Ară anei kluôm ala čar mâo hlăm brô 448 êbâo ha dliê pla kyâo prŏng, đĭ lu mkă hŏng êlâo. Êngao anăn, mâo hlăm brô 63 êbâo ha dliê dưi bi mlih mơ̆ng dliê kyâo điêt jing dliê kyâo prŏng hluê hdră đru mơ̆ng knŭk kna lehanăn bi hgŭm knŭk kna – êngao knŭk kna. Ênhă dliê mâo bi mklă hdră kriê dlăng dliê hơĭt kjăp mâo giăm 943.000 ha. Khădah mâo leh klei đĭ kyar hlăm bruă bi mklă dliê hơĭt kjăp mơ̆ng tar rŏng lăn, lu klei dleh dlan mơ̆ng dliê pla ăt dôk mâo msĕ si pla hliê hluôt, ênoh bi liê kơ bruă bi mklă lu, kƀah klei bi hgŭm kñăm mđĭ boh tŭ yuôm, klei thâo kriê dlăng dôk kƀah.

Nguyễn Danh Hùng, kơiăng khua Knơ̆ng bruă lŏ hma – wăl hdĭp mda Nghệ An, brei thâo: Alŭ wăl mâo klei găl prŏng kyua ênhă dliê kmrơ̆ng prŏng, lu anôk bruă duh mkra, mjing mjing kyâo lehanăn dŭm êpul hgŭm nao hgŭm mbĭt. Khă snăn, ênhă dliê kyâo prŏng mơ̆ng Nghệ An ăt ƀiă, knŏng mâo 33.000 ha. Hlăm wưng ti anăp, čiăng mđĭ boh tŭ yuôm dliê pla, čar Nghệ An lŏ dơ̆ng mđing kơ bruă pla dliê kyâo prŏng.

 “Čar ba mdah leh hdră čuăl mkă, bi mklă krĭng pla dliê kyâo prŏng, čiăng mâo hdră pla, bi mguôp hŏng bruă bi mklă dliê. Êpul hgŭm bruă ƀuôn sang čar ăt mâo hdră đru kơ bruă pla dliê kyâo prŏng, mphŭn mơ̆ng hdră ruah mjeh…”

Ti anôk bi kƀĭn trông, lu phung thơ̆ng kơ bruă, phung mă bruă kriê dlăng, phung kreh knhâo ba mdah leh lu hdră msir čiăng mđĭ kyar krĭng pla dliê kyâo prŏng mguôp hŏng hdră bi mklă bruă kriê dlăng hơĭt kjăp hŏng klei tŭ dưn. Hluê anăn, dŭm hdră msir mđing kơ bruă bi leh jar klei bhiăn, bi ênưih klei ngă hră mơar, čan prăk hŏng ênoh găl ênưih, ênua dliê; đru kơ mjeh mnơ̆ng pla msĕ si ana mtŭk mjeh mrâo, keo tam bội; ba yua kdrăp mrô hlăm hdră kriê dlăng lehanăn bi mklă phŭn agha pla mjing, mđĭ kyar hdră bi hgŭm kluôm hŏng klei kjăp.

Mơ̆ng hdră bi hgŭm lehanăn đru kơ hdră mnêč, Hoàng Văn Hồng, kơĭăng khua anôk mtrŭt mjhar bruă lŏ hma ala čar lač, brei mđĭ gru hmô pla pluă mguôp hŏng bruă bi mklă hdră kriê dlăng, mđĭ hdră bi hgŭm gŏ sang – êpul hgŭm – anôk bruă duh mkra – bi mklă hră tŭ yap. Hluê anăn, anôk mtrŭt mjhar bruă lŏ hma srăng ngă kdrông mkŏ, đru kơ mnuih ƀuôn sang dưi bi mjĕ hŏng kdrăp mrâo, hdră ngă bruă hơĭt kjăp lehanăn wăl anôk hrui blei hơĭt.

 “Anôk mtrŭt mjhar bruă mă lŏ hma ala čar ăt krơ̆ng kjăp nanao hdră ngă bruă, mđĭ hdră mtô mblang, mjuăt bi hriăm hdră mnêč kơ mnuih ƀuôn sang. Mkŏ mjing hdră mtrŭt mđĭ bruă lŏ ham čiăng kơ mnuih ƀuôn sang dưi tĭng bi mklă, mơ̆ng anăn mă klei hriăm, čiăng bi lar gru hmô mtrŭt mđĭ bruă lŏ hma pla dliê kyâo prŏng hŏng hdră kjăp.

 Klei kƀĭn trông amâo djŏ knŏng jing anôk kah mbha klei thâo, tui duah hdră ruh mtlaih klei dleh dlan biădah lŏ pŏk klei găl bi hgŭm mơ̆ng dŭm alŭ wăl, anôk bruă duh mkra lehanăn mnuih pla dliê. Dŭm hdră êlan, klei ƀuăn rơ̆ng lehanăn hdră mnêč đru mơ̆ng anôk bruă kriê dlăng, mkŏ mjing hdră mtrŭt mđĭ klei ngă bruă lŏ hma srăng mjing boh kdrŭt mrâo čiăng mđĭ kyar krĭng pla dliê kyâo prŏng mguôp hŏng bruă bi mklă hdră kriê dăng dliê kjăp, đru mđĭ boh tŭ bruă duh mkra, mđĭ klei hdĭp lehanăn răng mgang wăl hdĭp mda./.