Hruê (16/10), ti Hà Nội, Phŭn bruă Lŏ hma lehanăn wăl hdĭp mda mkŏ mjing Klei bi kƀĭn tĭng dlăng boh tŭ mđĭ kyar mnơ̆ng OCOP lehanăn hdră hiu čhưn krĭng ƀuôn sang ngă lŏ hma wưng tŭn 2021 – 2025, tă hdră êlan wưng thŭn 2026-2030.

Klei bi kƀĭn mñă klă, Hdră “Grăp să sa mta mnơ̆ng dhơ̆ng”, OCOP lehanăn Hdră hiu čhưn krĭng ƀuôn sang ngă lŏ hma jing leh boh kdrŭt yuôm bhăn đru “ƀrơ̆k mdih”, llei găl hdră dhar kreh, lăn adiê, anak mnuih ti dŭm krĭng ƀuôn sang. Hluê anăn, hdră mjing leh klei bi mlih hlăm bruă ngă lŏ hma, mơ̆ng ênhă điêt jing hdră bi hgŭm kluôm mđĭ boh tŭ yuôm, mkŏ mjing krĭng pla mjing hơĭt jăp; mtrŭt mđĭ hdră mphŭn čô̆ kơ bruă, mđĭ kyar anôk bruă ngă lŏ hma, pŏk klei găl hlăm hdră duh ƀơ̆ng kơ mnuih ƀuôn sang djuê ƀiă lehanăn phung mniê krĭng ƀuôn sang. Ară anei, kluôm ala čar mâo êbeh 17.300 mta mnơ̆ng OCOP, êbeh 600 gru hmô ngă bruă hiu čhưn ênguê ngă lŏ hma mbĭt hŏng giăm 400 anôk bruă hiu čhưn hdră ngă lŏ hma dưi tŭ yap. Ti anôk bi kƀĭn, phung bi ala bi mklă: Ti anăp klei čiăng mrâo hlăm hdră mđĭ kyar bruă duh mkra mtah, bi mlih mrô, bi hrŏ klei kbiă êwa jhat lehanăn mdrơ̆ng hŏng klei bi mlih yan adiê, brei mao dŭm knhuang nao mrâo hlăm hdră mđĭ kyar OCOP lehanăn hdră hiu čhưn bruă ngă lŏ hma. Hdră OCOP lehanăn hiu čhưn ngă bruă lŏ hma wưng thŭn 2026 – 2030 dưi čang hmăng mjing boh kdrŭt lŏ mkŏ dăp anôk bruă duh mkra krĭng ƀuôn sang, đru mđĭ hnư hrui wĭt, mkra mđĭ klei hdĭp mnuih ƀuôn sang, mbĭt anăn krơ̆ng kjăp knhua dhar kreh lehanăn lăn adiê ƀuôn sang Việt Nam./.