VOV4.Êđê- Boh mnga bruă lŏ hma yơh jing mnơ̆ng mơ̆ng čar Gialai mâo čhĭ kơ ala tač êngao lu hĭn hŏng ênoh 500 êklăk dolar hlăm grăp thŭn, lehanăn hlăk hlê dôk đĭ nanao. Mâo hĕ klei anei kyua hlăm lu thŭn êgao, čar mđing hĭn êdi kơ bruă mkŏ mjing krĭng pla mjing bi dăp ênoh čuăn. Tui si anôk bruă lŏ hma čar Gialai ară anei jih jang ênoh pla mjing hlăm čar mâo 557 êbâo 700 ha. Hlăm anăn, mâo 230 êbâo ha jing 41% ênhă pla mjing djăp hŏng ênoh čuăn msĕ si VietGap, Global GAP, 4C, Organic, Rainforest Alliance.

Lưu Trung Nghiã khua knơ̆ng bruă lŏ hma čar Gialai lač, dŭm mta mnơ̆ng msĕ si kphê, boh kruĕ hruĕ hlăm čar mâo čhĭ leh kơ ala čar Japon, EU. Tui si hdră, wưng thŭn 2022 – 2025, čar srăng pŏk phai anôk pla mjing bi djŏ ênoh čuăn truh 5 êbâo ha/thŭn, mđĭ hnơ̆ng jăk mâo čhĭ mnia hŏng ala tač êngao, dưi mđĭ kyar klei hdĭp mda phung pla mjing./.

Pô mblang: Y-Khem Niê