Gưl tal êlâo hlăm hƀuê ênuk knăm mơak, Vanusia Nogueira – Khua Knơ̆ng bruă Êpul bruă kphê dlông rŏng lăn (ICO) – hgŭm leh anăn mâo klei blŭ hrăm yuôm bhăn hlăm knăm mơak. Klei anei kruăk knăl knhuang yuôm bhăn hlăm bruă mđĭ kơhưm kphê Việt Nam hlăm hdră mkăp kluôm rŏng lăn. Hlăm tlâo hruê hgŭm hlăm bruă ngă, Vanusia Nogueira brei thâo:

“Kâo jing sa čô hlăm gŏ sang mkra mjing kphê, hmei khăng lač ti Brazil hmei mâo khpê tinei hrô kơ êrah. Leh anăn yuôm bhăn snăk tơdah hmei ƀuh ƀuôn prŏng anei hdĭp hŏng kphê si ngă leh anăn sa mta mnơ̆ng bruă sang čư̆ êa čar mđup brei leh kơ phung mkra mjing. Kyua anăn jing sa klei huă mnăm amâo knŏng brei kơ hmei ôh, brei kơ jih jang phung mkra mjing tinăn, jih jang gŏ sang mâo ƀô̆ mta tinăn, leh anăn anei jing sa klei năng bi kngăr snăk”

Knăm mơak thŭn anei mâo klei hgŭm mơ̆ng 28 êpul tue ala tač êngao, pŏk lu klei găl mnia blei leh anăn mkŏ. Dŭm bruă ngă êdah êdi msĕ si: Klei rang mdah thơ̆ng kơ kphê, Klei bi kƀĭn mnia blei lu ala čar, Klei bi lông đeh kphê jăk

Việt Nam 2025 amâodah Knăm mơak kphê amâo mă prăk mâo leh dŭm êtuh knưng mnơ̆ng mơ̆ng dŭm anôk duh mkra hlăm leh anăn êngao ala čar. Lê Đức Huy,  Khua Êpul gơ̆ng hlă Knơ̆ng bruă ba čhĭ kphê kơ ala tač êngao 2/9 Dak Lak, hơ̆k mơak:

“Simexco hŏng ai tiê hơ̆k mơak snăk tơdah hgŭm hlăm Knăm mơak kphê thŭn anei leh anăn hmei dlăng anăn jing gưl Tết kphê Việt Nam. Kâo 16-17 thŭn ngă bruă kơ kphê Dak Lak, hgŭm nanao hlăm 6 gưl knăm mơak leh anăn grăp gưl jing sa klei mdê leh anăn knăm mơak tal anei jing mkra mjing êlam. Drei bi mđup brei klei ktang mrâo čiăng ñŭ kma mđĭ kyar čiăng kơ robusta Việt Nam mâo boh tŭ dưn mrâo”

Iêo jak hlăm brô 250 êbâo gưl tue, hlăm anăn mâo 1.800 čô tue ala tač êngao, Knăm mơak amâo djŏ knŏng jing klei găl hưn mdah mơ̆ng dŭm anôk bruă duh mkra ôh, ƀiădah jing gưl kơ mnuih ƀuôn sang leh anăn tue hlai mbĭt hlăm wăl dhar kreh mdê hjăn mơ̆ng Dak Lak. Y-Lơi Ayun, să Ea Yông, kdriêk Krông Pač, brei thâo:

“Phung ngă lŏ hma hgŭm hlăm knăm mơak tal 9 jing mơak snăk ăt mjing klei găl kơ phung ngă lŏ hma mđĭ kyar bruă duh mkra gŏ sang ƀrư̆ đĭ. Anei ăt jing klei găl duah klei duh bi liê hlăm ala čar leh anăn dlông rŏng lăn”

Amai Phương Oanh, sa čô hlăm Êpul hgŭm phung mnia mblei mda asei Gia Lai bi êdah:

