Hlăm klei kƀĭn trông, lu phung bi ala mñă ktang, mđĭ kyar bruă lŏ hma mtah amâo djŏ knŏng jing hdră êlâo êdei ti anăp klei bi mlih yan adiê, ƀiădah lŏ jing klei găl mđĭ ênoh boh mnga leh anăn răng mgang wăl hdĭp mda. Hŏng čar mâo êbeh 1,36 êklăk ha lăn leh anăn lu klei găl bruă lŏ hma ti Dak Lak msĕ si mtah, doh, dar ƀrư̆ hruê ƀrư̆ mâo boh tŭ dưn yuôm bhăn. Nai prĭn Trần Ngọc Thanh – Khua anôk bruă lŏ hma mđĭ kyar krĭng ƀuôn sang brei thâo, ngă bruă mtah, doh leh anăn tŭ dưn ka lar bra kluôm ôh, sa kdrêč kyua dŭm klei ksiêm duah ară anei ăt mâo knhuah hnơ̆ng prŏng, kƀah klei klă čiăng kơ ƀĭng ngă lŏ hma dưn yua mtam.

“Dŭm klei ksiêm duah kơ bruă lŏ hma doh, bruă lŏ hma dar ară anei knŏng mdei ti dŭm hdră tă mbĭt. Klei ƀĭng ngă lŏ hma čiăng jing gru hmô klă klơ̆ng čiăng dưn yua hlăm êpul hgŭm bruă leh anăn mkra mjing hlăm boh sĭt. Lăn ala mâo, ƀiădah yua hbâo ka klă, ngă truh yua soh hbâo pruê, truh klei luč mang. Hmăng hmưi hdră êlan hnưm jing klei bi hmô klă klơ̆ng, ênưih ba yua.”

Mơ̆ng boh sĭt bruă mkra mjing, Trần Thanh Thoảng, sa čô ƀĭng ngă lŏ hma brei thâo, čiăng klă sĭt mă bruă mtah, doh… anôk bruă kriê dlăng čiăng mđĭ hĭn klei ksiêm dlăng hnơ̆ng jăk mnơ̆ng yua bruă lŏ hma, boh nik jing hbâo pruê leh anăn êa drao krih:

 “Knŭk kna čiăng ksiêm dlăng kjăp dŭm mta hƀâo pruê, êa drao krih leh anăn ƀuah mkra ktang dŭm anôk čhĭ mnơ̆ng mgưt, mnơ̆ng amâo mâo jăk. Ƀĭng ngă lŏ hma êjai blei mnơ̆ng srăng dưi rơ̆ng djŏ hnơ̆ng jăk, čiăng kơ êjai yua dưi ba wĭt boh tŭ dưn kơ ana pla mjing.”

Tŭ ư hŏng klei blŭ lač, čiăng mâo klei hriăm mbĭt mơ̆ng anôk bruă kriê dlăng hbâo pruê, êa drao krih, k’iăng khua anôk bruă pla mjing leh anăn răng mgang ana pla mjing Nguyễn Quốc Mạnh brei thâo, ară anei anôk bruă mkăp leh 22 hlăm 59 hră mơar kơ alŭ wăl, mâo wăt klei čuăn kơ bruă mkra mjing hbâo pruê leh anăn ba čhĭ. Dŭm alŭ wăl čiăng hnưm bi mrâo leh anăn hluê ngă:

“Hlăm klei ngă dŭm hră mơar djŏ tuôm hŏng klei pla mjing leh anăn răng mgang ana pla mjing, tơdah knơ̆ng bruă lŏ hma leh anăn wăl hdĭp mda čar Dak Lak tuôm hŏng klei dleh dlan, čiăng hưn mtam hŏng phŭn bruă leh anăn anôk bruă čiăng kơ hmei tiŏ nao phung thâo klă hĭn ngă klei đru, mgaih msir jăk hĭn dŭm hră mơar mkăp brei leh.”

Ăt djŏ tuôm hŏng bruă mkra mjing bruă lŏ hma hơĭt kjăp, Dhar bruă kreh knhâo mrâo mrang leh anăn wăl hdĭp mda mơ̆ng Bruă Kƀĭn Ala bi mguôp hŏng phŭn bruă lŏ hma leh anăn wăl hdĭp mda mkŏ mjing klei kƀĭn trông “mđĭ kyar bruă lŏ hma hơĭt kjăp nao mbĭt hŏng răng mgang wăl hdĭp mda”. Hlăm klei kƀĭn trông, phung bi ala mñă klă: hlăm wưng klei bi mlih yan adiê dleh ksiêm dlăng, ngăn dŏ lăn čar leh anăn lu jơr mnơ̆ng hdĭp dôk luč ram kjham, klei čhŏ djhan krĭng ƀuôn sang leh anăn alŭ wăl bruă lŏ hma dôk đĭ ktang jing dŭm klei lông dlăng čiăng kơ dhar bruă lŏ hma ala čar drei srăng bi mlih gru hmô mđĭ kyar mơ̆ng ba yua jih hnơ̆ng jing mđĭ kyar hơĭt kjăp, mơ̆ng kñăm kơ boh mnga jing kñăm kơ hnơ̆ng tŭ jăk leh anăn jăk hŏng wăl hdĭp mda. Mđĭ kyar bruă lŏ hma hơĭt kjăp amâo djŏ knŏng jing klei čiăng êdi hlăm boh sĭt ƀiădah lŏ jing bruă klam mơ̆ng Việt Nam hlăm bruă hluê ngă klei ƀuăn hŏng tar rŏng lăn.

Hlăm klei kƀĭn trông, k’iăng khua Bruă Kƀĭn Ala Lê Minh Hoan mñă ktang: Bruă lŏ hma dar amâo mâo kčưm mơ̆ng nah dlông hĭn ƀiădah mơ̆ng tur knơ̆ng. Čiăng đĭ kyar hơĭt kjăp srăng kčưm kơ bruă điêt hĭn, amâo mâo čiăng guôn bi kluôm klei kiă kriê, djăp ngăn prăk ôh mă bruă, srăng kčưm mơ̆ng grăp gŏ sang ngă lŏ hma dưi mă bruă điêt hĭn, grăp čô knuă druh bruă lŏ hma blŭ hŏng klei ênưih thâo săng hĭn, găp anôk bruă ksiêm duah hdră êlan klă klơ̆ng hĭn. Anăp anei Bruă Kƀĭn Ala mđing tal êlâo mkra mlih, bi mbŏ đa đa hdră bhiăn djŏ tuôm čiăng ruh mgaih klei dleh kpăk, đru kơ klei duh bi liê mtah leh anăn mđĭ hĭn klei ksiêm dlăng, rơ̆ng kơ bruă lŏ hma Việt Nam dưi mâo mta kñăm đĭ kyar leh anăn đru ngă hdră êlan mđĭ kyar ala čar truh thŭn 2045./.