Leh bruă sang čư̆ êa čar Lâm Đồng bi klă hdră êlan lông mkŏ mjing dŭm klei bi hmô anôk bruă hiu čhưn ênguê lŏ hma hlăm alŭ wăl hlăk knhal jih thŭn 2015, truh thŭn 2018, bruă hiu čhưn ênguê čar Lâm Đồng bi mguôp hŏng dŭm anôk bruă djŏ tuôm ngă klei bi klă leh anăn tŭ yap 33 anôk hiu čhưn ênguê lŏ hma. Mơ̆ng anăn, mnơ̆ng dhơ̆ng bruă hiu čhưn ênguê lŏ hma ti čar Gia Lai dưi bi lar klei găl mâo, iêo jak êbeh 7 êklăk gưl čô tuê hriê čuă dlăng, ba wĭt hnư prăk kơ mnuih ƀuôn sang hlăm alŭ wăl.

Ƀiădah, kyua tuôm hŏng lu klei kpăk mơ̆ng klei čuăn hlăm hdră bhiăn ară anei, ăt msĕ mơh ka mâo klei hưn kluôm mơ̆ng dŭm phŭn, dhar bruă, gưl dlông ngă kơ bruă mđĭ kyar bruă hiu čhưn eneguê lŏ hma ti čar Lâm Đồng tuôm hŏng lu klei dleh dlan. Boh nik jing klei čuăn kơ hnơ̆ng čuăn rŭ mdơ̆ng hlăm lăn lŏ hma, mlih lăn lŏ hma jing lăn mkăn, čuăl mkă yua lăn, hnơ̆ng rŭ mjing mâo čuôr gang…Hluê si Lê Thị Quỳnh Như, đang war Cún ti ƀuôn hgŭm mrô 7, ƀuôn prŏng Đà Lạt, dŭm klei dleh kpăk anei ngă truh kơ bruă mđĭ kyar bruă hiu čhưn ênguê bruă lŏ hma lĕ hlăm klei dleh kpăk.

“Đảng war mâo mnơ̆ng rông, mâo dŭm mta mnơ̆ng dhơ̆ng phŭn mơ̆ng Đà Lạt, msĕ si teinan hruê̆, trŏng msăm, djam mtam…ăt mâo lu phung tuê hruê čuă dlăng. Ƀiădah čiăng mâo anôk dưm êdah, wăl anôk mkra mjing boh mnga, anôk rang mdah, anôk drông tuê, sang tlô, sang mnăm êa…Dŭm hdră anei srăng mâo kơh dưi drông tuê, ƀiădah lŏ tuôm hŏng klei kpăk soh hŏng hdră bhiăn rŭ mdơ̆ng”.

Blŭ hrăm hlăm klei kƀĭn trông, Phạm S, k’iăng khua bruă sang čư̆ êa čar Lâm Đồng mñă klă, klei găl mđĭ kyar bruă hiu čhưn ênguê lŏ hma mơ̆ng čar jing prŏng sơnăk, ƀiădah tuôm hŏng lu klei dleh dlan, hlăm anăn dleh hĭn jing djŏ tuôm hŏng hdră bhiăn Hiu čhưn ênguê, Hdră bhiăn lăn ala leh anăn hdră bhiăn rŭ mjing. Čiăng mtrŭt mđĭ bruă hiu čhưn ênguê lŏ hma đĭ kyar ktang, kdlưn hĭn hlăm wưng kơ anăp, čar dôk gĭt gai dŭm anôk bruă djŏ tuôm mkŏ mjing hdră êlan yua lăn lu mta kñăm kơ bruă hiu čhưn ênguê lŏ hma mbĭt hŏng dŭm klei čuăn klă nik, hưn mdah hŏng gưl bruă mâo klei dưi bi klă. Bruă anei hluê ngă hŏng hdră bhiăn lăn ala thŭn 2024 leh anăn dŭm hră mơar djŏ tuôm. Phạm S lač:

“Dŭm hdră bruă hiu čhưn ênguê lŏ hma mâo lăn rŭ mjing amâodah jing sa hdră êngiê srăng mñă mkŏ mjing msĕ si sa hdră êlan duh bi liê leh ană mơ̆t kơ Knơ̆ng bruă hdră êlan duh bi liê bi klă djŏ hŏng hdră bhiăn. Tal 2 jing lăn lŏ hma phŭn drei yua lu mta kñăm mơ̆ng grăp čô mơĭt kơ adŭ bruă ngăn dŏ leh anăn wăl hdĭp mda, bruă sang čư̆ êa kdriêk bi klă. Bi hŏng lăn lŏ hma lu mta kñăm mơ̆ng êpul bruă ba yua ăt mkŏ mjing mta phŭn mơĭt kơ knơ̆ng bruă ngăn dŏ leh anăn wăl hdĭp mda bi klă, hưn mdah hŏng anôk bruă mâo klei dưi bi klă. Dua mta phŭn anei mdê mdê, sa jing hdră mlih mta kñăm rŭ mjing, bi sa jing lăn lu mta kñăm srăng rŭ mjing kdrăp thâo ruh, amâo mâo mlih mta kñăm kyua phŭn ăt jing lăn lŏ hma”.

Phạm S jao kơ knơ̆ng, dhar bruă, alŭ wăl djŏ tuôm, lŏ dơ̆ng ksiêm dlăng dŭm anôk hiu čhưn ênguê dưi tŭ yap, mtô kơ dŭm anôk bruă bi mbŏ, bi ênŭm dŭm klei găl čiăng kơ anôk bruă djŏ tuôm bi klă leh anăn tŭ yap klei bi hmô bruă hiu čhưn ênguê lŏ hma, bi kƀĭn klei blŭ mguôp, klei kčĕ mơ̆ng phung bi ala, bi kluôm dŭm mta phŭn, hnơ̆ng čuăn leh anăn hưn mdah hŏng bruă sang čư̆ êa čar ksiêm dlăng, bi mbŏ, mkra mlih hdră êlan djŏ guôp hŏng boh sĭt, kñăm lŏ dơ̆ng bi lar klei găl mâo, mđĭ kyar bruă hiu čhưn ênguê lŏ hma djŏ hŏng hdră tă.