Mrâo ksiêm dlăng hnơ̆ng adiê hlăm wăl anôk pla mmao đông trùng hạ thảo, ayŏng Đoàn Quốc Anh Khôi, Khua Êpul hgŭm bruă Đông trùng hạ thảo Kon Tum brei thâo, čiăng kơ mmao đông trùng hạ thảo đĭ jing jăk, bruă kriê dlăng hnơ̆ng adiê hlăm wăl anôk pla ăt msĕ mơh kdrăp krih êa ênuk mrâo jing yuôm bhăn snăk. Kyua anăn, ayŏng blei leh dŭm kdrăp mnơ̆ng mrâo čiăng mjing dŭm mta mnơ̆ng mâo hnơ̆ng tŭ jăk.

Mbĭt hŏng anăn, êpul hgŭm bruă mđing ba yua kdrăp hâo hưn mrâo hlăm bruă mkra, hưn mthâo pŏk rup, mtrŭt mđĭ bruă hrui blei mnơ̆ng dhơ̆ng hŏng hdră ba dŭm mta mnơ̆ng anei čhĭ hlăm wăl anôk mnia mblei điện tử. Mơ̆ng anăn, dưi hưn hŏng lu phung blei yua hlăm lehanăn êngao la čar, hnư hrui wĭt đĭ mơ̆ng 2 truh kơ 3 blư̆ mkă hŏng êlâo adih. Ayŏng Đoàn Quốc Anh Khôi bre thâo:

“Ƀuh mnuih ƀuôn sang bi mlih hdră blei mnơ̆ng snăn Êpul hgŭm pŏk leh hdră livestream lehanăn čhĭ hlăm jih jang wăl anôk mnia mblei mnơ̆ng điện tử dôk mâo ti Việt Nam, mâo leh hnơ̆ng hrui wĭt đĭ mơ̆ng 15 truh kơ 20% kơ mnuih hgŭm hlăm grăp mlan.

Klei ba yua “Kdrăp mrô” amâo mdê mdô ôh hŏng mnuih hgŭm hlăm Êpul bruă Lŏ hma, pla mjing lehanăn Mnia mblei Sáu Nhung (Êpul hgŭm bruă Sáu Nhung), sa êpul hgŭm bruă lŏ hma mâo klei găl kơ dŭm mta mnơ̆ng mơ̆ng kphê ti kdriêk Đăk Hà, čar Kon Tum. Mơ̆ng leh êpul mtrŭt mđĭ hdră duh bi liê, ba yua kdrăp mrâo hlăm bruă pla, mkra mjing, hrui blei mnơ̆ng đru mđĭ leh hnơ̆ng tŭ hdră mă bruă, ai bi ktưn, boh tŭ bruă pla mjing, mnia mblei. Amai Ngô Thị Mai, mnuih hgŭm hlăm Êpul bruă Sáu Nhung brei thâo:

“Leh nao hgŭm hlăm Êpul bruă anei, brei mâo klei duh bi liê kơ kdrăp mrâo lu hĭn mkă hŏng êlâo. Ênhă lăn sang dôk dôk ba yua kdrăp krih êa mkiêt mkriêm ênŭk mrâo, đru mkiêt mkriêm êa, hbâo pruê lehanăn ai mă bruă. Dlăng kriê wiê ênăk hluê hdră doh đru leh kơ đang war đĭ jing hơĭt kjăp.

Hluê si Nguyễn Tri Sáu – Khua kiă kriê Êpul hgŭm bruă Sáu Nhung, ară anei êpul mâo êbeh 100 čô hgŭm hŏng ênhă êbeh 300 ha kphê. Bruă ba yua kdrăp mrâo amâo djŏ knŏng đru msir mghaih klei tĭng dlăng hdră kiă kriê anôk bruă, mjing klei đăo knang hlăm mnuih blei yua, ƀiădah lŏ ba wĭt lu boh tŭ dưn mkăn, msĕ si dưi hưn mthâo truh kơ lu mnuih blei yua, grăp thŭn hdră ba čhĭ hluê êlan mạng đĭ nanao êbeh 10%, boh nik hdră ba čhĭ kphê kpŭng. Sa boh tŭ dưn mkăn jing ba yua kdrăp mrô đru kriê pioh hră mơar pral hĭn, ênưih lŏ ksiêm dlăng, bi hrŏ klei ktrŏ ngă hră mơar. Nguyễn Tri Sáu brei thâo:

“Hmei bi mklă ba dŭm mta mnơ̆ng mơ̆ng Êpul hgŭm bruă hluê hdră tal êlâo jing mđĭ hnơ̆ng tŭ jăk čiăng kơ lu mnuih thâo. Hmei mđing kơ hdră hưn mthâo mnơ̆ng dhơ̆ng čiăng kơ mnuih blei yua dưi thâo anăn jing mnơ̆ng tŭ jăk. Tal dua jing mkra lu mta mnơ̆ng, ară anei hmei dưi mkra leh kphê hlŏng mnăm mtam, kphê mkra jing klŏ đ’điêt, kphê mkra ngă asăr mlim”.

Nguyễn Lâm Cảnh, Khua kiă kriê Êpul hgŭm bruă čar Kon Tum brei thâo, bi mlih mrô jing hdră êlan đru mđĭ kyar bruă duh mkra êpul êya. Khă snăn, ară anei ênoh êpul hgŭm bruă ti alŭ wăl ba yua kdrăp mrâo hlăm bruă pla, mkra mjing lehanăn kriê dlăng dôk êdu kƀah lehanăn hliê hluôt. Nguyễn Lâm Cảnh brei thâo:

“Čiăng hluê ngă jăk bruă anei snăn Êpul hgŭm ăt bi mguôp hŏng dŭm anôk bruă brei êpul hgŭm dưi nao nao dŭm knăm mtrŭt mđĭ bruă mnia mblei, mơ̆ng anăn mjing klei bi mjĕ plah wah dŭm êpul hgŭm hŏng anôk bruă duh mkra čiăng hrui blei mnơ̆ng dhơ̆ng. Tal dua đru kơ êpul hgŭm mđĭ hnơ̆ng tŭ jăk mnơ̆ng dhơ̆ng, mơ̆ng anăn mjing mta mnơ̆ng mâo hnơ̆ng tŭ jăk hluê si klei čiăng mơ̆ng wăl anôk mnia mblei kñăm mđĭ boh tŭ yuôm mnơ̆ng dhơ̆ng hlăm hdră duh mkra êpul êya.

Čiăng mđĭ klei thâo hdră bi mlih mrô mơ̆ng Êpul hgŭm bruă, hlăm wưng ti anăp, Êpul hgŭm bruă čar srăng bi mguôp hŏng dŭm anôk bruă djŏ tuôm mkŏ mjing hdră mjuăt bi hriăm, klei kƀĭn trông čiăng mđĭ klei thâo săng kơ phung knuă druh kriê dlăng êpul hgŭm bruă kơ boh tŭ hdră ba yua kdrăp mrô, mkŏ mjing hdră hiu čhưn dlăng dŭm êpul hgŭm bruă ba yua kdrăp mrô, mơ̆ng anăn tui hriăm, pŏk ngă hlăm kluôm čar./.