Dôk rông 2 drei êmô sind mjeh mrâo mâo knŭk kna đru hŏng anei 1 mlan hlăm hdră bi lu jơr hdră duh ƀơ̆ng, mđĭ kyar klei bi hmô bi hrŏ ƀun hlăm hdră ala čar kñăm bi hrŏ ƀun hŏng klei kjăp, wưng thŭn 2021 – 2025, Trần Ngọc Phương ti să Thuận Hoà, kdriêk Châu Thành amâo dưi mdăp ôh klei hơ̆k mơak, kyua klei đru anei, gŏ sang ñu mâo thiăm klei găl bi hơĭt klei hdĭp. Ară anei gŏ sang ñu pla rơ̆k čiêm êmô, mbĭt anăn mưn tlâo čô mă bruă čiăng pla thiăm boh pom hrah hŏng klei hmăng hmưi gŏ sang mâo thiăm prăk hrui wĭt, hnưm tlaih mơ̆ng klei ƀun ƀin. Trần Ngọc Phương, brei thâo:

Mâo knŭk kna đru pô srăng gĭr, si srăng ngă čiăng mâo boh tŭ dưn hĭn. Kâo pla leh rơ̆k kơ êmô, war êning ăt mkra leh mơh, hdră rông mnơ̆ng ăt dôk hriăm.

Hdră ala čar kñăm bi hrŏ ƀun hŏng klei kjăp, hdră ala čar kñăm mkŏ mkra krĭng ƀuôn sang mrâo, hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă, mbĭt hŏng lu hdră mkăn dôk mâo dŭm gưl bruă, dhar bruă hlăm čar Sóc Trăng gĭt gai hluê ngă mâo mă lu boh tŭ dưn yuôm bhăn. Hluê anăn đru kơ dŭm gŏ sang ƀun ƀin, giăm ƀun mnuih djuê ƀiă ƀrư̆ ƀrư̆ bi hơĭt klei hdĭp, mđĭ kyar bruă duh mkra, gĭr ktưn tlaih mơ̆ng klei ƀun ƀin.

Nao ti kdriêk Trần Đê ară anei, hmei ƀuh klă klei mlih prŏng hlăm krĭng mnuih djuê ƀiă. Anăn jing êlan klông, kban, krĭng ƀuôn sang ară anei jing kdrưh kơăm leh anăn kjăp. Knŏng hlăm wưng thŭn mơ̆ng 2019 – 2024, kdriêk rŭ mdơ̆ng mrâo 519 bruă mkŏ mkra, bi leh leh anăn ba yua 451 bruă mkŏ mkra. Lu bruă mkŏ mkra ala ƀuôn dưi bi leh leh anăn ba yua ba wĭt boh tŭ dưn klă klơ̆ng, đru mtrŭt mđĭ bruă duh mkra ala ƀuôn đĭ kyar, bi mlih klei jing krĭng ƀuôn sang. Thạch Soi, mnuih ƀuôn sang ti alŭ Hội Trung, wăl krah Hội Thượng hơ̆k mơak lač:

Knŭk kna uêñ mĭn kơ klei hdĭp mnuih ƀuôn sang, boh nik jing mnuih djuê ƀiă. Klă sĭt, êlâo dih êlan anei knŏng prŏng 2m, ară anei pŏk phai jing 3m, mnuih ƀuôn sang mâo klei sa ai, myơr lăn ngă êlan, mơ̆ng anăn klei êrô êbat mơ̆ng mnuih ƀuôn sang mâo klei găl, phung hđeh nao sang hră ăt ênưih mơh.

Mơ̆ng ênoh 103 êklai prăk mă mơ̆ng hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă leh anăn hdră bi hrŏ ƀun hŏng klei kjăp wưng thŭn 2021 - 2025, kdriêk Trần Đề dưi đru sang dôk kơ 244 gŏ êsei, đru lăn dôk kơ 37 gŏ sang, mlih bruă mă kơ 360 gŏ sang, đru êa jua kơ 190 gŏ sang, duh bi liê rŭ mdơ̆ng 28 boh kban, êlan krĭng ƀuôn sang kơ alŭ, să dleh dlan. Êngao kơnăn, rŭ mjing leh anăn mkra wĭt sang mnia krĭng mnuih djuê ƀiă, đru mđĭ kyar bruă mkra mjing, bu lu jơr hdră duh ƀơ̆ng êpul êya, mtô mjuăt bruă…Trịnh Văn Bé, k’iăng khua bruă sang čư̆ êa kdriêk Trần Đề brei thâo, kdriêk bi klă bruă djuê ana leh anăn hdră êlan djuê ana jing bruă klam yuôm bhăn, kyuanăn, hlăm wưng kơ anăp, kdriêk srăng kñăm ngă lu hdră êlan čiăng mâo boh tŭ dưn hĭn.

