VOV4.Êđê - Leh 15 thŭn hlue ngă Hdră mtrŭn Gưl dlông tal 7 gưl 10 kơ bruă lŏ hma, ƀĭng ngă lŏ hma, krĭng ƀuôn sang ala čar drei mâo leh lu klei tŭ yuôm bhăn, kluôm ênŭm.  Bruă mkra mjing, mnia blei mnơ̆ng dhơ̆ng lŏ hma bi mlih ktang hlue hdră mđĭ hnơ̆ng jăk leh anăn ênoh yuôm. Khădah, bruă pŏk ngă Hdră mtrŭn hlăm wưng êgao adôk mâo lu klei êdu kƀah. Hlăm Klei bi kƀĭn Gưl dlông 5, Anôk bruă Đảng gưl dlông bi trông kơ Hdră bruă ksiêm wĭt 15 thŭn hlue ngă Hdră mtrŭn Klei bi kƀĭn gưl dlông 7 gưl X kơ bruă lŏ hma, ƀĭng ngă lŏ hma, krĭng ƀuôn sang. Hlue anăn, bruă ksiêm hriăm, ba yua kreh knhâo - kdrăp mrâo, mlih mrâo mbruă, phung thâo bruă ka jing boh kdrŭt phŭn ôh čiăng mjing klei mđĭ kyar… klei anei brei mâo Hdră mtrŭn mrâo čiăng lŏ dơ̆ng bi mklă bruă klam yuôm bhăn mơ̆ng bruă lŏ hma, ƀĭng ngă lŏ hma, krĭng ƀuôn sang hŏng bruă mđĭ kyar lăn čar.

Lŏ dơ̆ng mđing hĭn kơ bruă klam yuôm bhăn mơ̆ng lŏ hma, phung ngă lŏ hma, krĭng ƀuôn sang hŏng bruă mđĭ kyar lăn čar, Hdră mtrŭn mơ̆ng klei bi kƀĭn prŏng Đảng kluôm ala 13 lač klă: Lŏ mkŏ wĭt bi kjăp bruă lŏ hma, mđĭ kyar klei duh mkra krĭng ƀuôn sang djŏ tuôm hŏng bruă mkŏ mkra krĭng ƀuôn sang mrâo. Mđĭ kyar bruă lŏ hma bi mâo boh mnga čhĭ mnia lu, hlue hŏng ênuk mrâo mrang, ba yua kdrăp mrâo, mđĭ hĭn boh tŭ klei đĭ kyar kjăp. Mtrŭt klei kmđĭ kyar bruă lŏ hma mtah, doh, bruă lŏ hma răng kriê wăl hdĭp mda, bruă lŏ hma hŏng hdrăp mrâo mrang, thâo mĭn, bruă lŏ hma mrô, djŏ guôp hŏng klei bi mlih yan adiê. Lŏ dơ̆ng ngă dŭm bruă ala čar kñăm mkŏ mkra krĭng ƀuôn sang mrâo, hlue si hdră bi mguôp hŏng klei mđĭ kyar ƀuôn prŏng, mtrŭn agha êlam hĭn, ngă bruă tŭ jing lehanăn kjăp hĭn. Ngă bruă mkŏ mkra krĭng ƀuôn sang mrâo ti knhuang mrâo kdlưn hĭn, jing krĭng bi hmô jăk, lehanăn mkŏ mkra krĭng ƀuôn sang mrâo ti gưl nah gŭ. Mkŏ mjing hdră mprăp djăp mnơ̆ng ƀơ̆ng huă kơ ala čar hlăm ênuk ară anei. Ƀrư̆ ƀrư̆ bi hrŏ êwang bi kpleh klei dưi dưn dhar kreh plah wah ƀuôn prŏng hŏng krĭng ƀuôn sang, plah wah dŭm krĭng, kwar lehanăn dŭm gưl hlăm yang ƀuôn...

Mâo klei mơak leh Klei bi kƀĭn gưl dlông 5 tal anei bi trông kơ dŭm bruă yuôm bhăn kơ lăn čar, hlăm anăn djŏ tuôm hŏng bruă lŏ hma, phung ngă lŏ hma, krĭng ƀuôn sang Nguyễn Trí Ngọc, k’iăng khua Knơ̆ng hgŭm bruă lŏ hma lehanăn mđĭ kyar krĭng ƀuôn sang Việt Nam lač: Hmei čang hmăng mâo hdră mtrŭn mrâo bi êdah klei gĭr mơ̆ng jih bruă kđi čar hŏng dŭm bruă lŏ hma, phung ngă lŏ hma, krĭng ƀuôn sang. Čiăng kơ hdră mtrŭn mrâo dưi hlue ngă, hmei mĭn bi mâo hdră hđuh ktang. Hjăn hŏng bruă lŏ hma, hlăm anăn mâo bruă pla mjing, hmei ƀuh năng bi mâo hdră êlan hđuh ktang kơ bruă bi leh kjăp hdră bhiăn klei kơ lăn ala, kyuadah klei bhiăn mơ̆ng lăn ala srăng ba klei bi klă kơ dŭm bruă mđĭ kyar lŏ hma, boh nik mđĭ kyar bruă lŏ hma bi mâo mnơ̆ng čhĭ mnia, snăn tơdah drei bi mlih klei mĭn hlăm bruă lŏ hma pla mjing bi duh mĭn čiăng bi mâo boh mnga pioh kơ klei čhĭ mnia mđĭ boh tŭ dưn.

