VOV4.Êđê - Kñăm bi klă klơ̆ng dŭm hdră mtrŭn, hdră êlan, hdră mkăp mđĭ kyar bruă lŏ hma ti čar Dak Lak, mbĭt anăn, mñă klă klei ƀuăn rơ̆ng mơ̆ng čar hlăm bruă đru kơ dŭm knơ̆ng bruă, phung duh bi liê hriê duh bi liê, mkra mjing, mnia mblei. Hruê mgi, 29/4, čar Dak Lak srăng mkŏ mjing klei kƀĭn trông “mtrŭt mđĭ klei duh bi liê bruă lŏ hma čar Dak Lak thŭn 2022”. Čiăng thâo klă hĭn kơ klei găl, ai ktang, dŭm hdră êlan mtrŭt mjhar, bruă duh bi liê tal êlâo hĭn mơ̆ng čar, Hương Lý, pô čih klei mrâo kơ Sang mđung asăp blŭ Việt Nam krĭng Lăn Dăp Kngư, mâo klei bi blŭ hrăm hŏng Nguyễn Đình Trung, khua bruă Đảng gưl dlông, khua dlăng bruă Đảng čar Dak Lak:

- Ơ Nguyễn Đình Trung, Daklak dưi yap jing krĭng phŭn kơ bruă lŏ hma ti Lăn Dap Kngư lehanăn kơ kluôm ala, wưng leh êgao Daklak ya mta bruă mâo ngă leh čiăng bi năng hŏng klei găl anăn?

Nguyễn Đình Trung: Hŏng čar hlăm dŭm gưl păn bruă leh êgao, mâo bi klă bruă lŏ hma, mnuih ngă lŏ hma, krĭng ƀuôn sang jing bruă prŏng mâo čar mđing êdi. Boh sĭt hlăm dŭm thŭn êgao bruă lŏ hma ăt jing prŏng truh giăm 40% klei jing hlăm bruă duh mkra čar. Hlăm dŭm thŭn êgao ti čar mâo leh lu klei bi hmô, lu phung duh bi liê kơ bruă lŏ hma ba yua kdrăp mrâo mrang, mâo ba wĭt lu mta mnơ̆ng tŭ jăk mâo ba čhĭ hlăm ala čar pô lehanăn ala tač êngao. Hlăm êdei anăp, bruă lŏ hma ăt jing bruă mâo čar mđing mđĭ kyar hŏng klei kjăp, bi mguôp hŏng klei mđĭ kyar bruă duh mkra hlăm čar lehanăn mđĭ kyar klei hdĭp mda phung ƀuôn sang. tacmnduh bi lie

-Dah snăn hlăm wưng kơ anăp, Êpul khua kiă kriê bruă Đảng čar si hdră êlan mâo hlăm klei kiă kriê hŏng bruă lŏ hma?

Nguyễn Đình Trung: Hlăm wưng kơ anăp, Hdră mtrŭn klei bi kƀĭn prŏng tal 17 mơ̆ng čar, lehanăn dŭm hdră mtrŭn thơ̆ng kơ bruă kñăm bi čoh čuăn: Hlăm klei mđĭ kyar tal êlâo snăn bruă lŏ hma amâo mâo kƀah ôh. Boh nik hlăm bruă ba yua kdrăp mrâo mrang pioh dưn yua jih klei găl, ai ktang mâo hlăm bruă lŏ hma ti čar Daklak đru mguôp yuôm bhăn kơ klei mđĭ kyar bruă duh mkra alŭ wăl, lehanăn mđĭ hnơ̆ng hdĭp mơ̆ng phung ƀuôn sang. Daklak mjing leh klei găl čiăng kơ phung duh mkra hriê hŏng Daklak nao bi mguôp, hrăm mbĭt hŏng čar, mbĭt hŏng phung ƀuôn sang mđĭ kyar bruă duh mkra.

-Msĕ si ih mrâo lač leh, Daklak srăng mjing djăp klei găl pioh kơ phung duh bi liê truh hŏng čar Daklak, boh sĭt si jing klei anăn? Boh nik leh phung duh bi liê ăt dôk mâo klei mĭn ka hơĭt kơ djăp mta bruă djŏ tuôm hŏng lăn?

Nguyễn Đình Trung: Čar hlăk dôk čuăl mkă kơ klei djă yua lăn, kơ dŭm krĭng lăn yap jing lăn pla mjing. Êlâo hĭn bruă klam mơ̆ng knŭk kna hlue ngă bi jăk klei čuăl mkă hŏng klei djŏ lehanăn kjăp, klă mngač hŏng klei sĭt bruă knuă čiăng, snăn kơh phung duh bi liê truh hŏng čar mâo klei găl kơ bruă ksiêm duah, hŏng klei klă nik lehanăn čoh čuăn srăng duh bi liê. Tal dua, klei bi mguôp plah wah phung duh mkra, hŏng phung pla mjing brei mâo bruă klam mơ̆ng čar, čar srăng jing pô dôk krah wah ngă klei bi mguôp, kñăm kơ jih jang bruă duh mkra pla mjing mâo ba yua kdrăp mrâo mrang. Tal 3, kăp hrui blei boh mnga mâo, lehanăn bi mguôp kjăp hŏng hdră êlan mkra mjing boh mnga kluôm ênŭm hĭn, lehanăn jih jang djăp mta bruă msĕ si êlan klông, knơ̆ng mbông êa, lehanăn lu bruă mkăn kñăm kơ bruă pl amjing dưu ba yua kdrăp mrâo mrang.

-Lač jăk kơ ih lu!