Hruê 28/8, ti Dak Lak, Anôk mtrŭt mjhar bruă lŏ hma ala čar bi hgŭm hŏng Knơ̆ng bruă Lŏ hma lehanăn wăl hdĭp mda mkŏ mjing klei bi kƀĭn trông “Hdră msir mđĭ kyar hdră bi hgŭm bruă pla mjing – hrui blei čêñ hruê̆ hơĭt kjăp”. Kluôm ala čar ară anei mâo êbeh 10.000ha čêñ hruê̆, hnơ̆ng mâo 190.000 – 220.000 ton/thŭn, lu ti krĭng lăn dap kngư. Hlăm brô 80% hnơ̆ng mâo dưi mkra mjing, ba čhĭ hŏng ênoh prăk bi mnia mblei êbeh 170 êklăk USD/thŭn.

Khă snăn, anôk bruă anei dôk tlă anăp hŏng lu klei  dleh dlan msĕ si mjeh ka bi knar, hdră pla – mkra mjing dôk êdu kƀah lehanăn hdră bi hgŭm ka kjăp. Kơiăng khua Anôk mtrŭt mjhar bruă lŏ hma ala čar Hoàng Văn Hồng bi mklă:Čêñ hruê̆ mâo klei găl jing anôk bruă dŭm êklai đolar, boh nik ti dŭm wăl anôk mnia mblei msĕ si EU, Mi, Australia, Dhŭng Korea. Čiăng pai mă klei găl mâo, hdră pla mjing brei rơ̆ng klei bi knar lehanăn đua klam kjăp ti dŭm hdră, mơ̆ng anăn ba yua tŭ dưn boh tŭ yuôm lehanăn pŏk mlar wăl anôk ba čhĭ mnơ̆ng hŏng ala tač êngao.