VOV4.Êđê - Ară anei tui dôk kčưm hlăm wưng hrui pĕ, ƀiădah phung pla tiu ti čar Dak Lak amâo mâo klei mơak kyua thŭn anei mâo ênoh ƀiădah amâo mâo boh. Msĕ hŏng gao sang ayŏng Võ Văn Quỳnh ti ƀuôn Tara, să Hoà Đông, kdriêk Krông Pač, čar Dak Lak, hlăm yan hrui pĕ anei tui duah djăp anôk mưn mnuih pĕ. Kyua klei ruă tưp Covid-19 dôk dleh dưi ksiêm dlăng kyuanăn bruă mưn mnuih mă bruă tuôm hŏng klei dleh dlan, ênoh prăk mưn 220.000 prăk hlăm sa hruê.

Êngao kơ anăn, tiu thŭn anei amâo mâo mboh, hnơ̆ng boh mnga hrŏ giăm mkrah wah, kyuanăn khădah ênoh ară anei mâo ti gŭ dlông 80 êklăk prăk hlăm sa tôn, prăk mnga kăn mâo lu lei. Hluê si klei tĭng mkă hŏng knơ̆ng bruă lŏ hma leh anăn mđĭ kyar krĭng ƀuôn sang čar Dak Lak, ară anei kluôm čar mâo êbeh 33.100 ha pla mjing tiu hŏng hnơ̆ng boh mnga giam 77.000 tôn. Hruê mmông êgao, dhar bruă lŏ hma mtă leh kơ mnuih ƀuôn sang amâo lŏ pŏk phai ênhă lăn pla tiu, knăm kơ dŭm mta ana kyâo hluê êlan kjăp.

Y-Ƀel pô mblang