VOV4.Êđê - Dŭm thŭn anei, lŭ gŏ êsei mnuih djuê ana Ktu ti să krĭng čư̆ čhiăng Hoà Bắc, kdriêk Hoà Vang, ƀuôn prŏng Đà Nẵng, duh bi liê pla dliê, ba hnư hrui wĭt h’ĭt, đru kơ mnuih ƀuôn sang gĭr ktưn kpưn đĭ tlaih kơ ƀun, bi h’ĭt klei hdĭp. Khă snăn, mnuih ƀuôn sang lu jing pla dliê mtŭk huĭ klưh hroh lăn. Giăm anei, anôk bruă sang čư̆ êa ƀuôn prŏng Đà Nẵng ba mdah leh hdră mtrŭn đru, mtrŭt mnuih ƀuôn sang pla ana kyâo dliê prŏng ƀuăn srăng ba wĭt lu klei tŭ dưn, đru kơ mnuih ƀuôn sang mđĭ kyar bruă duh mkra, đru răng mgang wăl hdĭp mda.

Êlâo dih, amai Hồ Thị Thanh Tỏa, ti alŭ Tà Lang, să Hoà Bắc, kdriêk Hoà Vang mâo tŭ mă lăn knŭk kna phăn jao pioh pla truh 5 ha dliê. Kyua djă yua hdră kreh knhâo mrâo, dlăng kriê wiê ênăk dliê kyâo akasi đĭ jing siam. Truh yan uă druôm kyâo gŏ sang ñu mâo ba wĭt hlăm brô 350 êklăk prăk. Amai Toả brei thâo, kyua mâo bruă pla dliê gŏ sang ñu hơĭt leh klei hdĭp mda, mâo djăp prăk mdơ̆ng sang lehanăn tloh blei êdeh p’phŭt, tivi, lehanăn mnơ̆ng mnuă yua hlăm sang. Ară anei, amai Hồ Thị Thanh Toả lŏ mtrŭt mjhar, ktrâo atăt phung ƀuôn sang krĭng mnuih djuê ana Ktu mđĭ kyar bruă mơ̆ng dliê. “Phung ƀuôn sang Ktu dôk hlăm klei dleh dlan, mâo bruă mơ̆ng knŭk kna jao lăn phăn dliê kơ phung ƀuôn sang pioh mđĭ kyar klei hdĭp mda hŏng klei tŭ jing, ƀrư̆ ƀrư̆ dơ̆ng hơĭt. Jing mnuih Ktu mtrŭt mjhar, lehanăn mtă mtăn kơ phung ƀuôn sang bi pla dliê, amâo lŏ mâo ôh gŏ sang lĕ hlăm klei ư̆ êpa knap mñai. Hlăm thŭn mrâo gŏ sang mlih dơ̆ng pla ana kyâo djuê prŏng pioh ma kyâo sui thŭn”.

Ară anei, giăm 200 gŏ sang mnuih djuê ana Ktu ti să Hoà Bắc mâo leh klei hdĭp đĭ kyar kyua mơ̆ng bruă pla dliê. Mnuih Ktu tinei amâo lŏ bi rai dliê kmrơ̆ng ôh, ƀiădah thâo duh ƀơ̆ng leh hŏng anôk ala krĭng lăn pô. Nguyễn Văn Lâm, ti să Hoà Bắc brei thâo, leh mâo ngăn dŏ duh kơ bruă čiăng bi hơĭt klei hdĭp mda, gŏ sang ƀrư̆ ƀrư̆ mlih mơ̆ng bruă pla ana akasi ƀiă thŭn mlan mlih pla ana kyâo prŏng sui thŭn hĭn pioh ma kyâo. “Ară anei dliê čăt đĭ jăk leh, mâo đa đa gŏ sang uă druôm kyâo chĭ mâo ba wĭt truh giăm 300 êklăk prăk, mâo leh mnơ̆ng pioh, mnơ̆ng yua. Mrâo anei lŏ mâo hdră êlan mđĭ ai phung ƀuôn sang bi pla kyâo djuê prŏng, čiăng kơ phung ƀuôn sang mâo klei đĭ kyar hĭn, kjăp hĭn mkă hŏng bruă knŏng pla ana akasi. Kyâo prŏng čhĭ mâo ênoh hĭn”.

