Sa hlăm dŭm bruă ngă phŭn hlăm Knăm mơak Kphê Ƀuôn Ama Thuôt tal 9, iêô jak lu phung pla mjing kphê hlăm kluôm ala mđing uêñ, anăn jing Klei bi lông phung ngă lŏ hma thŭn 2025 hŏng akŏ “Pla mjing kphê thâo mĭn”. Nao hlăm klei bi lông mâo 4 êpul hriê mơ̆ng čar: Dak Lak, Kon Tum, Bình Phước, Sơn La. Anei jing phung bi lông êdah êdi dưi ruah mơ̆ng dŭm klei bi lông êlâo anăn čiăng ruah êpul  ƀĭng lŏ hma pla kphê êdah êdi hĭn hlăm mlan knhal tuč. Hŏng akŏ “Pla mjing kphê thâo mĭn”, phung bi lông găn leh 4 kdrêč bi lông: Phung ngă lŏ hma kkuh čhưn, phung ngă lŏ hma thâo mĭn, phung ngă lŏ hma bi hgŭm leh anăn phung ngă lŏ hma găn klei lông dlăng. Amai H’Roda  Ayun (djuê ana ÊĐê) – hlăm êpul Dak Lak brei thâo: mơ̆ng klei bi lông, ñu pô mâo thiăm klei thâo mrâo hlăm bruă pla mjing kphê hnơ̆ng jăk.

“Pla mjing kphê thâo mĭn srăng bi hrŏ êwa jhat mơ̆ng boh lăn leh anăn  răng mgang lăn, êa leh anăn wăl hdĭp mda. Mơ̆ng klei bi lông anei kâo pô srăng hâo hưn hŏng mnuih ƀuôn sang klei thâo kâo hriăm čiăng kơ mnuih ƀuôn sang dưi kriê dlăng đang kphê mkiêt mkriêm leh anăn tŭ dưn hĭn čiăng kơ bruă duh mkra mnuih ƀuôn sang dưi đĭ kyar leh anăn bi hrŏ ênoh bi liê”.

 Klei bi lông phung ngă lŏ hma thŭn 2025 hŏng akŏ “Pla mjing kphê thâo mĭn” dưi mkŏ mjing ti Wăl tač 10/3, ƀuôn prŏng Ƀuôn Ama Thuôt, čar Dak Lak iêô jak klei mđing dlăng lu ƀĭng lŏ hma. Y Mơi Mlô (djuê ana Êđê) hriê mơ̆ng să Čư̆ Né, kdriêk Krông Ƀuk nao dlăng klei bi lông brei thâo, klei hdĭp mnuih ƀuôn sang mơ̆ng leh hruê mtlaih êngiê truh ară anei jing knang kơ kphê. Boh nik mơ̆ng thŭn dih truh ară anei, ênoh kphê đĭ anăn klei hdĭp mnuih ƀuôn sang dưi ƀiă. Hlue si Y Mơi Mlô, bruă mkŏ mjing klei bi lông “Ƀĭng lŏ hma bi lông” hlăm Knăm mơak kphê ăt đru kơ mnuih ƀuôn sang mđĭ hnơ̆ng jăk kphê čiăng ba čhĭ kơ ala tač êngao.

“Klei hdĭp mnuih ƀuôn sang dưi mđĭ, kyua ară anei kphê mâo ênoh. Mâo klei bi mlih, klei hdĭp đĭ kyar, mâo klei găl blei êdeh êdâo ăt kyua kphê mâo ênoh, mnuih ƀuôn sang mơak snăk. Mơ̆ng knăm mơak kphê anei, ăt čiăng hưn kơ grăp čô mnuih tar rŏng lăn thâo kơ kphê Ƀuôn Ama Thuôt mâo hnơ̆ng jăk ba čhĭ kơ ala tač êngao. Čang hmăng êdei anei kphê mâo ênoh yuôm hĭn čiăng kơ mnuih ƀuôn sang mâo klei hdĭp jăk siam”.

