VOV4.Êđê - Việt Nam mâo leh dŭm mta mnơ̆ng Fine Robusta (kphê jăk) mâo êpul êya tar rŏng lăn tŭ yap, snăn ăt mâo mnuih thâo đeh kwă kphê čiăng ba dŭm mta mnơ̆ng anei truh hŏng lu mnuih blei yua. Anei jing hnơ̆ng trah dlăng mâo Êpul hgŭm bruă Kphê Ƀuôn Ama Thuôt mđing truh hluê hŏng Klei bi lông đeh kwă Kphê Việt Nam thŭn 2022 mkŏ mjing hruê kăm êgao ti Dak Lak.

Klei bi lông đeh kphê Việt Nam thŭn 2022 (Vietnam Amazing Roast Master 2022) mâo Êpul hgŭm bruă kphê Ƀuôn Ama Thuôt mkŏ mjing mâo leh lu phung duh mĭn kơ kphê mđing uêñ. Kyuadah anei jing, klei bi lông tal êlâo mâo mkŏ mjing ti Việt Nam hŏng hnơ̆ng ala čar kñăm mjing “anôk hlăp jăk” kơ phung duh mĭn kơ kphê, lehanăn ƀrư̆ ƀrư̆ srăng mkŏ mjing sa êpul hgŭm phung knhăk kơ bruă đeh mkra kphê hŏng ala tač êngao, boh nik klei đeh kphê Robusta. Pô bi lông Đoàn Tuấn Nhật hriê mơ̆ng čar Lâm Đồng lač:  “Nao ti anôk bi lông anei kâo ƀuh lu mta klei bi hriăm êdi, êlam hĭn. Jing sa čô mnuih truăn hlăm bruă đeh kphê, snăn hlăm klei bi lông anei bi ksiêm mkă hŏng jăk asăr boh kphê êjai dôk mtah si jing, čiăng truh kơ mmông pô đeh ciăng dưi thâo tŭ mă mta mnơ̆ng anăn. Leh kơ anăn êjai đeh kphê si srăng kar mkra, čiăng adôk djă pioh mnâo mnañ kphê djŏ hŏng klei jing kphê mơ̆. Sa čô mnuih thâo đeh kphê, jing sa čô mnuih thâo mkă tĭng hnơ̆ng tŭ mơ̆ng kphê hlăk ka đeh ôh, lehanăn truh kơ êdei leh đeh, snăn klei msĕ snăn mâo sơăi hlăm klei bi lông anei”.

Hlăm 4 hrue mơ̆ng hrue 6-9/10, 35 čô mnuih nao hlăm klei bi lông hriê mơ̆ng 13 boh čar, ƀuôn prŏng hlăm kluôm ala nao hlăm dŭm klei bi lông snei: Ksiêm mkă hnơ̆ng jăk kphê êjai dôk mtah, bi mưng hŏng kdrăp đeh kphê, kdrăp mnơ̆ng yua, mnơ̆ng ba đeh, bruă ngă klei đeh, bruă kar mkra kphê, hưn mthâo kơ boh tŭ bruă pô ngă. Pô bi lông Nguyễn Thị Thu Hương, hriê mơ̆ng čar Daknông lač, êlâo dih hlăm klei bi lông đeh kphê nao hlăm klei truăn kơ bruă hĭn, ƀiădah hlăm klei bi lông anei jing mđing kơ mnuih yua kphê hĭn, lehanăn mđing kơ hnơ̆ng tŭ kphê Việt Nam, knhuah mưng mnuih Việt Nam yua kphê. Kyuanăn yơh, nao hlăm klei bi lông anei, mnuih đeh kphê amâo mâo djŏ knŏng klam kơ bruă bi lar mnâo mnañ kphê đuič ôh, ƀiădah lŏ thâo hưn mdah klei anăn truh hŏng mnuih yua kphê, lehanăn thâo kjăp hlăm bruă ksiêm dlăng hnơ̆ng tŭ kphê leh pô đeh: “Ară anei kphê Việt Nam hlăk mâo klei bi mlih jăk kơ hnơ̆ng tŭ, kyuanăn yơh knhuah mưng mnuih yua ăt mâo klei mđĭ bi lar mơh hŏng klei klă mngač. Diñu mâo klei čiăng lông mnăm čiăng thâo ƀuh mnâo mnañ, lehanăn ksiêm duah mơh kơ dŭm ênoh čuăn kphê doh, jih jang klei djŏ tuôm hŏng kphê, phŭn agha anôk pla mjing, lehanăn mnơ̆ng yua mkra mjing kphê... Klă sĭt anei jing mmông găl prŏng êdi čiăng kơ kâo mâo bi mlih mnâo mnañ jăk mơ̆ng kphê êjai dôk mkra kphê pô đeh pioh kơ mnuih mnăm thâo kphê pô mkra jing jăk”.