“Mâo sa klei mdê hjăn leh anăn kâo ƀuh mơak snăk kyua phung khua gĭt gai čar Dak Lak mđing uêñ snăk leh anăn đru kơ êpul duh mkra anăn mjing leh tač hlăp jing klei bi tuôm mơ̆ng êpul duh mkra hlăm čar, êngao čar leh anăn ala tač êngao. Hlăm ai êwa Ƀuôn Ama Thuôt siam msĕ snei snăn anei klă sĭt jing sa Knăm mơak năng kơ lu mnuih thâo”

Phung tue ala tač êngao ăt mơak tơdah nao hlăm knăm mơak kphê Ƀuôn Ama Thuôt tal anei. Ayŏng John Cuttance Dunedin, hriê mơ̆ng New Zealand, brei thâo:

“Kphê tinei jăk snăk, mnơ̆ng ƀơ̆ng jăk mơh, anak mnuih tinei êmhač snăk. Kâo bi mĭn mâo sa hruê kâo srăng lŏ hriê tinei leh anăn bi liê hlăm Dak Lak.”

Marc Knapper, Pô bi ala kluôm mơ̆ng Mi Ti Việt Nam ăt bi mni kơ klei anei:

“Hmei hgŭm leh lu klei yuôm bhăn ti Việt Nam, ƀiădah Knăm mơak kphê Ƀuôn Ama Thuôt jing knăm mơak êdah êdi hĭn hmei tuôm ƀuh.  Klei mkŏ mjing jăk snăk leh anăn mâo lu klei mơak.”

Mbĭt hŏng dŭm bruă ngă knăm mơak, čar Dak Lak mkŏ mjing leh knăm mphŭn rŭ  mdơ̆ng lu hdră bruă yuôm bhăn msĕ si Anôk bruă mnia blei – Sang jưh – Sang dôk ti ƀuôn prŏng Ƀuôn Ama Thuôt, hdră bruă Wăl tuh tia mkra mjing Phú Xuân leh anăn boh nik jing Sang mkra mjing Kphê Trung Nguyên Legend – sang mkra mjing kphê prŏng hĭn Ngŏ Dhŭng Asi. Dŭm hdră bruă anei amâo djŏ knŏng bi mlih ti ƀuôn prŏng ôh ƀiădah lŏ đru ba Ƀuôn Ama Thuôt giăm hĭn hŏng klei kñăm jing “Ƀuôn prŏng kphê dlông rŏng lăn”. Blŭ hrăm hlăm knăm bi ruê̆, Nguyễn Thiên Văn, K’iăng Khua Knơ̆ng bruă sang čư̆ êa čar Dak Lak, bi mklă:

“Klei tŭ jing mơ̆ng Knăm mơak Kphê Ƀuôn Ama Thuôt tal 9 jing boh kdrŭt ktang čiăng hmei gĭr hĭn hlăm bruă ngă kyua klei kñăm mkŏ mjing Dak Lak đĭ kyar pral, mdrŏng sah, jăk siam. Mbĭt anăn, anei ăt jing klei găl čiăng mpŭ kơ mnơ̆ng dhơ̆ng kphê Việt Nam leh anăn mđĭ anăn knăl kphê Ƀuôn Ama Thuôt ti dlông rŏng lăn.”

Knăm mơak Kphê Ƀuôn Ama Thuôt tal 9 amâo djŏ knŏng jing sa klei dhar kreh ôh ƀiădah lŏ jing sa klei yuôm bhăn hlăm hdră bi mklă anăn knăl kphê Việt Nam. Hŏng klei hgŭm mơ̆ng dŭm êpul bruă lu ala čar, anôk bruă duh mkra, mnuih ƀuôn sang leh anăn tue hiu čhưn, knăm mơak mjing leh sa wăl jăk siam, pŏk lu klei găl mđĭ kyar kơ bruă kphê ala čar drei. Klei tŭ jing anei srăng mjing tur kjăp čiăng kơ Dak Lak lŏ dơ̆ng lar kbưi hĭn, ba Ƀuôn Ama Thuôt jing anôk truh kphê dlông rŏng lăn.