 Hlăm klei bi lông ƀĭng lŏ hma thŭn 2025 hŏng akŏ “Pla mjing kphê thâo mĭn”, phung bi lông bi êdah klei thâo, klei găn leh leh anăn thâo ba yua kdrăp kreh knhâo thâo mĭn hlăm bruă mkra mjing kphê thâo mĭn mdrơ̆ng hŏng klei bi mlih yan adiê leh anăn bruă djŏ tuôm kơ mkra mjing, anôk ba čhĭ, bi mguôp mkra mjing, mkra mjing mâo hră bi mklă, mkŏ mjing leh anăn mđĭ kyar hdră bi hgŭm hlăm bruă kphê Việt Nam. Jing sa čô hlăm êpul Bình Phước,  Nguyễn Văn Nhân brei thâo klei bi lông jing tač hlăp tŭ dưn kơ ƀĭng lŏ hma pla mjing kphê.

“ Hmei ktưn hưn tơdah hgŭm tinei čiăng hmư̆ klei thâo kơ mnuih ƀuôn sang mâo klei thâo săng kơ hdră ngă mâo hnơ̆ng boh mnga lu leh anăn jăk. Kyua anôk ba čhĭ ară anei arăng amâo djŏ čiăng kơ hnơ̆ng lu ôh  ƀiădah arăng čiăng kơ hnơ̆ng jăk snăn kơh čiăng ba čhĭ kơ ala tač êngao lu hĭn”.

 Mđing kơ akŏ “Pla mjing kphê thâo mĭn”, Lê Đình Tư,  Khua Anôk pla mjing Aeroco Coffee, ƀuôn prŏng Ƀuôn Ama Thuôt, čar Dak Lak brei thâo: hlăm dŭm thŭn giăm anei, ti alŭ wăl mâo leh bruă ngă bi hgŭm čiăng mkŏ mjing anôk pla mjing kphê hnơ̆ng jăk, hŏng hdră kñăm mjing mnơ̆ng dhơ̆ng jăk, ngă djăp hnơ̆ng čuăn ba čhĭ kơ ala tač êngao.

 “Hmei hgŭm hlăm hdră mkra mjing kphê hnơ̆ng jăk mơ̆ng čar, truh ară anei kphê hmei mâo leh ti dŭm anôk ba čhĭ dleh tŭ yap. Ara anei hmei čiăng đru hưn mdah kphê hnơ̆ng jăk Ƀuôn Ama Thuôt lač hjăn leh anăn Việt Nam. Anăn jing sa hlăm dŭm klei phŭn čiăng phung thơ̆ng kơ bruă, phung hđeh kphê, mnăm kphê khăp kơ kphê hnơ̆ng jăk, mơ̆ng anăn drei srăng hưn mdah mnơ̆ng dhơ̆ng jăk mơ̆ng kphê Việt Nam kơ tar rŏng lăn”.

 Hlăm jar Knăm mơak Kphê Ƀuôn Ama Thuôt tal 9 ăt mkŏ mjing leh klei bi kƀĭn mnia blei lu ala čar hŏng akŏ “Mkŏ, mđĭ hnơ̆ng kphê  Việt”. Klei bi kƀĭn bi trông kơ dŭm boh phŭn êlam kơ bruă kphê, msĕ si: Boh klei anôk ba čhĭ kphê dlông rŏng lăn, klei ba yua kphê; Hdră kčah pŏk ngă bruă đru mdrơ̆ng hŏng hdră kčah EUDR hŏng bruă kphê Việt Nam; Dŭm hnơ̆ng čuăn hŏng krĭng pla mjing kphê… Mbĭt anăn, phung bi ala bi trông kơ bruă klam anôk bruă duh mkra hlăm klei mđĭ kphê Việt Nam leh anăn mkŏ mjing anăn knăl kphê Ƀuôn Ama Thuôt - Anôk truh kphê dlông rŏng lăn; Boh klei ba čhĭ kphê, bi mklă anăn knăl anôk ba čhĭ leh anăn klei gun kpăk ba yua kphê dlông rŏng lăn ară anei, tă hdră anôk ba čhĭ kơ bruă kphê Việt Nam./.