Tui si Lê Đức Huy, khua kiă kriê knơ̆ng bruă Simexco Daklak, k’iăng khua Êpul hgŭm kphê Ƀuôn Ama Thuôt, Việt Nam thâo mnăm kphê êbeh leh 100 thŭn hŏng anei, mbĭt hŏng bruă mđĭ bi lar kphê hlăm lăn čar Việt Nam. Truh kơ ară anei dơ̆ng hlao leh tač êngao hlăm knhuah thâo khăp kơ klei mnăm kphê, mâo klei thâo hlăm bruă đeh mkra kphê hluê knhuah tar rŏng lăn, ya mta jing bruă mrâo lehanăn jăk, hŏng kdrăp mă bruă mrâo mrang dơ̆ng mâo leh sơăi ti Việt Nam. Siămdah, djăp mta kdrăp masin anăn amâo mâo dưi bi mlih ôh anak mnuih, kyuadah kphê mâo lu mta, mơ̆ng anăn bruă mkra mjing bi mâo lu pô mtô bi hriăm mơh, hŏng klei mbruă, klei knhăk thâo đeh mkra kphê hŏng klei raih săn kơh srăng dưi mâo kphê jăk. Lê Đức Huy lač: Hlăm jih jang bruă pô ngă jing bi mâo ênoh mkăp, mơ̆ng phung pla mjing mâo leh kphê, snăn mnuih yua ăt bi thâo mđĭ mơh klei tŭ dưn boh kphê anăn. Phung đeh kphê jing mnuih tŭ mă lehanăn mkra kphê asăr anăn, snăn čiăng mâo nanao klei đĭ kyar jăk hlăm anôk bi čhĭ mnia kphê, snăn drei amâo mâo djŏ knŏng mđing kơ anôk mkăp bi mâo boh kphê ôh, ƀiădah mđing mơh kơ mnuih blei yua kphê. Bi tơdah drei knŏng pla mjing bi mâo sa anôk prŏng kphê jăk, ƀiădah knhal tuič amâo mâo thâo yua ôh, snăn srăng lĕ hlăm klei boh kphê mâo lu hĭn kơ mnuih čiăng yua”.

Klei bi lông đeh kphê Việt Nam amâo mâo djŏ knŏng mpŭ kơ mnuih thâo đeh kphê đuič ôh, ƀiădah lŏ mpŭ kơ asăr kphê Robusta Việt Nam đĭ knar hŏng arăng lĕ dlông rŏng lăn. Anei ăt jing knhuang dăp djŏ hlue hŏng ai tiê klei khăp mơ̆ng bruă kphê, kñăm anăp truh kơ klei dưi bi mklă Việt Nam amâo mâo djŏ knŏng jing anôk pla kphê jăk đuič ôh, ƀiădah lŏ jing anôk thâo ba yua kphê, boh nik kphê jăk hŏng klei êlam hĭn./.

Hương Lý/ VOV TâyNguyên/Pô mblang: Y-Khem Niê