Brei thâo klă bruă lŏ hma jing nanao kmeh krơ̆ng kjăp kơ bruă duh mkra, tơdah djăp mta boh tŭ dưn mơ̆ng bruă lŏ hma, phung ngă lŏ hma, krĭng ƀuôn sang mâo đru mguôp leh yuôm bhăn hlăm dŭm boh tŭ dưn mâo ba wĭt anăn, jing klei tŭ dưn yuôm kơ hƀuê ênuk hlăm klei mlih mrâo wưng leh êgao. Khua phŭn bruă lŏ hma Lê Minh Hoan lač, êjai boh klei hlăm ala čar, lehanăn tar rŏng lăn dôk mâo lu klei bi mlih, snăn bruă rŭ mdơ̆ng lehanăn răng mgang lăn čar ară anei năng mđĭ hĭn hnơ̆ng kjăp kơ bruă lŏ hma, phung ngă lŏ hma, krĭng ƀuôn sang. Klei ruă tưp prŏng Covid 19 leh êgao jing klei bi knăl êdah êdi kơ hdră êlan mghaih msir pral, lehanăn mbruă êjai dôk găn klei dleh msĕ si ară anei. Kyuanăn yơh, ciăng rơ̆ng dưi mâo klei đĭ kyar kjăp, bruă bi mlih hlue nao hlăm hdră êlan lŏ hma ênuk mrâo mrang, jing bruă năng ngă hŏng klei mjêč ară anei:Čiăng dưi mâo klei bi mlih hŏng klei kjăp, snăn bi mâo klei thâo săng mrâo, mâo dŭm klei kreh knhâo thâo ba yua mđrĭng hŏng klei tar rŏng lăn dôk mđĭ kyar, bi tă êlan kơ alŭ wăl mă bruă. Hlăm klei mĭn kjăp mơ̆ng sa čô mnuih bi êdah dưi dưn yua kơ jih klei bi mlih lăn čar, čiăng kơ jih jang mnuih mâo dưn boh tŭ, mđrăm mbĭt srăng ngă bruă. Hlăm klei bi mlih bi mâo hdră êlan klă mngač lehanăn djŏ, ngă hŏng klei mbruă, amâo srăng dưi ôh sa čô ngă ƀiădah hlăm klei bi đru, bi klam mbĭt, klei sa ai mơ̆ng dŭm phŭn dhar bruă, mơ̆ng gưl dlông hlŏng kơ nah gŭ, mơ̆ng dŭm êpul êya, lehanăn grăp čô mnuih dŭm ƀĭng hgŭm hlăm ala čar lehanăn mơ̆ng ala tač êngao.

Tui si Lương Quốc Đoàn, Khua Êpul hgŭm bruă lŏ hma gưl dlông Việt Nam, čiăng kơ phung ngă lŏ hma bi mlih klei mĭn hlăm bruă duh mkra pla mjing, mđĭ kyar bruă lŏ hma, snăn dŭm êpul hgŭm bi mprăp kơ ƀĭng ngă lŏ hma mâo djăp klei thâo săng pioh bi mlih hdră mă bruă. Amâo mâo dưi ôh knŏng lač bi mlih, lehanăn bi mlih yơh, tơdah ăt adôk hŏng klei mĭn hđăp, lehanăn hdră mă bruă hđăp, Lương Quốc Đoàn lač: Čiăng kơ phung ngă lŏ hma thâo bi mlih hdră êlan mĭn, khăp kơ klei mlih mrâo hlăm bruă lŏ hma. Snăn bi mprăp kơ ƀĭng ngă lŏ hma mâo djăp klei thâo săng, pioh kơ bruă bi mlih hdră êlan mă bruă, kyuadah amâo mâo dưi ôh knŏng lač bi mlih, lehanăn hlŏng bi mlih yơh, tơdah ăt hŏng klei mĭn hđăp, lehanăn hdră mă bruă hđăp snăn jing dleh snăk dưi ngă. Kyuanăn, jih jang dŭm gưl Êpul hgŭm brei mâo klei bi mguôp kjăp hŏng dŭm phŭn dhar bruă, djăp êpul êya, lehanăn phung duh mkra, êpul hgŭm dưn yua klei kreh knhâo, tiŏ nao mnuih nao mjuăt hriăm, mprăp kơ ƀĭng hgŭm mâo klei thâo săng, mâo djăp klei dưi jing pô ngă bruă, mđĭ kyar bruă klam jing knơ̆ng. Tơdah phung ngă lŏ hma mâo leh klei thâo săng, lehanăn thâo dưn yua jih bruă klam anăn, sĭt nik bruă lŏ hma, phung ngă lŏ hma, krĭng ƀuôn sang srăng mâo klei đĭ kyar yơh./.