Kdriêk Hoà Vang, ƀuôn prŏng Đà Nẵng mâo êbeh 17 êbâo ha lăn dliê pla kyâo. Êngao kơ jih jang hdră êlan mơ̆ng knŭk kna hŏng phung ƀuôn sang, snăn bruă sang čư̆ êa lŏ mjing djăp klei găl pioh kơ phung ƀuôn sang dưi ngă bruă. Lu gŏ sang mâo čan leh prăk knơ̆ng prăk pioh mđĭ kyar bruă knuă jing pla dliê, snăn klei hdĭp mda phung ƀuôn sang mâo leh klei bi mlih êdi. Grăp yan uă druôm ana akasi, mâo gŏ sang hrui ba wĭt mơ̆ng 200 - 400 êklăk prăk. Hồ Phú Thanh, k'iăng khua knơ̆ng bruă sang čư̆ êa să Hoà Bắc, kdriêk Hoà Vang, ƀuôn prŏng Đà Nẵng brei thâo, mơ̆ng leh knŭk kna mâo hdră êlan jao lăn phăn dliê, phung ƀuôn sang nao tŭ mă lăn ala, lehanăn jih ai tiê mă bruă pla dliê kyâo: “Mơ̆ng bruă phung ƀuôn sang bi mlih amâo lŏ jah ênah ngă hma, ară anei bi pla kyâo akasi, snăn truh kơ ară anei lu leh gŏ sang kpưn đĭ hlăm klei hdĭp tlaih mơ̆ng klei dleh dlan, boh nik dơ̆ng mâo leh đa đa gŏ sang đĭ nao kơ mdrŏng. Mâo đa đa gŏ sang jhŏng mlih mơ̆ng bruă pla ana akasi, ară anei pla kyâo djuê prŏng pioh mă kyâo, mâo leh alŭ wăl đru kơ phung ƀuôn sang pioh duh bi liê pla kyâo djuê prŏng”.

Mrâo anei, knơ̆ng bruă sang čư̆ êa ƀuôn prŏng Đà Nẵng mâo leh hdră êlan đru ba, mtrŭt phung ƀuôn sang pla kyâo djuê prŏng pioh mă kyâo. Ară anei, mâo leh truh 41 êpul bruă, gŏ sang ngă hră mơar pla kyâo djuê prŏng hŏng ênhă giăm 800 ha. Trần Viết Phương, K’iăng khua kiă kriê knơ̆ng bruă lŏ hma ƀuôn prŏng Đà Nẵng brei thâo: Čiăng kơ hdră êlan pla dliê hŏng kyâo djuê prŏng dưi truh hŏng phung ƀuôn sang, lehanăn dưi bi leh ênoh cuăn, snăn knơ̆ng bruă akâo leh kơ knơ̆ng bruă sang čư̆ êa ƀuôn prŏng bi sa hnơ̆ng hdră êlan pioh mbha ngă bruă hlăm lu gưl. Mơ̆ng anăn, gưl tal êlâo anei, ƀuôn prŏng bi liê leh êbeh 5 êklai prăk đru kơ phung ƀuôn sang pla kyâo djuê prŏng pioh mă kyâo: “Hlue ngă hdră mtrŭn mrô 254 mơ̆ng Êpul Gơ̆ng bruă ƀuôn sang ƀuôn prŏng kơ hdră êlan đru hlăm bruă pla dliê djuê kyâo prŏng hlăm ƀuôn Đà Nẵng. Hlăm gưl anei mkŏ mjing hdră ba mdah kơ knơ̆ng bruă sang čư̆ êa bi mklă pioh đru gưl tal êlâo, pla mrâo truh 12 êklăk ha, bi mlih mơ̆ng 8 êklăk ha. Êlâo anăn hlăm brô 4 – 5 thŭn dơ̆ng dưi uă druôm yơh hlăm sa wir pla kyâo, ƀiădah ară anei pla kyâo djuê prŏng snăn luič truh kơ 10 thŭn mâo druôm lehanăn ênoh mâo ba wĭt srăng đĭ hĭn mơh êgao kơ mkrah”./.