Hlăm lu hrue leh êgao, ti anôk čuh tă Nhơn Bình, (hlăm knơ̆ng bruă mkra mjing mnơ̆ng ƀơ̆ng Quy Nhơn) ƀuôn hgŭm Quy Nhơn Đông, bruă ksiêm dlăng klei blei ŭn êlâo kơ tă čuh dưi ksiêm kjăp. Êlâo mkơ ba mŭt hlăm anôk čuh tă jih jang ŭn ba mâo bi kƀĭn ti êngao. Tinăn, pô čhĭ ŭn hưn mdah djăp ênŭm kơ phŭn agha, anôk rông ŭn, lehanăn ênoh ŭn mâo.

Êpul bruă djŏ tuôm mâo bruă mkă dlăng kman.  Nguyễn Quang Thái, K’iăng khua knơ̆ng bruă brei thâo, êngao kơ bruă phung nai mdrao mnơ̆ng rông mkă dlăng, phung duh mkra ăt mâo hdră êlan mă bruă kjăp hlăm klei čuh tă:

 “Tơdah ƀuh dŭm klei bi knăl mâo ŭn ruă, snăn knơ̆ng bruă srăng hưn mtam hŏng anôk bruă djŏ tuôm, hŏng anôk bruă mdrao mgŭn mnơ̆ng rông mghaih msir bi djŏ hŏng hdră čoh čuăn”.

 Tui si Nguyễn Thị Ngân Hà, Anôk bruă mkă dlăng kman lehanăn mdrao mgŭn mnơ̆ng rông, hlăm anôk bruă rông mnơ̆ng lehanăn mdrao mgŭn mnơ̆ng rông čar Gia Lai, klei ruă tưp ŭn ô̆ eh hlăk dleh dưi ksiêm dlăng. Knŏng hlăm wang sa mlan êgao, Gia Lai yap mâo leh 5 anôk mâo klei ruă tưp, mâo jih jang dŭm êtuh drei ŭn mâo klei ruă tian ô̆ eh. Kyuanăn, bruă ksiêm dlăng kjăp klei čuh tă, knư̆ hĭn mơh brei ngă hŏng klei ktang:

 “Hmei kiă kriê kjăp bruă bi mŭt ŭn hlăm anôk čuh tă mơ̆ng 9h aguah, ksiêm dlăng klei ruă tưp hlŏng truh kơ 9h mlam, lehanăn hmei lŏ wĭt ksiêm jih ŭn kñăm čiăng thâo nik jing ŭn suaih, tơl truh 1h30’ aguah hrue êdei, leh tă ŭn sĭt nik srăng mâo kđeh čĭm jăk êlâo kơ ba čhĭ”.

Kluôm čar Gia Lai ară anei mâo 11 anôk čuh tă prŏng hlăm sa anôk, lehanăn mâo truh 800 anôk čuh tă hliê lehanăn điêt. Bruă djŏ tuôm čar Gia Lai hlăk gĭt gai leh djăp alŭ wăl mđĭ hĭn bruă kăp ksiêm ŭn mnŭ mnơ̆ng rông hlăm kluôm čar, lehanăn wăt hlăm anôk čuh tă. Ngă bruă hâo hưn truh hŏng mnuih ƀuôn sang, gang mkhư̆ klei ruă tưp kơ mnơ̆ng rông, boh nik hŏng dŭm gŏ sang rông ŭn. Mta kñăm jing mđĭ hĭn klei thâo săng hlăm ƀuôn sang mơ̆ng klei ruă tưp, boh nik mđing kơ klei dŭ mdiăng, klei čhĭ mnia, klei duah blei ŭn lehanăn kđeh čĭm amâo mâo thâo bĭt klă phŭn agha, jing pô phŭn bluh đĭ klei ruă tưp prŏng.

 Huỳnh Ngọc Diệp, Khua anôk bruă rông mnơ̆ng lehanăn rông mnơ̆ng čar Gia Lai, lŏ brei thâo:

 “Êjai klei ruă tưp dôk bluh đĭ msĕ si ară anei, hmei mâo leh klei gĭt gai dŭm anôk bruă rông mnơ̆ng, lehanăn dŭm alŭ wăl mâo klei bi hgŭm hŏng bruă sang čư̆ êa dŭm alŭ wăl hyuă kjăp hĭn bruă ksiêm dlăng djăp anôk čuh tă hlăm alŭ wăl jing anôk điêt hliê, ka dưi mkŏ mjing ôh anôk čuh tă mklin sa anôk. Hlăm bruă blei ŭn êlâo kơ čuh tă, tơdah ƀuh dŭm klei bi knăl mơ̆ng klei ruă tưp, boh nik hŏng klei ruă tian ô̆ eh, snăn hmei mâo mtam bruă mghaih msir djŏ hŏng hdră mtrŭn.”

Êngao kơ klei ksiêm dlăng bruă čuh tă, lŏ hyuă kjăp hĭn bruă gang mkhư̆ klei ruă tưp, boh nik čiăng dưi gang mkhư̆ klei ruă tian ô̆ eh, mơng mlan 7, čar Gia Lai mâo mkŏ mjing leh 4 anôk kăp ksiêm, hgŭm leh hŏng lu anôk bruă, bi ksiêm hlăm dŭm anôk phŭn hlăm bruă rông mnơ̆ng, kñăm hyuă kjăp jih jang klei ruă tưp./.