VOV4.Êđê - Tlam mbruê 7/10, anôk bruă mtrŭt mđĭ bruă lŏ hma ala čar bi mguôp hŏng knơ̆ng bruă lŏ hma leh anăn mđĭ kyar krĭng ƀuôn sang čar Quảng Trị mkŏ mjing klei kƀĭn mkŏ mjing hdră bhiăn ngă bruă Êpul mtrŭt mđĭ bruă lŏ hma yang ƀuôn. Mta kñăm klă klơ̆ng mơ̆ng dŭm êpul mtrŭt mđĭ bruă lŏ hma yang ƀuôn kñăm mâo ênŭm hnơ̆ng čoh čuăn ti 13 čar, ƀuôn prŏng, leh anăn pŏk phai truh kơ dŭm čar mkăn.

Hlăm klei kƀĭn, knơ̆ng bruă lŏ hma leh anăn mđĭ kyar krĭng ƀuôn sang čar Quảng Trị ba mdah klei bi klă mkŏ mjing klei lông ngă mkŏ mjing êpul mtrŭt mđĭ bruă lŏ hma yang ƀuôn alŭ wăl Hải Lăng – Triệu Phong leh anăn alŭ wăl Vĩnh Linh – Gio Linh – Cam Lộ. Wưng anei, anôk bruă mtrŭt mđĭ bruă lŏ hma ala čar jao leh 10 boh êdeh phiơr amâo mâo mnuih mgăt kơ 2 êpul mtrŭt mđĭ bruă lŏ hma čar Quảng Trị, mbĭt anăn mkŏ mjing knăm bi klă klei kuôl kă plah wah anôk bruă mtrŭt mđĭ bruă lŏ hma ala čar, knơ̆ng bruă lŏ hma leh anăn mđĭ kyar krĭng ƀuôn sang čar Quảng Trị leh anăn knơ̆ng bruă tuh tia mnia mblei Tiến Phong Cam Lộ čiăng mđĭ kyar krĭng pla mjing kyâo djăp ênŭm hnơ̆ng čoh čuăn.

VOVTâyNguyên/Pô mblang: Y-Ƀel Êban