Mđing duh bi liê tal êlâo kơ dŭm alŭ, să dleh dlan msĕ si: mgaih msir klei lăn dôk, sang dôk, lăn mă bruă, êa jua, đru bi lu jơr hdră duh ƀơ̆ng êpul êya, duh bi liê kơ bruă mkŏ mkra čiăng êdi, đru kơ klei mă bruă knuă, klei mnuih ƀuôn sang krĭng mnuih djuê ƀiă. Bi kjăp bruă kđi čar nah gŭ, mđing kơ bruă mtô bi hriăm, mđĭ klei thâo phung knuă druh, boh nik jing knuă druh mnuih djuê ƀiă. Kñăm mđĭ klei dưi, mđĭ klei thâo săng nao mbĭt hŏng bruă mtô mjuăt, mtô bruă mă, mkŏ mjing bruă mă kơ mnuih ƀuôn sang mnuih djuê ƀiă.

Hluê si Khua bruă Đảng čar Sóc Trăng Lâm Văn Mẫn, Sóc Trăng găn leh wưng thŭn 2019 – 2024 bŏ hŏng klei dleh dlan hŏng lu klei lông dlăng. Hlăm wưng anăn, ti gŭ klei gĭt gai mơ̆ng dŭm gưl bruă Đảng nah gŭ, bruă sang čư êa leh anăn mnuih ƀuôn sang hlăm čar, boh nik jing mnuih djuê ƀiă đru bi lar knhuah gru klei bi mguôp, ai tiê khăp kơ lăn čar, bi gĭr ktưn, găn jih klei dleh dlan, klei lông dlăng, mâo mă lu boh tŭ dưn. Hlăm wưng mơ̆ng thŭn 2019 – 2024, bruă duh mkra čar lŏ dơ̆ng mâo klei đĭ kyar. Knŏng 6 mlan akŏ thŭn 2024, đăo knăl mâo êbeh 6,5%, lu hĭn mkă hŏng hnơ̆ng kah knar lăn čar (6,42%) dôk tal 6 ti krĭng dap mnai krông Cửu Long. GRDP kah knar grăp čô yap truh knhal jih thŭn 2023 mâo êbeh 60 êklăk prăk/sa čô/ sa thŭn.

Lâm Văn Mẫn ăt mñă klă, mơ̆ng ai dưi 3 hdră ala čar kñăm dưi pluă mbĭt, hluê ngă tŭ dưn čiăng duh bi liê, mđĭ hnơ̆ng, bi mrâo bruă duh mkra ala ƀuôn krĭng mnuih djuê ƀiă, kyuanăn, truh kơ ară anei, jih jang dŭm să mâo êlan ôtô truh kơ wăl krah, êbeh 99% gŏ sang krĭng mnuih djuê ƀiă dưi yua pui kmlă ala čar, hnơ̆ng gŏ sang mâo yua êa doh êbeh 99,6%. Boh nik, bruă bi hrŏ ƀun krĭng mnuih djuê ƀiă mâo klei mlih jăk, čar đru bi mlih bruă mă kơ 4.600 gŏ sang hŏng 67 klei bi hmô mđĭ kyar bruă mkra mjing, đru bi lu jơr hdră duh ƀơ̆ng êpul êya leh anăn bi hrŏ ƀun hŏng klei kjăp. Yap truh knhal jih thŭn 2023, ti alŭ wăl adôk mâo êbeh 4.000 gŏ sang ƀun jing mnuih djuê ƀiă, hrŏ êbeh 6.500 gŏ sang mkă hŏng thŭn 2021.

Hnơ̆ng gŏ sang ƀun kah knar hrŏ 2% hlăm sa thŭn, hlăm anăn, gŏ sang mnuih Khmer hrŏ ƀun 3% hlăm sa thŭn. Hdră êlan bi hơĭt klei ala ƀuôn dưi hmao ngă, ngă djŏ pô. Hlăm wưng mơ̆ng thŭn 2019 – 2024, čar đru rŭ mdơ̆ng 14.826 sang dôk kơ gŏ sang ƀun, hlăm anăn mâo 6.184 boh sang kơ mnuih djuê ƀiă ƀun ƀin…

Dŭm boh tŭ dưn dưi mâo jing klei gĭr mơ̆ng bruă kđi čar leh anăn klei gĭt gai, ktrâo lač mơ̆ng gưl bruă Đảng nah gŭ, bruă sang čư êa dŭm gưl ti čar Sóc Trăng, êngao kơnăn jing klei gĭr ktưn kpưn đĭ mơ̆ng mnuih ƀuôn sang dŭm djuê ana hlăm čar, hluê anăn ƀrư̆ ƀrư̆ bi mlih klei jing krĭng mnuih djuê ƀiă./.