê hdră mrâo mrang, h’ĭt kjăp, alŭ wăl dôk mđing truh kơ kơ hdră mtrŭt mđĭ bruă duh bi liê lehanăn jak iêu hdră duh bi liê hlăm bruă anei./.